كلاش يودعكم مع الباب الي أستقبلتوه معه ( أستروا ماواجهتم )

[معلومات العضو مسفر المصارير]

بسم الله الرحمن الرحيم




تفاجات مثل غيري بأنسحاب ابن العم الغالي نايف البدراني (( كلاش )) من المنتدى

وحقيقه والله اني مدري لكن الله يوفقه طالما انه مشغول وما اقول الا عساه يرجع

لربعه سالم غانم وهذي ابيات تهيضت فيها يوم ذكرت رفقته لنا بالمنتدى الي كلها نوماس

ومواقفه معنا وفزعاته بالردود على الشعراء من خارج القبيله وهي تعبر عن مافي

الخاطر تجاه ابن عم عزيز وغالي وشاعر بحر تنومس مواقفه اقول فيها ..

القلب ضاق ولالقـا مـن يواسيـه = مابين ربعـي ميـر كنـي خـلاوي
من عقب راح اللي نعـزه ونغليـه = وتقطعـت عنـا حبـال الرجـاوي
جانا غريب وراح محدٍ عـرف ليـه = وفي منتدانا صـار نجـمٍ سمـاوي
معه جمعنا الطيب فسمـى معانيـه = وعز الله انـه بالمراجـل غنـاوي
حبه لربعـه مـن مبـادي مباديـه = وهومـة تفاكيـره بعيـدة حـراوي
واضح صريـح وبينـاتٍ مماشيـه = ماهوب من يحسد وقلبـه عمـاوي
ولايشـوف بنفسـه كبـرٍ ولا تيـه = واثق مثل ضلعٍ عسيـر المهـاوي
واذا ضمينا نرتوي عـذب صافيـه = نارد ونصـدر منـه عـدٍ رهـاوي
وان جا اللزوم وخانت اللاش رجليه = وضاعت علوم مكثريـن العـزاوي
نصيح بأسم ((كلاش)) وننخا وندعيه = ويجيك هـاوي مثـل حـرٍ نـداوي
واليـوم راح وغيبـنـه ليالـيـه = ما عاد ندري راح بـأي النحـاوي
ليته معلمني علـى ويـن أخاويـه = وألا معلمنـي علـى ويـن نـاوي
خلاني مابيـن العتـب والمشاريـه = كنـي مريـضٍ معطبتـه المكـاوي
ومع كل طلعة شمس ياناس برجيـه = وأنا على رجعت رفيقـي رجـاوي

الشاعر : مسفر بن منيف المصارير

أبو ناااايف