قصة كرم الغييثي

[معلومات العضو لاد شكر]

السلام عليكم

وماجورين يا الربع

ذي سالفه لواحد من بني عمنا الغييثات

فيه غييثي معروف بالكرم لكن الفقر شين الله يمنعنا من الشين وفي وقت لا هوب حل مغازي وكسب باليمنا ولاهيب وقت الطفره المهم اشتهر بالكرم بن عمنا وبالفقر بنفس الوقت ايه جا ضيف عند ناسن من جماعته وعزموه ويمسكون الدور على كرامة ضيفهم وخوينا يدعي يا الله ان تفرجها لا جا دوري وهو ما عنده ما يملكه وحزت في خاطره يجي ضيف ولا يكرمه وجماعته مهب حالهم اشلا من حاله بواجد وهم لكن اشلا بشي بسيط ودرو جماعته انه ينتظر دوره وقالو له يا بني عمنا حنا نكفك وانت ما عندك ما تقدمه ولا حنا بذاخرين عنك شي وانت تعرف حالنا قال فيه رب اكرم منا جميع المهم يوم فر الدور على كرامة الضيف ولا بقا الا خوينا راعي السالفه وهو يعزم الضيف وتمم له الضيف و بن عمنا عزم وهو ما يملك شي لنفسه وغدا الضيف عنده اليوم الثاني ويوم جا حل الفجر وهو يسمع صوت ذاك الطلي عند بيته ( بيت الشعر ) وهو يروح الا ذاك الطلي
قال سبحان رب كريم ويا فرحته ذاك الوقت وهو في وقتها ويقوم ويذبحه ويسنع ذبيحيته ويوم جا حل الضحويه الا ذاك الرجال اللي جاي ينشد عن طلي غدا منه ايه هنا انصفق وجه خوينا الغييثي قال لا ما خبرت لكن علمني ان جا له طاري اذكر اسمك وعطني اسمك كامل ووين حل مراحك قال انا ذاك الرجال ويعطيه اسمه كامل ووين محله ومن اي عرب ويوم جا يمشي اللي ينشد عن طليه قال ابن عمنا الغييثي الغدا زاهب وهو يتعذر
ويقوم الغييثي ويحرم ويقول علي بذيك الكلمات ان تغدا عندنا وبننشد عن طليك وهو يتمم له وجا الضيف وباقي جماعته وذالين ربعه من خويهم خابرين ان فقره شين
ويوم جا حل الغدا وهو يقدم الكرامه لربعه وضيفه ومن ضمن الحضور راعي الطلي ( ما يدري انه طليه ) وعقبها كلن راح في دربه ونشدوه جماعته عن ذا الطلي قال ساقه لي رب كريم .
وعقبها بوقت ويرزق الله خوينا الغييثي ويتذكر راعي الطلي اللي نشده عن طلي ضايع وهو اخذ اسمه وين محله فيه ويروح صوبه ولا اعرفه اللي ينشد عن الطلي قال منتب بخابر رجال نشدته عن طلي وغداك قال ايه ذكرتك قال ترا غدانا ذاك اليوم طليك اللي تنشد عنه وترا سالفتي كذا وكذا واليوم جايب لك طلي اكبر واسمن منه والسموحه لكن عساني القا منك عذر قال اي بالله مسموح وهو يطلق ان ما يجيه الطلي وقاله الا بيض الله وجهك وليت كلن مثلك واني بايح منك وعلمك يطلق الوجه .


وبيض الله وجه الغييثي ( ابن عمنا )

وصدق من قال

ان الظفر منجا والكريم معان

 

 

 

 

[معلومات العضو سالم الغريري]

الظفر منجا والكريم معان

صحيح والكريم يعينه الله والبخيل ماله زوال

بيض الله وجهك يا لاد شكر على ذي السالفه اللي تبيض الوجه

وعساك على القوة

 

 

 

 

[معلومات العضو ابن وتيد السباعي]

وعليكم السلام ورحمة الله وبركاته

الله يجيرك من العثور


والله ان ذا الغييثي كفوا وكريم سبلا


الله لايهينك ويطول عمرك على السالفه الي تبيض الوجه بفعل ولدعمنا وكرمه

 

 

 

 

[معلومات العضو يحيى الودعاني]

أخوي لاد شكر
بيض الله وجهك على السالفة الطيبة

 

 

 

 

[معلومات العضو سعد المقابله]

كفو والله بصبيان الغييثات

ولاعليكم الزود يالشكره

كلكم مطاليق

والله لايهين الجميع

 

 

 

 

[معلومات العضو الشكري]

المشاركة الأصلية كتبت بواسطة ابن وتيد

وعليكم السلام ورحمة الله وبركاته

الله يجيرك من العثور


والله ان ذا الغييثي كفوا وكريم سبلا


الله لايهينك ويطول عمرك على السالفه الي تبيض الوجه بفعل ولدعمنا وكرمه

الاخ العزيز / لاد شكر

الله لا يهينك على السالفه الطيبه واللي ترفع الراس

من ابن عمنا اللي اشتهر بالكرم وهو فقير

والله ونعم فيه وفي ربعه وعلمه يطلق الوجه وينومس

والف شكر لك على القصه المشرفه


اخوك

ابو عبد الله الشكري

 

 

 

 

[معلومات العضو ابن محمد الودعاني]

بيض الله وجه ابن عمنا الغيثي واشهد ان فعله يرفع الراس

رغم الفقر ورغم الجوع اللا انه عاد سيرة كرم الحاتمي

والرزق بيد المدبر الحكيم

ولاهنت يالشكري على ايرادك لهذي السالفة اللي تنومس الرجال

تحياتي

 

 

 

 

[معلومات العضو العماني]

بيض الله وجهك يا لاد شكر على السالفة التي تبيض الله الوجه والتي تدل على كرم الدوسري مهما كانت حالته

تقبل تحياتي،،

 

 

 

 

[معلومات العضو دغش البطي انتقل الى رحمة الله مساء الاثنين الموافق 8-1-2007 رحمه الله واسكنه فسيح جناته]

بيض الله وجهك يا لاد شكر على السالفة

اللتي تبيض الوجه وترفع الراس

واللتي تدل على كرم الدوسري عامة مهما كانت حالته

تقبل تحياتي،،

 

 

 

 

[معلومات العضو إبـراهيـم بـن راكـــان]

وعليكم السلام ورحمة الله وبركاته

الله يجيرك من العثور



ولاتهـــون يـالاد شكـر على سـرد ابن عمنـا الى نفخـر بـه , بس شف ربك يعطي كلـن على قـد نيتـه .


ولاهنـت على القصـه الطيبـه الي ماتجـي الى من رجـال شـرواك ولايهـون الجميـع .

 

 

 

 

[معلومات العضو لاد شكر]

صدقتو جعلني ما اخلامنكم
وجعل شيبان ارثوكم مسكنهم الجنه
الله لايهينكم

 

 

 

 

[معلومات العضو الصقر الحر]

بيض الله وجهك يالدشكر على السالفه اللتي تبيض الوجه واللتي تدل على كرم الدوسري مهما كانت حالته وتقبل تحياتي أخوك الصقر الحر

 

 

 

 

[معلومات العضو wolf]

سالفه حلوه

بس انا عندي تعليق

يقول المثل مد الحافك على قد رجليك

والجود من الموجود حتى لو كان خبزه او تمره ولبن

بس الكرم ليس معناه ان تذبح من حلال غيرك وتكرم

بالله عليك لو ان صاحب هذه القصه ملقى خروف
شلون يذهب من محاسبة الله

 

 

 

 

[معلومات العضو لاد شكر]

اني خابر انها سالفه طيبه وترفع الراس بعد والمثل يقول الكريم معان والظفر منجا وامرن هين لا ما جاه ذا الطلي كان اقل شي بيذبح ركبيته ولا تنسا سالفة الذويبي ان كانك تعرفها ولا لا يوم الله ساق له الابل في محله
وتقول حلال غيرك الرجال الله ساق له ذا الطلي ويوم عرف راعيه رد له بواحد اسمن واطيب منه
وعساك تفهم في النهايه ان ذا القصه حصلت صحيح وان كانك ناوي تشكك فذا امر ثاني
والرجال متكل على الله والله رزقه اما تقول محاسبة الله الظاهر انك ما قريتها عدل الرجال ممسي في محله وجاه ذا الخروف له عند محله من اللي ارسل له !؟ ما غزا احد ولا اسرقه
وان كانك منتب مصدق لا تصدق يكفي الرياجيل اللي شافو الموضوع ولحدن شكك مثلك مير الحمد الله ان الرجال ناوي بالكرم مهب ناوي بالبخل
سلام

 

 

 

 

[معلومات العضو لاد شكر]

الصقر الحر
اسم على مسما حي الرد اللي ينومس بيض الله وجهك
صدقت صدقت