للمجتمـــــــــــــع؟!؟!؟!؟ مع التحيه!!

[معلومات العضو العنووود]

السلام عليكم ورحمة الله وبركاته

..

..

أنا بنت عمري 23
تغيبت عن مجتمعنا السعودي 8 سنوات
ورجعت له من شهرين

بصراحة تفاجأت وانصدمت من التغيرات اللي حاصلة
في المجتمع بكل فئاته وطبقاته ..
في النوادي الرياضية ..
في الأسواق..
والأهم في الجامعات والمدارس..
وفي المنتديات والمدونات

تمنيت أني ألقى المجتمع تطور للأمام..
أو تقدم للأفضل
لكني للأسف لقيت النقيض
رجوع خطوااات للخلف..من جميع النواحي
قد يكون كلامي فيه غلظة شوي
بس يقول لك المثل..

يا بخت من بكاني وبكى الناس علي
ولا من ضحكني وضحك الناس علي

..

..


تساؤلات كثيرة أرددها بيني وبين نفسي وما ألقى لها أي جواب
وأنا متأكدة أنها تتردد على كل رزين وعاقل شرواكم

هل لما زادت رفاهية الحياة يزداد تخلفنا.؟!
هل لما تطورالعلم وتسهلت الطرق له يزداد جهلنا..؟!

ليه صرنا مجتمع سطحي
لاهم ولا رؤية ولا رسالة ولا هدف من الحياة

التفكير والتركيز على المنظر والمظهر

فيه كاريكاتير أول ما شفته زعلت
لكن ألحين حسيت إنه أبلغ من كتب ممكن نكتبها
الكاريكاتير يمثل شعوب العالم
فمثل الشعب السعودي
بكرتونات مزينة وإذا فتحتيها لقيتيها فاضية
وهذا واقع البنات اليوم مظهر ومنظر
ولو تقولين لها 1 ×1 كم؟
تنحت
لو تقولين لها وش آخر كتاب قريتيه؟
قالت هااااه
"بغض النظر عن الروايات التافهة اللي طايحين فيها هالفترة"

×

لو نص هوس المظاهر هذا كان على عقولنا لكنـّـا أنجح الشعوب
لأنه ببساطة كل شيء متوفر عندنا
لا ناقصنا مال ولا قدرات عقلية
×
الأجانب فلوسهم رايحة على تعليم عيالهم وتثقيفهم وصحتهم
تلقين راتب الأب والأم ضئيل ومستحملين شظف العيش
عشان يرسلون ولدهم برى يدرس شهادة عليها القيمة
بينما عندنا يستحملون الديون والأقساط ..
عشان تسوي زواج كله إسراف وتبذير وآخرته الناس طالعة منتقدة
وإلا ديون وأقساط عشان تقول صيفنا برى شهر كامل

والله أعرف وحدة شخصيا تقول السفر بالنسبة لي عذاب لأننا إذا سافرنا
طول السفر طقاق أنا وزوجي وأنا أحرسه لا تناظر وهو يحرسني لا تناظرين ..
قلت طيب خلوا سفركم لبلدان محافظة أو لا تسافرون حطوا فلوسكم في البيت
تغيير ديكورات وأثاث
عصصصبت قالت خيييير سلايفي لين سولفوا أصير بينهم ما سافرت
وإلا إذا سولفوا صديقاتي إلا أنا ما سافرت وش بيقولون عني

!!

مافيه تعليق

×

أنا لما جيت بعد هذي المدة توظفت في بنك
ولاحظت إنه إذا جت العميلة أم ساعة ألماس فخمة وشنطة قوتشي الكل يتبادر لخدمتها
وإذا جت العميلة اللي مظهرها ما فيه بهرجة.. تستجدي الموظفات يجون يساعدونها
والمضحك في الوضع إني ألاقي العميلة البسيطة ما شاء الله حسابها شي وشويات..
وهذي أم البهرجة حسابها بالسالب(عليها قروض وسيارات تقسيط)..وعنوانها يا إما شقة وإلا أجار
مو انتقادي على القرض ولا على السكن انتقادي
هو إنك مكلفة نفسك بالديون والقروض عشان شويتين نظرة إعجاب من الناس
بس ما ألومك لكن ألوم المجتمع اللي صار سطحي..
يحكم عليك بموديل جزمتك
×
أول تصنيفنا للمجتمع كان
جامعية
مثقفة
عاقلة
متربية
قليلة أدب
دينة
بنت ما ربوها أهلها
يعني كان مقياسنا
الدين والتعليم والتربية

أما ألحين
صار تقسيمنا للمجتمع
لو كلاس
هاي كلاس
بنت ستايل
بنت قروية
فعلا تصنيف متخلف رجعي سطحي
يعني رجعنا للجاهلية
وإحنا ألحين ننادي بالعولمة والعالمية والتطور والتحضر
الحضارة تبدأ بالعقول
×
من جد من كثر ما أنا منهارة من هالوضع والله مو عارفة وش أكتب
أروح لنادي رياضي ألاقي ملابس يستحي إبليس يلبسها
طبعا هذا غير الاسترتشات اللي لما تتمدد يطلع البنطلون شفاف..
شيء يجيب الغثيان..
المشكلة نتدرب في كلاسات كلها مرايا يعني ماتستائين من منظرك!
المشكلة إن زمان كان هذا الشيء
نكرة + قلة تربية + قلة دين

أما ألحين

عادي وكنه العيد

×

من أسبوعين اتصلت وحدة سعودية على فوزية الدريع !
قالت أنا معلمة كلمت واحد وحبيته وقال..و..و..وكملت تفاصيل حماقتها ..
اللي من جد فشيلة على القنوات ينقال أنه هذي سعودية
قالت لها الدكتورة
"..وش هالخداج معلمة وهذا عقلج.. أي جيل بتخرجين لنا..وين مخج..وين تربيتج "
الخداج: هو الجنين في بطن أمه إذا تعدى الشهر الخامس
يعني تعدينا مرحلة أنهم رجعوا للمراهقة.. هم رجعوا لما دون ذلك
×
أخذت اللغة على يد أمريكية..عاشت في أمريكا 10 سنوات من زواجها سنوات في السعودية..
لأنها متزوجة سعودي
تقول أنا توقعت السعودية بتسهل علي تربية عيالي لكن اكتشفت العكس
برى لما يشوفون غلط أقول لهم هم كفار ينبسطون شوي وآخرتها النار
بس إحنا مسلمين ننحرم شوي وبنتمتع فورإيفر في الجنة
تقول وكانوا مقتنعين والأمور تمام
أما هنا لما يسألوني عن أشياء غلط يشوفوها في الفيصلية
"والله كلامها نصا"
أتلعثم وما ألاقي حجة مقنعة طبعا هم يعرفون كيف يحاورون عيالهم ما تقول له إلا كلام مقنع ومنطقي شوفي مخ عيالهم ومخ عيالنا

نرجع لها تقول صرت أقول لهم

there are good muslims & bad muslims

×
فيه صرح رائع في عالم المنتديات اسمه مملكة المرأة
99% من مواضيعه عن المظاهروالشكل
هل عالم المرأة في قطعتين الملابس اللي تلبسها..
لا وكل مالها تتقلص هذي القطعتين
وين ثقافة المرأة؟ وين أساليب الحوار؟؟ وين القضايا الدينية اللي تخص المرآة؟؟
×
يا كثر ما نسمع
ماتوقعت الزواج كذا ؟
انصدمت بالحياة اليومية في الزواج؟
ما قدرت أفهم زوجي.....

عارفين ليه لأن منتدياتنا النسائية
ثقافتها

"بسررررعة بنات وين ألقى بانتي أحمر ..عشاني بألبس في الحفلة لوو ويست"

وإلا

"مين أفضل مركز ينظف لي البكيني بالليزر؟؟"

صارت البكيني منطقة عادي تطلع؟
تتقلبين على السرير بمنظر مقزز ومقرف.. وبدون ولا نقطة حياء؟؟
والله لو أمك اللي بتشيل لك بالليزر كان استحيتي
وين الحياء؟؟
مات؟؟
وإلا نخنقه عشان ما يسيطر على تصرفاتنا؟؟
وإلا اللي كان ماسك البنات شدة الأهالي؟؟ لما خفت شفنا الهوايل؟؟
وإلا الدين انحصر في صيام 30 يوم في السنة صلوات في اليوم بس؟

كلها 8 سنوات تفاجأت وانصدمت
وما أدري متى أقدر أستوعب هذي التغيرات
اللي أتمنى تتعدل للأفضل ولا أحتاج أستوعبها

أتمنى أنها تكون نزوة وقريب تتلاشى وتصير ذكرى أليمة في الماضي ونقول كنا وكان
أتمنى يصير الخطأ شيء عيب ما نتفاخر به ونعتبره مقياس على مدى حضارتنا

×

ليه صرنا نستحي من الدين ومن العادات
"أنا أتكلم عن العادات الصح مو المتخلفة"
تجي كوافيرا تقول لو ما عندك تحفظ على الإكستينشن أعمليها !
صارت المسألة تحفظ؟
صار اللعن أمر قابل للنقاش والتحفظ؟
صار الوصل ينصح به في المنتدى على مسمع من مايزيد عن خمس مية بنت
وياليت وحده ردت وقالت حراااام
من واقعنا الكوافيرات أغلبهم نصرانيات عقيدتها المسيح ابن الله
بس الشرهة علينا إحنا يا أمة لا إله إلا الله
لو ما كانت شايفة جرأتنا وتمردنا على الدين ما قالت كذا
هل كان التوصيل قبل عيني عينك يكتب في بروشور الصالون؟؟ جنب السشوار والتسريحة..

لو أقدم لك كريم وأقول لك لو ما عندك تحفظ على السرطان جربيه تراه يبيض
وش ردة فعلك؟
×
وحفلات التخرج وحفلات النجاح والدي جيهات والزواجات
كلها معازف وأنواع التفنن موسيقى وعود وأورج
وإلى آخر الليل وإلى الثلث الأخير.. وعادي ..
ما فيه اللي يقول للغلطان تراك تماديت بالغلط
آخر الليل إذا ربي تفضل علينا ونزل لسمانا الدنيا
هل من داعي؟ هل من مستغفر؟ هل من تائب؟
عذرا يا رب إحنا مشغولين مع محمد عبده وأحلام
دوروا الدنيا بكل أبعادها
هل فيه ملك ينزل لك كل ليلة ويقول لك " تبين شي؟ "
أتفه ملوك الدنيا تلقين عنده 10 سكرتارية وبينك وبينه 10 أبواب
والدخول عليه بموعد إن كان يتنزل يقابلك من الأساس
أعجبتني عبارة لداعية مصري قال:
" ربنا ينزل كل يوم ينادي حد عايز حاقة.. وإحنا مشغولين عنه.."
×
تجيك الوحدة تشتكي وقريتها هنا في المملكة
تقول ياربي أنا كنت أكلم واحد وحبيته
ولما تزوجت ما حبيت زوجي وتحملت قلة حبي له وبعد كذا اكتشفت إنه يكلم وحده وانهارت أعصابي
طيب.. وين الغريب في الموضوع
يعني قمة الخبث والخيانة
خنتي أهلك وربك وتبين واحد طاهر.. نظيف... قلبه عذري
مافي حياته إلا أنتي
وأنتي في حياتك عشرة قبله
عجب
!!!

×
هذا غير الصور الشخصية وعبارات وصورالتوقيعات اللي كلها إيحاءات سيئة وسخيفة
وفيديوهات التوقيعات هذي لها نصيب الأسد في السوء

إحنا أرقى من كذا
أبصم بالعشرة أن كل قارئات موضوعي هذا متعلمات.. جامعيات.. أو في طريقهم للجامعة
ليه أحط صورة فاتنة لو مر عليها ولد حركت غرايزة
لا تقولين هذا سيكشن خاص بالمرأة
أتوقع كلنا سعوديين وأعرف الناس بشبابنا
قولي هنا ريحة حرمة وشوفي ردة فعلهم

وحتى؟أغلب العضوات يكتبون في أقسام أخرى والتوقيع والصورة ثابتة
لا تقولين هو لو يبي يشوف شاف
ما عليك منه عنده رب يحاسبه..بس لا تكونين سبب
يجي الشخص يوم القيامة تعرض عليه أعماله السيئة
أنتي كذبتي
أنتي أظهرتي مفاتنك لرجل
أنتي أخرتي الصلاة في اليوم الفلاني
أنت..
أنت..
أنت زنيت
يقول يا ربي ما زنيت
يقول له لكنك ساعدت أحدهم على الزنا
وكان عليك مثل وزره
والآية صريحة وحمدلله إننا عرب نفهمها بدون مترجم:
" ليحملوا أوزارهم كاملة يوم القيامة ومن أوزار الذين يضلونهم بغير علم ألا ساء ما يزرون"

هذا إهداء للبنات اللي يدخـّـلون الشباب للأسواق في أيام العوايل لما يمنعهم السكيورتي
هو بيدخل ويرقم وتبدأ علاقة أنتي السبب فيها

وهذا إهداء للي تدل على مواقع سيئة

وهذا إهداء للي ترسل رقم واحد لزميلتها

الواحد يالله يستحمل ذنوبه.. يروح يشيل ذنوب الناس

والرسول صلى الله عليه وسلم يقول

"
أيما داع دعا إلى ضلالة فاتبع فإن عليه مثل أوزار من اتبعه من غير أن ينقص من أوزارهم شيء
وأيما داع دعا إلى هدى فاتبع فله مثل أجورهم من غير أن ينقص من أجورهم شيء

"
أخرجه مسلم
×
والموسيقى اللي صارت زي السلام عليكم
أصلا صارت هي التحية والافتتاحية في المواضيع
في المنتدى سيكشنات مخصصة للأغاني
!!
وكأن الأغاني عادي مثلها مثل تبادل الأخبار وأسعار الأسهم
أفتح مواضيع هنا في مملكة المرأة
إلا مقطع الصوت تلقائيا شغال أورج
يعني بالقوة؟
ما دخلت سيكشن الأغاني..بس برضو مضطرة أسمعها؟
وهذا تجاوز للحدود والحريات
والمفروض يكون أحد شروط كتابة المواضيع منع هذا الشيء
لو بأنزل طبخة في وسط موضوعي
قلتوا: خير؟ غلطانه الأخت في العنوان

وبالنسبة للبنات اللي ينزلون زفاتهم الموسيقية
كم وحدة مرت على الموضوع من الأعضاء وسمعتها
+
كم وحدة مرت على الموضوع من الزوار وسمعتها
+
كم وحدة بحثت في قوقل وطلع لها موضوعك
+
كم وحدة أعجبتها الزفة وحطتها في زواجها اللي بتحضره 400 مدعوة

وعداد المعاصي شغال في ظهرك
وياطول الحساب

×

زميلاتي في ثانوي لما شفتهم
من كثر ذهولي
صرت أشك في نفسي
يعني لو وحده تغيرت تزعلين ويضيق صدرك عليها
لكن لما 6 كلهم تغيروا
وش ردة فعلك إلا العجب

لا.. وأمر الحواجب هذا أمر عجيب
ما أدري هل نزلت بعدي فتوى جديدة بجواز النتف؟
نتف وتاتوو .. والضحكة شاقة فمها.. وكأن شيئا لم يكن
لو أقولها الله يلعنك بتزعل
لكن رب العالمين يمسـّـيها ويصبـّـحها على لعنة
إتز أوكي عندها

وإلا تجيك أم 14 سنة توها داخلة عالم النتف"عالم اللعن" أسفل حاجبها كله أخضر

فعلا.. صرنا على قول المصريين
نضحك على خيبتنا

×

أما حكاية العبايات هذي يعني من جد كارثة
أقابل ربي في الصلاة محجبة
وأقابل الشباب في السوق بالعيون اللي فيها كيلو مكياج والغرة المنسدلة
أي تناقض هذا؟
أي ديانة هذي؟
أي أخلاق؟
عبايات وإلا فساتين؟

القضية اجتاحت حتى الأمهات
حريم كبار والله الشعر اللي فوق أذنها بدى يغزوه الشيب وتقول لي
تعرفين غرز الكروشيه بأحطه في عبايتي
يعني خافي الله في هالشيبات
جده والله العظيم
وش بقيتي لبناتك المراهقات
إذا أنتي بتزينين عبايتك بورد كروشيه
ماألومهم لو طلعوا من غير عبايات

×

عشت في المجتمع الإماراتي حول سنة ونص
أحنا عارفين إن أهالينا محافظين أكثر منهم
وبلدنا محافظة أكثر
وموادنا الدينية في المدارس والجامعات أكثر

بس شوفوا حياتهم وتفكيرهم
كل بنت لها خطوط حمراء
هي حاطتها ومقتنعة فيها وفخورة بها
هناك المحجبة ترفع راسها بحجابها ومحد قدها
وعندنا هنا اللي عبايتها ساترة ناقص تدخل في الجدار من الحياء
تخاف يقولون عنها متخلفة
ياإنها مسوية كابوس هذي الكلمة للبنات
تذبح أمها وأبوها بس لا أحد يهمس بكلمة متخلفة
هناك تلقين البنت تقرأ كتب عليها القيمة
مثل
"ذا سيكرت - نساء من الزهرة- أسعد امرأة في العالم- سلسلة شوربة الدجاج..."
هنا تلقين في يدها رواية للهابطين اللي خسارة أكتب اسمهم هنا

×

نقطة إضافية..

البلوتوثات والهوايل اللي فيها
العين تزني وزناها النظر
لو أقول لك شوفي فيلم إباحي قلتي لا حرام
طيب وهذا
ليس إلا اقتباس لأقذر ما في الفيلم
!!
رسايل الجوال والنكت الجريئة
والله لو أقول لوحدة قولي الكلمة السوقية الشوارعية هذي بلسانك
قالت مستحيل بس لما تنكتب كرسالة جوال تصير كلمة عادية
لا ومضحكة بعد..تسمعين الضحكات الرنانة ..
ما أدري هل القذارة صارت تضحك؟؟
والله لو ولدك وإلا أخوك قالها
كان صرختي: عيب عليك ترى بأحرقك بالنار عشان تتأدب


×

قبل أي فعل تقدمين عليه
لا تحكمين إيمانك لأن يمكن إيمانك ضعيف في هذي الفترة أو يمكن لا سمح الله أنه ما فيه إيمان في هالفترة
إحنا عارفين عقيدتنا تقول الإيمان يزيد بالطاعات وينقص بالمعاصي
ولا تحكمين قلبك لأنه ممكن قلبك يكون قاسي في هالمرحلة

حكمي عقلك لأن العقل هو نفسه ما يتغير

قولي هل لو كنت مريضة لا سمح الله بأسوي هذا الشيء
إذا الجواب إيه
أقدمي معناها إنه حلال وخير ولا تستحين منه إذا قابلتي ربك
وإذا الجواب لا
معناها تراك تجاوزتي حد مع ربك..
وبيكسر هالشيء عينك أنك تقابلينه وأنتي مسويته..
أي عمل قولي هل لو سويته
بيكسر عيني مع ربي لو بأقول يارب اشفني وإلا يارب عطني
×
دعوة عملاقة أبعثها من هالمكان الراقي
حملة أتمنى نبدأها ونكون قدها ونوصلها ونسمعها الجميع

كفى .. استهتارا
كفى .. تراجعا
كفى .. تنازلا

قومنا حملة لا للكوافيرات الغاليات ونجحت
وقومنا حملة السعودية للسعوديين فقط ولقت صداها

شدوا الهمة وساعدوني
أثروا الموضوع بردودكم الهادفة

يا صاحبة الدين..أضيفي كلمة تشهد لك يوم القيامة..
مو الدين في غرفتك تصلين وتصومين وإذا شفتي الغلط غمضتي عيونك وسكتي عنه..
هذا اسمه شيطان أخرس

ياصاحبة العقل الرزين..أدلي بدلوك.. نورينا بآرائك الهدافة

ياصاحبة الثقافة..ساهمي في تثقيفنا

هذا اللي جرأ بنات الغلط على المجاهرة..وهو إن صوت أهل الدين والعقل والرزانة واطي
علوا أصواتكم خلونا نسمعها ونسمّـع غيرنا
×
نبي وحدة تكون شجاعة وسباقة للخير
أكتبي هنا أنا غيرت صورتي الشخصية أو توقيعي
يله عشان تشجعين غيرك ويحذو حذوك
وتأخذين أجره
×
نبي وحدة شجاعة نبيلة تقول أنا مسحت موسيقى كنت منزلتها في موضوعي
أو زفة نزلت€ها للبنات
×
نبي وحده شخصيتها قوية تقول أنا مسحت صور شهيرات هوليود من موضوعي لأن ملابسهم عارية
نقدر ننزل صور بتضليل خفيف يكسر جرأة الأفخاذ والصدور اللي طالعة

×

خلوا شعارنا
الرجوع عن الخطأ خير من التمادي فيه

×

حقوق الطبع غير محفوظة
أنشروا في المنتديات والمدونات والإيميلات
خلونا نرتقي بمجتمعنا
خلي لك بصمة في الحياة

×

يارب هذا أقل ما يمكن أسويه
بس أتمنى أنك تعذرني به
أنا وكل من خطت حروفها هنا إنكارا للواقع المرير
محاولة بسيطة للتصحيح.. تقبلها مننا يارب

×

لا تقولين المجتمع كبير ومتنوع وصعب أصلحه
المجتمع هو


أنا وأختي وأنتي واختك وهذي العضوة واختها وبنات خالاتنا وبنات عماتنا


والسلام عليكم


؛؛

آيميل وصلني وحبيت تشآركوني فيه !

آتمنىا آنو ينآل آعجآبكم !

مثل مآنـآل آعجآبي وبشده !

وآخيرـآ !

الله يكثر من آمثآلهآ !

ويجزآهآ آلـفردوس الآعـلىا !

 

 

 

 

[معلومات العضو دوسري متأمل]

موضوع رائع وكلمات تهز المشاعر،،،،،،
وهذا نداء للمجتمع بأكمله لعدم المبالغة بالمظاهر
على حساب الجوهر الحقيقي للانسان وهو العقل وتنميتة بالعلم والقراءة...
بارك فيك اختي العنود على هذا النقل الطيب واسأل الله ان يجزيك خير الجزاء

 

 

 

 

[معلومات العضو king]

اتمنى من الاداره او من مشرف القسم
الاهتماااام بهذا الموووضوع وتثبيته
اذا كنا فعلاً نحرص على المفيد
موضوع يهم طرفنا الاخر بدرجه كبيره جداً جداً
صحيح الموضوع طويل لكن للااامانه درس درس يستحق القراءه
وياليت يعدل الخط حتى يخف تصفح الصفحه لانه ثقيل

اعيد واكرر مشاهدات من واقع يجب ان يفكر بها لمن يهمه الامر
وعسى الله يصلحناا جميعا
وياليت يثبت الموضوع بعد تنسيقه
اما انتي يالعنووود فيكفيك هالنقل وهالاختياار وهذا يدل على وعي كبير
وموضوع عن الف بامااانه

تسلمين والله يجزاك الف خير
بس ترا المفروض تكتبين اشارات تحذيريه لانه يحتوي عباراات احم احم ههههههههههه

 

 

 

 

[معلومات العضو آلأرجــٌوآنْ]

نعيب زمآننآ والعيب فينآ ... ومآلزمآننآ عيبٌ سوآنآ
ونهجو ذا الزمان بغير ذنب ... ولو نطق الزمان لنا هجانا

.. .. .. ..

كلمات تبني صروحاً من عُمق ونُبل التعبير

وتضع حول محطات تاريخه الدوائر الحمراء..!

وبالفعل مواكبة العصر لا تعني ان يتخلى المرء عن اسسه ومباديه او يغير سلوكه مع كل عام جديد

ولكن التنشئه الديينه و التربيه هما الدور الاساسي في ظل انشغال الوالدين في مشاغلهم الدنيويه الا من رحم ربي ....!!

نسأل الله الهداية ويبقى هناك دوما عندنا بريقا من الامل فى غد أفضل ترجع فيه النفوس لصفائها

وتحيا فيه الضمائر الميته فما نراه الان حولنا اصبح فوق احتمالنا

والف شكر لك يالعنووود على نقل المقال القيم

تقبلي فائق تقديري

 

 

 

 

[معلومات العضو ابوهاجر الدوسري]

بارك الله فيكي أوخيتي الفاضله على النقل , , علماً أن فيه نقاط تحتاج إلا نقاش وتفصيل ونسأل الله أن يهدي شباب المسلمين إلى الحق ويردهم إليه رداً جميلا , , ,

 

 

 

 

[معلومات العضو خيالية]

الله يوفقك يالعنووود ويوفق هالبنت اللي انصدمت بالهواايييل اللي صدق اشغلت الجميع

مــــــــــــــــــوضوع يستحـــــــــــــــق التثبيــــــــــــــــت ،، بــــــــــورك فيــــــــــكِ ..

 

 

 

 

[معلومات العضو ناصر المطيري]

السلام عليكم
ياعطيك الف عافيه اختيــ على الموضوع

 

 

 

 

[معلومات العضو برنسيسه الريــــاض]

اااااااااااه يالقهر,, العاالم تزداااد رقي وتقدم \ ونحن للأسف نزدااد أنحطاط وتخلف وأي أنحطاط ؟؟؟؟,

وفعــــــــــــلا موضووع قمه في الروعه , ويستااهل التثبيت. والقراءه عده مراات لتعي القلوب الغافله ,,,

كل التحايا لك أختي العنود

دمتي في حفظ الرحمن

 

 

 

 

[معلومات العضو شيهانه بكف صقار]

السلام عليكم ورحمة الله وبركاته

اولا شكرا من الاعماق على الموضوع الواقعي البحتتت
بشتى صوره وموقفة واحييك على انتقائك له لتعم الفائدة بإذن الله على اخواتك المسلمات

<<ترى عانيت واجد على ماخلصة الخط ثقيل مره من امس وانا احاول اقراه ههه
بس يتساهل العنا والله

اما بعد ،، والله وانا اختك يؤسفنا جدا حال الامة وماوصلت اليه خاصة بمجتمعنا من مظاهر واسرااااف لامبرر له والنظر للغير <شوفي فلانه وش شريت لازم اجيب احسن منها
وشوفي علانة كيف زواجها لازم اكون احسن منها ؟
طيب وبعدين ...المشكلة ماهي في المجتمع ولا في الدولة المشكلة في الناس انفسهم
لو يتركون عنهم ها العادات اللئيمة والبغيظة والله يعيشون بخير وسلام
لكن المشتكى لله .. وفئة بسيطة بس الواعية و المدركة للامور الصحيحة وهي من رحم ربي

الله يهدي البنات الضالات ويرشدهم الى دين الحق والصواب ويبعدهم عن الرذائل والفتن ويغفر لهم ويهديهم ويحسن خاتمتهم

هذا ولا ارد الاطالة عليك لان الموضوع بالفعل لاتكفية صفحات النقاااش !!

تم والسلام عليكم ورحمة الله وبركاته

اكرر شكري على هذا الموضوع واتمنى تثبيته كرسالة لكل بنت (عودي الى الله)

احترامي~

 

 

 

 

[معلومات العضو ابومبخوت الدوسري]

موضوع جميل يعطيك العافية ولاهنتي على النقل تقبلي تحياتي ولاهنتي.

 

 

 

 

[معلومات العضو العنووود]

كـــــــــــــــــــــل الشكر لمن أضاء الموضوع بمرووره وتعليقه..




يسلمكم ربي علي المرووور العطر...