قصيدة الشاعر عبدالله الحقباني ورد الشاعر سلطان الصليبيخ البرازي ..

**معلومات** **العضو** · 26-11-2009, 09:11 PM

هذه قصيدة الشاعر عبدالله الحقباني الدوسري مسندها للصلابخه
من البرازات من قبيلة السهول..

يقول عبدالله الحقباني في قصيدته :

يالله يامرسـي الجبـال الشواميـخ=ياعالـمٍ سـر النفـوس وعـددهـا
يامرسـلٍ الطيـر مثـل الصواريـخ=يوم أبرهه خيرة جيوشـه حشدهـا
تعز دينك من هل الشـرك والسيـخ=وانّك تحـل احوالنـا مـن عقدهـا
من عقب ذا نوّخت أنا القاف تنويخ=أنتح مـن جـزال القوافـي جددهـا
يامرحبـا ياعنـوّتـي يالصليبـيـخ=أبوسعـد سلطـان مكـرم وفـدهـا
ومحمـدٍ ريـف الركـاب المداويـخ=النـادر اللـي لابغـاهـا وجـدهـا
ومناحـي أرّث لـه حـرارٍ مفاتيـخ=تعجبك لامـن جـات حـزّة هددهـا
ياجعـل شايبكـم ريـاضٍ مطاريـخ=في جنّة الفـردوس يطعـم شهدهـا
أسّس وأخوه فهيد بالوصـل تاريـخ=ياويش قرب الوالـده مـن ولدهـا
يامرحبـا فـي جمعكـم يالمشاييـخ=ترحيبـةٍ مـن خاطـري معتمدهـا
يالابـةٍ مذكـورةٍ فـي التـواريـخ=سهول ياجد طيبهـا مـن قصدهـا
سلام منّـي عـد نسـخ النواسيـخ=واعـداد مـادكّ السحايـب رعدهـا
ياأهـل الكـرم يامتعبيـن الطبابيـخ=وان جاء نهار الهوش تثبت عمدهـا
قلته وأنـا ربعـي قـرومٍ مطانيـخ=لاد العياضـي وافيـه فـي عهدهـا
من ساس تغلب من قديـمٍ رواسيـخ=دواسرٍ كسـب الثنـا مـن سعدهـا
نمّن قصير الدار ويشيـخ ويديـخ=ناسم عصـاه ونهملـه فـي بلدهـا
نقلط على الموت الحمر لا أدبر الكيخ=كم روح شيخٍ ننزعه مـن جسدهـا
واليوم في حكم السعـود المصاليـخ=في ظـل أبومتعـب ويدنـا بيدهـا
عبدالله اللي رصّخ العـدل ترصيـخ=قضى على الفتنه وهي فـي مهدهـا
صلاة ربّـي عـد رمـل التخاتيـخ=على النبي صلّوا عدد مـن سجدهـا

وهذا رد الشاعر / سلطان بن ناصر الصليبيخ البرازي

قال الصليبيخ كلمةٍ قافهـا شيـخ=تبحل بها الشعّـار تفتـل عقدهـا
من شاعرٍ مالطّخ القـاف تلطيـخ=الله يقدرنـي وأدبّــر سـددهـا
عبدالله اللي ينسخ القاف تنسيـخ=عشرين بيـتٍ كامـلاتٍ عددهـا
ترحيبةٍ ومرسّخ البيـت ترسيـخ=وهذي عليها ياولـد طـول يدهـا
لبّستها ياكامـل العـرف تجويـخ=وعطّرتها من رآسها الى جسدهـا
وعندي لها مثل الذهب له شماريخ=وان شفت فيها نقص يالقرم زدها
فعولنـا وفعولـكـم بالتـواريـخ=يوم الرضيمه والقبايـل شهدهـا
تشهد لنا العجمان ماهوب تسليـخ=وحتى الخفيّـف قالهـا ماجحدهـا
فـي هيّـةٍ مامثلهـا بالمناويـخ=كثرت جنايزها وطويـت عددهـا
ثلاثة أشهر عجّها لـه شراشيـخ=كسر الكسير وهاش بآخر طردهـا
فيها خشوم الخيل مثـل المنافيـخ=دميت حوافرهـا ووقّـف جهدهـا
راجت على الباشا مهارٍ مجاويـخ=وطويت خيامـه والمعـزّه فقدهـا
ويوم الأبيّض شيخنا طوّح الشيخ=ويوم الأبيّض كونه آمـر وأدهـى
البيض تنعى مطلق العيط طخطيخ=زيـزوم قـومٍ مايبطّـل عندهـا
شمّر هل الطولات زمل التخاتيـخ=زمل التخوت اللي كبيـرٍ سعدهـا
ويوم السبيّه والبيـارق طواريـخ=كم سربـةٍ حنّـا قلعنـا ضمدهـا
شبعت بها حدب النسور المفاريخ=بتاريـخ نجـد مثبتيـنٍ سندهـا
وخوالنا الحقبان يفداهـم الميـخ=مثل الحرار اللي ينومس هددهـا
حنّا لكـم مـادام باقـي صليبيـخ=وأنتم لنا مثل البيـوت وعمدهـا

والسلام عليكم ورحمة الله وبركاته