قصايد للشاعر بندر بن سرور العتيبي

[معلومات العضو ابو طارد]

ديوان الشاعر بندر بن سرور العتيبي

ومن قصائده الكثيرة ،،، نورد الآتي:

قصيدة : الله من عين لبندر بن سرور

اللــه مــن عيــن تزايــد تلــفــها=بـيَــن كــدها بالعــروق السـخيـفــه
كــم واحــدٍ لــه حــاجـةٍ مـاصرفها=يـصــد عن صـرافــها لايضيــــفــه
يخــاف لايقــضب نــديـــم طــرفها=قـلبــه صـدأ وأطـــراف جسـمه نظـيفه
لــو كـان مـاهـا مايـلـيَـن ليــفــها=سـيَـل بـها القــتــات وادي حنيــفـه
واللـه خـلق بيــد الـذلول وعســـفـها=للـي يـبي المنــهاج مــثـل القــطيفــه
والفـضـل للـي مـدها مــا قصــفــها=وأنـهـج من الــدار المحيــلـه للمــريفه
وانصحــك ياللي غــرتــه مــاعرفــها=شيــبٍ تشـيــب مـا يحـــول رديفــه
رديفــها يركـض ويــركـــز هــدفها=وقــتٍ يـقــص العـظم من حــدَ سيفـه
وجـت بك الـدنـيا وجـــابك صــدفـها=لاتـعـتـز بأهـل النفــــوس الضعيــفـه
أنصـحــك نفســك لاتســقــط شرفها=تـرى بعـض بيـض المجــالس أمجيفـه

قصيـدة : أمـعالكــات الشكايـم لبندر بن سرور

يالله يــاجــالِ الامــور العــظايــــم=نســألــك الجنــه وتثـبيــت الأقــدام
يابـن مــلافــخ خــل عنـك الظـلايـم=مــن يظــلم الاجــواد يـظلــم وينـظام
ذوي عطـــيـه يـاردي العــزايـــــم=هـــل المــهار اللي عـلى المــوت عـزَام
على ظهـــور أمـعالكــــات الشـكايـم=كــم سربــةٍ خــلو مراضيــعهـا ايتـام
اليــا جــرها قشعــان والحـظ قــايـم=يشـبــع بهــا طيــرٍ اليــا مـالقى حـام
وبخــيـــت عنـد التـوم جـا لـه زحـايم=في مـاقـفٍ يالـلاش مـافــيــه رحَـــام
هـذي فعــولـك تـجحــد الطيب دايــم=وعـلى حمـارٍ لـك بـمـغـزاز وخــطـام
جـدك دنـيـَس يـا لعيـــن الـرســايـم=جــابـوه مـن مكــه ملــيـس ولحــام
غـشـيـتــوا العـالم بلبــس العمـايــم=والبـاســكم مـن لبـس زيــنات الاوشـام
عـز الله أنـك يابــرق الـريــش هــايـم=كنـك صــدوقٍ وانـــت تضـرب بالاوهام

قصـيدة : أهل الونـيــت لبندر بن سرور

يأهــل الونـيـــت اللي تزايـد عويـلــه=مكينتـــه ذيــب النصـارى شغلـهـــا
حــده وقود النـار وأبعــد مقيـــــلـه=شاقـــه بعيــد العيـــن وادنـى جبلـها
إليـــا لفـيـــت العيـن اخـذ لك دليلـه=لاتبــدي الشكــوى على غيــر أهلـــها
وأحــذر يغــرك من بســط لك شليلـــه=كم واحــدٍ يبـي العــلا مـــاوصلــها
علـيــك باللـي بالقـسى ينعـني لــــه=اللي ليـا قــاد السفيــنـه عـــدلــها
السـالميـــن اللي خطــاهم طــويــلـه=وسعيــد زيـزوم البــلاوي فحـــلـهـا
قـــل حـاجتـي يـابو مبارك ثقيـــــله=ما كــل رجلٍ ينتــخي لـي حمــــلهـا
وابــغــاك تــدركهــا بحــالٍ وحيلـه=عســاك تـاجــد عند ربــك بـدلـــها
و لا تـرى الدنـيا قــريــبٍ رحــيــله=كــلٍ تـبي نفــســـه تلاقــي عمـلها

قصيــدة : بحـر تسـعيـن لبندر بن سرور

يـارب انـا لـي حــاجــةٍ صـكة القـوع=بـقـصى بحــر تسـعيـن صكــة نـحـرها
أصـعـب على المخـلـوق من عضـة الكـوع=ولا على الخـالق بســـيــطٍ بــحــرها
كـم واحـدٍ جــت لــه بسـاتيـن وأزروع=تــراه مـايـدري مــن اللـي بــذرهــا
أبن الـلـئـيم أمـشـارك الـكلـب بطبـوع=عــيـنـه على حــرمـة قصــيره دورهـا
مـادارهــا خــوف علـيـها مـن الجـوع=خــوف تفــوتـه غـــرةٍ مــاسـبـرها

قصيــدة : ثقـيـل التـرس لبندر بن سرور

اللـه عـلى اللي يــوم يفــتل عمــــوده=يطـلع ثـرى ارضٍ بعَــد القـيـض مــاهـا
ليــونـس ثقـيل التـرس يرخـي عضــوده=شـيـهـانـةٍ تــرخ المــتــون العشاهـا
عَـده عـلى اللي مــا يـدرهــم قعــوده=مــن صــار زيـزوم المـشاكـل حمــاهـا
ثـم قــل لابن دهــره يـحضـر شهــوده=للـرفـقــه اللـي بـاعـها مـا شـراهــا
وقــتٍ ركــض كلـبـه ونـامت فهــوده=مـمـا تشــوف العيـن طــوَل عـمـاهـا
المــال ســالم والـوجيــه أمـعـبــوده=بـرق التـيـــوس اللـي تـوامــا لحـاها
راعـي صـلاة الفـرض بـيَــن سجـــوده=وراعـي غــرابيــل النـمايــم لـقــاها

قصــيدة : خـطـو الـولد لبندر بن سرور

اللـه من عيــنٍ لـيا عـسـعـس اللـيــل=عـافــت لـذيــذ الـنـوم مـاتـهـتني به
يـاويـن أبـلقـى مـن يحــب الـتـعـاليل=يـبـدي بـزيـن القــول ولا ابـتـدي بـه
خـطـو الـولد يـامـال قصـف الـتمـاهيل=يـشــرح عيــوب النـاس مـاشاف عيـبـه
يفـرح لـيـا شـاف المــجالس هــراميـل=يــكـره لـيـا شـاف الـمـجالس أمـنيبـه
مـاشـوقــنـه طيـبـات الـتـمـاثــيل=مــع شـايـبٍ قــد بـيَـن الـوقت شيبـه
مـاهـوب شـايب ، شيـبـنَـه غــرابيــل=عـيـدٍ يـقـفـي بــه وعـيـدٍ يـجيــبه
أنـا الذي شـفـت الـــوزا يـاسـماعيـل=طـاوعــت نـفـسي لـيـن شـفت الغليبـه
النـفـس طـير والـخـطايـا محــابيـــل=والنــاس روَاي الحـــديــث أتـحـكيبـه

قصيدة : دواليـــب الــدهر لبندر بن سرور

يالله يـاجــال الامـور المهمــــــــه=تجلا وهـج قلب بـرا حـال راعيــــــه
البـر دجـتــه والبحـر رحـت يـمــــه=اسعـى ورى رزق عســى اللـه يهـيـــه
يــوم ان ولــد اللاش رزقـه على أمـــه=رزقــي على اللي ميـــت القشـع يحيـيـه
يــامل قـلــب كــل مـا مـات همـــه=دارت دواليــــب الدهــر ليـن تحـيـيـه
فـرَاق شــمـل النـاس عيَــا يلـمَـــه=وقــتٍ يشــيـب الرأس من شـايـةٍ فـيـه
أحــدٍ يــنام وحـط رأســــه بكمـــه=وأحـدٍ يخـــم النـوم عيــنـه وتخـطيـه
أحـدٍ يحـاول بالــردا بنـــــت عـمه=وأحـدٍ يحاول سـتـر عـذراء عـوانيــه
مـانـي وأنا بنـدر ببيــاع دمــــــه=يقطعـــك يا بيــاع دمـه ومهـفـيـه
الـلي يبـيــع لابـســـات الأزمــــه=ثـورٍ يــبا بيــض الرعـابيـب تغـنـيـه
يـزعـل ليا جــــت ليلــة الـدور يمـه=يرضـى بسـوق المـال فخـره وفـــا بيـه
خطــو البخــيـل اللـي يكبــــر معمـه=يقـرأ الكتــاب وواجـــب اللــه يخـليـه
امـــا هـــرج لـك في رفيقــه بنمــه=ولا عــطا وأمـــــه أتضيـع هقـاويـه
أنشـــدك ياللـي كــل فـرض تـتـمـه=تقـرأ الكــتاب وكل فـرض تصــليـــه
ويـش القليـب اللــي غميـــق مجمــه=مـا فـاد غـرسـه مـاه عـطـش سوانيـه
تخــالف الانظــار شـــرق ويمـــه=وكـل هـدف رآيـه مـن النـاس مرضيـه
ســمَ الســبب ياعـــارفٍ عنـه سـمـه=ســمَ الســبب ياعــارفـه قبــل أسمـه

قصيــدة : ذبـاحة الـتـيس لبندر بن سرور

يـاعنـك ماتشفيــك ذبـاحـة الـتيـــس=ربــع السـلق مـادام حـمـلـك خفيـفـي
وأخــيـر من هـاك الوجيــه المــفـاليس=البــعـد عــن معـروفهـم لــو تضيـفي
يلـحقــك منهـم بعـض الايـام تنـجـيس=ثــوب النـجـس لـو كان ثـوبك نـظيـفي
مـالي ومـال أمجـالســة كــل بـليــس=سـلقـان نـجــد اللي وحيــها صـليـفي

قصيــدة : مخرجيــن الطوابير لبندر بن سرور

يابـدر ابن سلطان مايــبـــرد الجـــاش=الاَ نــهارٍ فيــــه للجـــــر تشهيـر
يفـرح بــه الطـيــب ويكره بـه الــلاش=ويقـــوم عجـــه من قــرى عنـز للنـير
يغـلـق مجــال مربطــة خضـر الاجـحاش=ويفــتح مجــال مخــرجيـــن الطوابيـر
يـزيــغ بـه قلــب المنـافــق وينـحاش=ويصــبر به المـؤمـن ويـرضى المـقـادير
ماقـصــدنا يابــدر في نــجد نعـتــاش=الـرزق عنــد مـدبــر الخـلق تـدبـيـر
أبـغي الذي بيــن المضـيـع وعــكـاش=روقيـــةٍ تـزهى يــديـــها الخـواصير
تتــبع لهــا نمــرأ له المـوت رشـراش=حـتى تــعـاف أمـقطـعيــن المسامـيـر

قصــيدة : مـشــتل البـيب لبندر بن سرور

ياهـل الــونــيت اللي يـبا مـشتل البـيب=مــادق صــدره بالخــطوط الغــزيــره
يـــوم ايــتـخـثع في محــير الاداعـيب=يـشـتي تخـثـع جــادل فـي حــريــره
لاتــجـربـونـه مـايـبا الفـرت تـجريب=قــد جــربه فالبيــت الابيـــض خبـيره
عــدَوه لابـن حـزام سيـــد اللــواعيب=لـعاب زيــنات البـيـــوت العـســيره
ثـم قــل قـاعــد مـانـبي مـنـه تدريب=الوقـت درَبـنـا على كــــل ســيــره
لـو كــل مـــن قـاد السبب يعلم الغيـب=يـامـا كــرهـت النـفـس مـن باب خيره
ان قـفـت الايـام مـاهـا مــغـاريـــب=والـيـا اقـبلـت يـازيــن صـافي غــديره

قصـيـدة : يـامـنيــر لبندر بن سرور ( وتعتبر هذه القصيدة الممنوعة اقوى قصيدة سياسية لبندر )

يـامنـير دوك الفــرت وأخـذ الفـــواتيـر=أفحــص عليــه ودخــله بالـكـراجــي
اللي يـبا بـنــزين ركــب مـــواصــير=واللي تـبـيـه النـار ركـــب بـــواجي
والـيـا أستعـد وصخـر البعـد تصــخــير=تصخيـر شيـهـانٍ لفــرخ الـــزراجــي
عَــده على اللي مـايعــد المــخــاسـير=ركــاز عمـــدان الخــشــب للـنعاجي
ثـم قــل لبــو بـنــدر ترى وقـتـنا غير=تبـدلـت سحــب المــطر بالعـــجـاجي
قـومــه أعتـيبـه شـيوخهــم ..........=لايـدعي بشــيوخ شــيــوخ الخــراجي
يـبكــي أســيوفٍ سـمــرة نجـد تسمير=تسمــير عــود العـاج في عـــود سـاجي
حـدن ابن هــادي محـمــد ورى النــيـر=والفـــرم محســن عقـبنــه اســواجـي
ربــعٍ رســو بيـــن الحـفيفيــن يامـنير=ماسـلـمــوا لـمــدور الـباج بــاجـي
واليــوم نـاطـا نــجد مثـل الـمــداويـــر=نـقـضِ اللزوم ومـسـرعيــن الـهـجاجي
رحـنا نـدوج وأنـتـسـمى مـنـاصـــير=نـمـشي على الـبــيـداء بـليـا مــزاجي
ويـوم أن نـجد إلـنـا بـوســطـه مسايـير=والــيوم نــجد لشــيوخ روق .............
ومتى يجـي في نــجد حـســن الـتـدابـير=مـتى يـجي للصـابـريــن أنــفــراجـي
عقـــبــان نــجد مصخـرة الطــوابير=ينــثـر لهـــم الحـــب مــثل الدجاجي

مــنـــقـــول.... وسلامتكم ،،،

 

 

 

 

[معلومات العضو الواضح]

مشكور أخوي / أبوطارد


على النقول المتميزه من تميز ناقلها

 

 

 

 

[معلومات العضو المسعري]

حقيقه يابن طاردمايكفي الشكر فقط على نقل هالقصايد لشاعر يعتبر من الشعرا القلايل اللذين قل ان تجد مثلهم في الساحه من ناحية الجراءه وقوة القصيده وجزالة المعنى وقد قيل عنه انه آخر الشعرا (الصعاليك)
فلك مني جزيل الشكرولاحترام

 

 

 

 

[معلومات العضو مهجد]

أبو طارد

لاهنت على النقل المميز الي تستحق الشكر عليه

والله يرحم الشاعر بندر ابن سرور