محمد بن باني

[معلومات العضو شافي القويسي المخاريم]

بسم الله الرحمن الرحيم









ديوان الشاعر محمد بن باني المخاريم

 

 

 

 

[معلومات العضو شافي القويسي المخاريم]

باسم من بامره تهب الذاريات = الاله اللي يعلم الخافيات
ربنا جلا وعلافرد صمد= فارض الاركان خمس كاملات
مخرج ذا النون من وسط البحور= ناصر اهل الدين ومذل الطغات
ربنا اللي باعث طه رسول = بلغه قوله بايات بينات
ابتدي نظم القوافي والقصيد = من هجوس في لزومي حاضرات
مستعد اتن اليا جات اللزوم = ما تجيب الا الجزال الوافيات
تترك الواطي وللعلياء تشوم = بالعلوم الطيبة مسترسلات
واتخير في نوادر كل زين = واهرج بالصدق والعلم الثبات
والمثل قد قال في ماضي السنين= وافهمو يا اهل القلوب الغافلات
كل قوم مالهم مجد قديم = ما يسجل في السنين التاليات
واحمد الله مجد ربعي من زمان = ثابت مثل الجبال الراسيات
ما أهرج غير الحقيقة والصحيح = في مديح أهل السلوم المعجزات
الدواسر لابتي نعم الرجال = بالكرم يوم السنين المعسرات
عن كرمهم بينة قصة جريس = اليماني بالسنين الماضيات
والهلالي هو وربعه يوم ضاف = عند ابن بدران راعى الطايلات
ضيفه خمسه وتسعين عداد =من كبار الابل وشاهدها الروات
في الكرم جبنا قليل من كثير = ومعجزات فعول ربعي باقيات
استمعها بالتسلسل يافطين = خل قلبك والأذاني صاغيات
ورعنا اللي ذابح ورع القصير = نذبحه فوقه ولا احسن من الذكات
ويوم اخونا في خوي الدرب خان = ذابحينه عقب ما سقنا الديات
وجارنا ندفع ديته من الجدار = مكرمه ماهو بحكم من القضات
كل هذي للوداعين القروم = بالتوارخ القدام مسطرات
وموتر للشمري علم صحيح = يوم وقف في ديار موحشات
فككوه وحملوه ابناء الرجال = فوق ست من الماتر جاهزات
ثم شالوا حملته زود عليه = والمدافع قاصفه والطايرات
خبرة سنوا لهم سلم جميل = اعتلوا بالمجد روس النايفات
من ودعين وصخابره عزاز = وشكره يثنون عند الجاذيات
والخوي اللي بوسط البير طاح = وانكسر ساقه واماله ضايعات
الخوي اللي معه منا وكاد = دوسري له فعول ساميات
المعيلي للكريم من الكرام = من مصارير يضدون العدات
يوم قلة حيلته ذكا الذلول = وجلدها حطه حبال مبرمات
والتزم بالحبل ثم حول عليه = واخرجه والله اراد له النجات
وسلمنا يحكم علينا ما نبيع = اللحم والماء مع كل الجهات
لو نبيع الماء مع كل اللحوم = جاء علينا من كبار العايبات
والخوي والجار ناسم له عصاه = تمنه وسط الديار الخاليات
ذي عوايد لابتي سقم الحريب = اسسوها من سنين ماضيات
ومن عوايدهم ليا جات الحروب = اليا تعلو فوق قب مكرمات
موريات القدح في صلب الحيود = فوقها اللي ينطحون النايبات
يذبحون الشيخ واللي له نديد =بالبنادق والسيوف المرهفات
في ضحا الهيجا تطيعن الرقاب = لهجمنا والسيوف مجردات
لحربنا نودع الكافر يتوب = نضرب الميدان وتطيع العصات
في زمان الجهل جعله مايعود = الدواسر هم مزبنت الجنات
من تحداهم بساحات القتال = قالوا انا كالجبال الشامخات
مايزعزعنا صياح ولا نذير = ننطح البارود ونصد الرمات
نرد حوض الموت مانبغا الحياة = لاتجلا الستر عن بيض البنات
وان زبنا مجرم جرمه كبير = يامن ويرتاح في نومه سبات
يوم جانا اللي مجنية الشريف = يزهم و غيضه تطيق به اللهات
عقب خوفه عندنا حط الرحال = في حما اللي ينطحون المعظلات
واحتما الميدان واشتد القتال = وارتكينا للجموع القادمات
للجيوش اللي مدافعها ثقال = ونحسبهم بالألوف وبالمئات
ثم صرمناهم كما صرم الزروع = وأقفوا الحيين واللي مات مات
والقبايل في الجزيرة من قديم = بينهم كل الحرايب حاميات
لين وحدنا الملك عبد العزيز = ولملم شملنا عقب الشتات
نصرت العاجز ولطام العنيد = والضواري تحت حكمه طايعات
ونحمد الله صار عقب الخوف امان=وحل وقت العلم والا الجهل فات
تمت وصلو على سيد الأنام =عد ما ترعد مزون ممطرات

 

 

 

 

[معلومات العضو شافي القويسي المخاريم]

باسم ربٍ كون آدم بخلقـه مـن عـدم=ربنـا جـل جلالـه تعلـى فـي سمـاه
ومخرجٍ صافي اللبن بين لحم وبيـن دم=الألـه اللـي يرانـا وحنـا مـا نـراه
ناصر أهل الدين ومـذل عبـاد الصنـم=ما رجينا إلا ثوابـه ولا نرجـي سـواه
أتخير جـزل الأمثـل وأنضمهـا نضـم=والقصيد أكره نزولـه وعلـى مستـواه
ساس بيت الشعر لامن بنيته ما أنهـدم=عقب اللي لا بنا البيت مـا ثبـت بنـاه
عقب جانا داعي الحفـل سيـرت القـدم=لا دعانـا داعـي العـز لبينـا نــداه
من ربوع بـلادي الغاليـة دار الحـرم=ومهبط الوحي الإلهي وهي دار الدعـاه
وقبلة أهل الدين من حدهم عرب وعجـم=غير مكـه للمصليـن مـا فيـه اتجـاه
دارنـا دار الكـرم والشهامـة والشيـم=والشجاعة ساعة الحرب لا دارت رحـاه
ديرة اللـي رفـع رايـة الديـن وحكـم=بالعداله لين كـل علـى حكمـه لاضـاه
وان ذكرت اسمه تقول العرب نعم ونعـم=(الملك عبدالله) الشهـم داهيـة الدهـاه
ليث غاب كل ما كشـر النـاب وهجـم=أصبحت كل الضواري تنافر مـن حمـاه
اخو نوره مروي السيف من دم الخصـم=ما يوقع سيفه إلا علـى روس الطغـاه
جيت من داره مسيّر لدار أهـل الكـرم=الكويت إللي بكـل الوفـا يظهـر نبـاه
طيـب حكامـه يتعـب لسانـي والقلـم=الصباح اخوان مريـم موطيـن العصـاه
والغرض من جيتي فـي بلدهـم مغتنـم=حلفةٍ باسـم الدواسـر مذليـن العـداه
العدا مثـل الجبـل والدواسـر كالنجـم=لا تنزل فوق راس الجبل كسـر حصـاه
لابة نهـزم جمـوع العـدا مـا ننهـزم=كل سيف من كبود العدا نـروي ضمـاه
روسنا بالعز تطلـع علـى روس القمـم=ما نوطى روسنا غير لله فـي الصـلاه
وخصمنا اللي يرفع الراس ويزوم الخشم=ندّبه حتـى يبـدل هديـره فـي رغـاه
بالسيوف اللي مضاربها تشظـي العظـم=كونهـا يعجـز لاطبـا ولا يلقـى دواه
وإن تضايـق خايـفٍ بالجريمـة متهـم=يزبن احمانا وحنا مـن أسبـاب النجـاه
يستريح ليا زبن عندنـا مـن كـل هـم=في حمانـا وامـن مـا يفكـر بغرمـاه
نمّنـه ونقـول لـه كبـر وسـادك نـم=وإن بغى ينزل لحاله وسمنا لـه عصـاه
والفقير ليـا نصانـا قسمنـا لـه قسـم=في الحلال وصار من عقب فقره في غناه
وكم سجين طال سجنه وبالقتـل انحكـم=ننقذه بالمال ونفـرح اللـي فـي رجـاه
والخوي في جمّة البير يـوم إنـه زهـم=قال تكفى يا (الحبيبي) نبي منك النجـاه
قال همك ينجلـي يـا خويـي واحتـزم=احتزم بي وابشر ان قالـه الله بالحيـاه
ثم نوّخ بكرته مـا نثنـى فيـه العـزم=ثم ذكاهـا ومـن جلدهـا سـوا رشـاه
ثم حوّل طير شلوى وقـال الـه ألتـزم=وأظهره ما يبغي ألا من المولـى جـزاه
وقد ودينا الجار من جدرنا يـوم انهـدم=ولا خبر في الناس من قبلنـا حـى وداه
وإن غزانا غازيٍ ما لقـى غيـر النـدم=ينثنـي منـا بغلـه ودينـه مـا قضـاه
مثل ما جانا الشريف إبن هاشم محتـدم=طلب إبن مطـرف ليـن هدينـا هـواه
قال أنا اللي قبل ما نثر دماه أعما وأصم=لين وقف فـي نحانـا وداوينـا عمـاه
ما درى إنا مثل بحر ليـا هـاج التطـم=تصفق أمواجه ولا يشرب الظميان مـاه
والقبايـل مثلنـا حقهـم مـا ينهضـم=كل منهم في المواجيب ما يلحـق مـداه
تمت وصلوا على المصطفى سيد الأمـم=عد من هلل وكبر ومـن سـاق الزكـاه

 

 

 

 

[معلومات العضو شافي القويسي المخاريم]

بادي ٍ بسم الإله اللـي بسَـط الارض وءوَضعهـا=ورافـع ٍ سبـع ٍ شـدادٍ تحـت حُكمـه واقتـداره
ربنا اللـي فـارض الأركـان للنـاس وشرَعهـا=جلّ شانه جـلّ شانـه مـجءري الليـل ونهـاره
بعءدها عنـدي نصيحـه للشبـاب اللـي سمعهـا=ينتبـه لا سمءعَهـا والحُـرّ تكفـيـه الإشــاره
يا ولد واصل بدرب العـز والشبءهـات دَعهـا=عز نفسك يا ولد لنء كـان فـي راسـك نعـاره
إعءصها في المعصيه وإنء كان في الطاعات طعها=طاعة المعبـود خـلاق البشـر سـاس التجـاره
انتبـه مسيـرة اللـي هـان نفسـه مـا رفعهـا=هان نفسه ليـن عنـد اهـل الوفـا قـلّ إعتبـاره
طاوَعَ النفس الخبيثـه فـي هواهـا مـا ردَعهـا=لين صارت حالته نقءص وحياتـه فـي خسـاره
شـاف سِيـرات الدشيـر أهءل الدناعـه واتّبعهـا=اتّبـع نـاس ٍ عـن المنقـود مـا فيهـم غـيـاره
الأمـور اللـي تخالـف شيمـة النـاس ابتدَعهـا=لين طاحت شيمته بيـن العـرب وأنهـى وقـاره
والأمـور اللـي تنقّـص قيمـة الطيّـب جمعهـا=يلبس الثـوب المخصّـر والسلاسـل فـي زراره
ولَبءس حذيان الكعَب وايضاً بعَد مَعءهـا ومعهـا=والأظافر طول ( سنتي ) والخواتـم فـي يسـاره
وحَط لـه قَصَّـه علـى وجهـه وباقيهـا قطعهـا=وقال قَصَّة ( مايكل ) يا ناس لـي فيهـا افتخـاره
والفخر بيـن الرجـال اللـي ينومـس مجتمعهـا=الرجـال اللـي جـدار المرجلـه زادوا جـداره
أنصحك يا اللـي دروب العـز ترقـى مرتفعهـا=أنصحـك لله فـي سـرّ الكـلام وفـي جَهـاره
اشءر عِشرة كل قـرءم وعشـرة الأنـذال بعهـا=رافق الطيّـب بدرءبـه والـردِي ..جعلـه وداره
سمءعة الرجّال بيـن العالـم ادنـى مـا طبَعهـا=ما يفيده لا انطبـع عِرءضـه ولـو كثّـر عـذاره
بُدّ ما يجني محاصيـل الـزروع اللـي زرعهـا=من زرع له زرع في طِيب وردى يجنـي ثمـاره
والحبـوب المهلـكـه لا لا تـحـاول تبتلعـهـا=السمـوم اللـي تَناولهـا تسبّـب فــي دمــاره
لا تقـول إنـي بجرّبـهـا وبعـديـن امتنعـهـا=أنت رجءل وتعءرف النيران تالـع مـن شـراره
الحبـوب اللـي تناولهـا يَبـي يُونـس وجعهـا=سرَطان ٍ سايـر ٍ فـي داخـل الجسـم انتشـاره
الله لا ينجـي مـن النيـران صنّـاع ٍ صنعـهـا=وجعءل يمنى اللي يروّجها لنـا تعطـى الجبـاره
لعءن ابوها مخدّرات ولعءن ابـو نفـسٍ جزعهـا=مـا يرفّعءهـا عـن دروب المذلـه والصَغـاره
تمّـت وصلـوا علـى اللـي سَـن سُنَّـه نتّبعهـا=الرسول اللـي مشـى بالحـق ونسِيـر بمسـاره

 

 

 

 

[معلومات العضو شافي القويسي المخاريم]

يابوش مااسمك بوش اسمك كحيلان=البوش والله والتخاذل عربنا
عزمت أولف لي من الشعر قيفـان=من جوهر الشعـر إنتقينـا وجبنـا
وليا قصدنا نقول صـحٍ وبرهـان=وليا رمينا روس الأهـداف صبنـا
قول بن مزعل شب بالقلب نيـران=وعزالله إنـه فـي كلامـه شذبنـا
عضو الفشل علمه لكل الملا بـان=وحنَـا سمعنـا غلطتـه وإغتربنـا
خبـل(ن) يثـور بندقـه دون نيشـان=اللي مـدح بـوش(ن) وحنَـا لسبنـا
طلال مدحك بوش ظيعه ونقصـان=ياليت منته مـن فصايـل عربنـا
ماتمدح آل سعود ذربيـن الأيمـان=اللي لهم فـي قمـة المجـد مبنـا
نسيت وقفات الفهد ياابـن عثمـان=يـوم إعتزينـا دونكـم وإنتدبنـا
وأنته بأشيقر ياأبن عثمـان سكَـان=تبكـي وحنَـا للصعـاب إنتصبنـا
يامـا وقفنـا وقفـةٍ شانهـا شـان=وياما على راس المعادي ضربنـا
وياما خسرنـا بالمياديـن شجعـان=وياما خسرنا المـال وأنتـم سببنـا
جيتو لنا بقلوبكـم خـف وإجنـان=نسمع صدى صرخة نداكم وأجبنـا
قمنا بعزم وجزم وإخلاص وإيمـان=وبعروة الديـن الحنيـف إقتضبنـا
يوم إختلط نـار وقذايـف ودخـان=خضنا الحروب الطاحنه مآإرتهبنـا
خضنا المعارك يوم زوغات الأذهان=ونزبَـن اللـي هـاربٍ ماهربنـا
يوم الفهد درعٍ حصيـن(ن) للأوطـان=وجاب التحالف كلهـا فـي طلبنـا
عنكم رفعنا ظلـم ظالـم وطغيـان=وقمنا بوجـه الطاغيـه مآأنسحبنـا
وجازيتو المعروف صدَه ونكـران=ماكنَنـا معكـم وفيـنـا وطبـنـا
من ينكر المعروف والفضل حيوان=برتـوْ وللـي بـايـر(ن) ماحسبـنـا
لولا الله ثم الفهد مانفعوك المريكـان=جاك العـراق وزوَد الغبـن غبنـا
هذا الفهد رجل المواقـف بليهـان=اللي يشيـل حمولنـا لـو تعبنـا
ابن الزعيم اللي قطع راس عجلان=وعز البـلاد وذل منهـو حربنـا
ويعيش عبدالله لنا طيـر حـوران=من هيبته جـض العـدو ماقربنـا
لاهان عبـدالله ولاهـان سلطـان=زحول الرجال اللي تفـرج إكربنـا
حنـا سعودييـن بالفعـل شجعـان=نصفي مع الصافي وسـمٍ غضبنـا
وحنا سعوديين لـو كـان ماكـان=بالمعركه نكسـب ولاأحـد(ن) كسبنـا
وحنا الرجال أهل الوفاء سر وإعلان=وحنا الرجال اللي عريـب(ن) نسبنـا
وليا تلاقى الجمع في كـل ميـدان=نشب نار وروس الأعـداء حطبنـا

 

 

 

 

[معلومات العضو شافي القويسي المخاريم]

شاقني فعل الدواسر متيهـة الغريـب=لابـةٍ تاصـل الكـايـدة بعزومـهـا
صاح ابن عواد فيهم وعيّن له مجيب=غاليٍ ذكره والارقاب غـالٍ سومهـا
يوم جا ينقل صوابه من الدنيا صويب=والليال السود ترخي عليـه كمومهـا
قايمٍ في الدم والدم موضوعٍ صعيـب=ناشفٍ ريقه ونفسه تزيـد همومهـا
ماوراه إلا أملحٍ يبتر العظم الصليـب=والخصوم النايبة ما تحن خصومهـا
انتخى: يالابتي يا منزحـة الحريـب=وادركوا عشرين مليون ثاني يومهـا
موقفٍ غصاب يخلص طليبٍ من طليب=صدق ياطيب الدواسر وطيب سلومها
يكتب التاريخ وتجف محبرة الاديـب=ولو تجف المحبرة والقلـم مالومهـا
والله لاني ولْد عمه ولاني له قريـب=مير وقفات النشاما تجيـك علومهـا
دون نقصٍ فالقبايل بلاشـكٍ وريـب=القبايل ماحدن يقدر يغـط سهومهـا
كل قومٍ لهم فالمرجلة قسم ونصيـب=وانا من قومٍ خيار القسـوم قسومهـا

شاقني ذيب على العز طوح بالقنيب=وعتلى بالطيبه في طويل رجومها
مايرافق للذياب الضواري غير ذيب=ايعشقها والامور الصعاب يرومها
عشت يامرزوق لعل شمسك ماتغيب=يالشجاع اللي بحور الجزال تعومها
مادح(ن) قوم(ن) لصوت المنادي تستجيب=لازهم زهامها مأهتنت في نومها
الدواسر لابتي لاحصل يوم(ن) عصيب=من فعايلها تحقق جميع حلومها
اقبلو من كل فج(ن) كما السيل الجذيب=كل قوم(ن) قادها للوعدزيزومها
وانقذو بأمر الله اللي على خلقه رقيب=نفس مسجون(ن) من السيف كان يهومها
موقف(ن) من لا فزعبه يصب إله السريب=والكرامه مايقدم يده لشحومها
ونثني في مدح قرم(ن) عسى حضه يطيب=والعوافي جعل ربي عليه يدومها
ذاك مرزوق المقاطي نجيب(ن) من نجيب=والمراجل تستوي له وهو شغمومها
ربعه الهيلا عتيبه تجري من يهيب=وصيتهم بالمجد حول السما ونجومها
والوفا من سلمهم دون شك ودون ريب=من كبار السن وتعلمه مفطومها
وعشت يامرزوق لعل شمسك ماتغيب=يالشجاع اللي بحور الجزال تعومها

 

 

 

 

[معلومات العضو شافي القويسي المخاريم]

مرحبا ترحيبةً كنها ضوح النهار = لاتبين نورها ينجلي عنها الظلام
قلتها من قلب ولساني أعلنها جهار= شاعراً واختار روس الجزال من الكلام
أتنقا زينها وأتخيرهاخيار= صغتها من جد من خوف يلحقها ملام
مرحبا وألف هلا بالبقوم أهل الوقار = الرجال أهل المروة صناديد حشام
فعلهم يعرف ليا شعشعت قحص المهار= بالنشاما في نهار المعارك والزحام
يلطمون الشره كان الدخان والعج ثار= بالسيوف اللي مضاريبها تشلا العظام
ويكرمون الضيف في وقت الأيام العسار= وذا قليل من فعايل رفيعين المقام
وأثني الترحيب باللي لفا من كل دار= عد ما غنا بروس النخل ورق الحمام
قلتها في مجلس أهل الوفا والأفتخار = مجلس من جاه يلقا معزة واحترام
رافعين رايته باليمبن عن اليسار= الرجال اللي تضيم الخصيم ولا تضام
في محل محمد اللي له العليا شعار= أشهد أن أبو مشبب كريم من كرام
صادق الهدات يوخذ بعين الاعتبار= ويتزايد مع طريق الوفا في كل عام
وإن نصاه اللي زمانه مشابه فانحدار = ينجلي همه ويصبح على أحسن مايرام
كامل الشارات نطاح قالات كبار= نادر بالمرجله في لأمجاد حام
طيبه أفخر به حقيقه ولا فيها نكار = وافتخر في فعل ربعي ليا طال الخصام
((آل زايد)) تاج راسي مرخصة العمار = عند خضر الغرس ولا ورا سود الجهام
بالسيوف الحدب والا سريعات المثار= تنعرف هداتهم كل كل مامس الحزام
لابتي من فضل ربي تحقق لانتصار= بالسيوف اللي كبود الرجال إلها طعام
ربعي أهل الجود ومتيهة جل العشار= فوق عوص الهجن والامثورة العسام
يحتمون الفطر الشيب نساع الفقار= لاتجلا الستر عن وجه زاهية الوشام
وإن وزاهم خايف مالهم عنه اعتذار= يدخل ويامن ببيت الشعر ولا الخيام
مثل ماجا بن مطرف بعد نير ونار= يوم عدته القبايل وجاهم ياسلام
قالوا انزل ولك في دارنا حشمه وكار= وكبر وسادك وبشر عيونك بالمنام
ثم فاجانا الشريف بن هاشم بالمغار= طامع بدخيل قوم فعايلهم جسام
مالقا من حربنا إلا غبينه وانكسار= قتل واصحابه عن الموت قالوا لانهزام
تمت وصلوا على اللي بقول الحق سار= عد نسناس الهبايب ومن صلى وصام

 

 

 

 

[معلومات العضو شافي القويسي المخاريم]

بسم ضامن الارزاق علام ما خفا=مثبت رواسي الارض مجري بحورها
اله رفع سبع شداد بلا عمد=و شمس خلقها يفضح الليل نورها
تخيرت من زين المثايل خيارها=ادور على الجزلات واقطف زهورها
قوافي بيوت الشعر لا جيت اعدها=اثبت قواعدها واثبت جسورها
لين اصوغها صوغ الذهب في مصانعه=بعد نحتها من صمصم من صخورها
اليا من بدا اللازم على العز والنقا=يسدون غياب القبيله حضورها
و انا اليا بدا الماجوب مثلت لابتي=بني دوسر اللي يشكي الضد جورها
قبيله بها النخوه مع الجاه والسخا=وفي ثار ولد الجار تذبح بزورها
ولا باعت الما لو يوزن من الذهب=ولا هي تتاجر باللحم من جزورها
مقابيس نار الحرب في حومة الوغى=لنا صفحة التاريخ تشهد سطورها
نداوي كبود لين تسلم من المرض=وبعض الكبود نزيد صالي حرورها
وعون الفقير اليا نصانا بدارنا=وعوق الرجال اللي تزايد غرورها
وملجا الدخيل اللي من البعد زارنا=يامن وعن كبده جلينا مرورها
وذيداننا في يمة الخوف نشرها=و خيل تباريها وخيل سبورها
وان زارنا قوم يريدون كسبها=قلنا بحول الله محد يزورها
مثل ما تقول الناس في صادق المثل=تراكم فداويها وحنا نذورها
دواسر يشهد لنا السيف والقنا=مع سالف الايام باول عصورها
هل الرمح وهل السيف و الخيل والنضا=و بيوت تزبن من نزل في قطورها
و اهل غارة يرتاع منها حريبنا=واهل ديرة حنا حماها و سورها
وهل غرسة محصولها ما نشح به=نعفي جوانبها ونجني ثمورها
وخيل اصيله يوم اعدد وصوفها=قصار اذانيها وقب ظهورها
وساع مناخرها قصار قيونها=كبار حوافرها وساع نحورها
عليها نحد القوم بالسيف والنمش=ونكسر عضاكم ما تجبر كسورها
بعصر مضى واليوم في الامن والرخا=بحكم السعود اللي طوال شبورها
بعد ما حكم عبدالعزيز انجلى الكدر=قضى على الفتنه من اقصى جذورها
تسيطر على كل القبايل بحكمته=وساد الامن في الدار و اقبل سرورها
وانا قبل اختم القاف باقول واسمعوا=علوم على العليا تواصل عبورها
تقدم ولد ((مدعث)) و مثل قبيلته=ولا باقي غير القبيله ودورها
يبي له صناديد توقف بجانبه=رجال بفعل الطيب تضرب صدورها
يبي فزعة رجال الدواسر هل الفخر=هل الفعل في ورد العلوم وصدورها