نايف مسرع

[معلومات العضو شافي القويسي المخاريم]

بسم الله الرحمن الرحيم










ديوان الشاعر نايف بن مسرع (الشامخ)

 

 

 

 

[معلومات العضو شافي القويسي المخاريم]

ياكيف باكتب قصيدة واظهر الصورة=وانتي قصيدي وأغلى فرحة أيامي
يادانةٍ في هواها النفس مسحورة=أنتي حياتي وروحي واجمل أحلامي
لاجيت باوصف جمالك صابني ثورة=يعجز قصيدي عن التعبير واقلامي
ولاشفت عقد الجواهر فيك منثورة=غصب(ن) علي أعتزي واربّط احزامي
يابلسم القلب هاك القلب وشعوره=أغلى شعور(ن) شربته يوم أنا ظامي
الحب نعمه من الله لا سطع نوره=بدد ظلام الشقا اللي قد له أعوامي
ياملهمتني ترى الابيات مكسورة=لامن طلبتي القصيدة ضاع الالهامي
وصعب إني أكتب قصيدة تظهر الصورة=وانتي قصيدي وأغلى فرحة أيامي

 

 

 

 

[معلومات العضو شافي القويسي المخاريم]

تسلم لشعبك لاعدمناك يامير=يا شاري العليا بغالي ثمنها
لك موقف مشهود بين الطوابير=ولك كلمة في الحق ما حدت عنها
رفعت راس اللي براسه صعاطير=واخرست من نفسه تزايد عفنها
ودقيت في نعش الهياما مسامير=اللي تخطّا والمرض في بدنها
وجات الحقيقة واضحة دون تزوير=للأمة اللي عوقها صار منها
ياما التمسنا للخطية معاذير=من زمرة(ن) صيت السعودي غبنها
وياما تحملنا كثير المخاسير=لجل العرب من شامها لا يمنها
نعطي بلا منة جنيه ودنانير=ودار العروبة من تضايق زبنها
دار الوفا... دار الرجال المناعير=دار(ن) بها راع الكرامة ضمنها
يا بلادي اللي حبها شلته صغير=أكبر ويكبر لو تطاول زمنها
حبك ورثته من سيوف(ن) بواتير=اللي فدت بارواحها عن وطنها
لايشغلك يادار خطوا معيثير=اللي حياته بالمهازل قرنها
إرقي سنود ولا تهزك الاعاصير=مامونة(ن) شر العفون وفتنها
في ظل شيخ(ن) يحكم الراي ويشير=فهد العرب لا قال كلمة وزنها
عاش الزعيم مسطر المجد تسطير=اللي يمينه بالمكارم دهنها
ومني لابو متعب سلام(ن) وتقدير=اللي خذا العليا بغالي ثمنها

 

 

 

 

[معلومات العضو شافي القويسي المخاريم]

على ارض القصيد وساحة الشعر والاداب=بلادٍ سمت بين الميادين نجدية
على ارض الرياض اللي لها فالديار حساب=وتاريخها الماضي تنومس طواريه
أبكتب قصيده لا انفتح للقصيد ابواب=وقصيدٍ بلا ماجوب ما نيب من حيه
شعاني الامير اللي فرق باول الشباب=ورقى في دروب المجد لاعلى مبانيه
حفيد الملك وابن الملك زاكي الانساب=عريب الخوال اللي له البيض مبنية
بليلٍ طغت به زمرة الموت والخراب=تعزوى وقال: العز والموت بيديه
نزل للمواجه صادقٍ صامل(ن) ماهاب=وليل الغدر فيه الخفافيش مخفية
بنصف الشهر... بدر السما كاملٍ ما غاب=وبدر الشباب بدارنا بانت اضوية
تنومس بفعله كل عودٍ وطفل وشاب=وله غطرفت عمهوجةٍ رمشها فيّه
ونخيت القصيد وكل شيٍ يجي باسباب=ولاغير ابو تركي يسيّر قوافيه
جمعنا الوفا والحب لاغلى ثرى وتراب=وفخرنا ليا قالوا: بلدكم سعودية
أجل.. ترتفع هاماتنا والمدى السحاب=ورثنا المفاخر ورث ما جات عارية
ولا من فتح لاهل الخرافات درب وباب=لنا وقفةٍ في الحق ما هيب منسية
يطوّل ظما من تاه يطرد ورا السراب=ومن يرد صافي العد حاجته مقضية
وفي دارنا نعرف الكل الكلام اعراب=سوى كلمة "الارهاب" تخسا ومنفية

 

 

 

 

[معلومات العضو شافي القويسي المخاريم]

زمان العجايب جيت عاري بدون لثام =وجت عورتك تمشي مع الناس مختالة
زمان عن أهل المرجلة والمراجل شام=زمانٍ غدوا فيه الــ ( .....) خيالة
زمانٍ غدا فيه البطل يارجال اهشام=على منبر الإعلام.. ملعون من قاله
خمامٍ على صدر الجريدة يزف اخمام=تنومس بفعله.. فال ربي ولا فاله
خسيت وخسى يالهيس وان دارت الايام=بطولاتكم محفوظة داخل زباله
تواريخكم بين البغايا تحت الاقدام =ولامن صفى الصافي كسبتوا به حثاله
شبيه العذارى ياجماعة جزاه اعدام=وجزا من يصفق له على نفس منواله
متى تنتهض الامة متى ينتصر الاسلام=متى تنتخي الفرسان لاكبرت القالة
متى كوكبة الابطال ترفع لها الاعلام=متى يرجع التاريخ ويخلد ابطاله
نبي فك أسيره قد لها في السجون أعوام=لها دمعةٍ في محجر العين قتاله
لها كل يومٍ صرخة تفزع النيام=يطول النحيب وصوتها كنه لحاله
إلى من نختنا نعتذر... للظروف أحكام=نسينا الحمية والظفر مالنا وماله
إلى زل عامٍ ترجي القدس بعده عام=كما يرتجي عودٍ عجز.. خيرة عياله
غدت بين أهلها ياعرب كنها الايتام=غريبة... وهي من بينهم حالها حاله
نسوها وكلن صار همه يفوز اهشام=لحا الله وقتٍ صارت أذنابه أبطاله

 

 

 

 

[معلومات العضو شافي القويسي المخاريم]

ألا يا بنت أنا الشاعر.. وانا العاشق.. وانا الولهان=وانا اللي عانده وقته وشدة قاسي ظروفه
وانا اللي من صغر سنه شكى من لوعة الحرمان=كتم جرح سكب دمعه.. وعين الناس ما تشوفه
تعودت الشقا من يوم أنا في حسبة البزران=وكبرت وتكبر أحزانٍ معي مهيب معروفه
طلبت من البشر شربه وانا اللي حايم(ن) عطشان=ورجعت بكفي الفاضي ونفس العز مكسوفه
ونخيت بداخلي فزعة صديق(ن) صادق وانسان=ولقيت من البشر ناس(ن) عن الفزعات مصروفه
وعرفت إني نديمي في الشدايد.. صادق القيفان=تجاوبني مع الآهة بشعر عزت حروفه
وعزفت بلوعة الكلمة قصيد(ن) كلبوه أحزان=يترجم واقع(ن) شفته وغيري ما قدر شوفه
ألا يابنت شوفيني قصيده ما لها عنوان=وإذا كانك جهلتيني ترى منتيب مكلوفه

 

 

 

 

[معلومات العضو شافي القويسي المخاريم]

الفزعة إللي حمـّلت عاتقي دين=ليت اخو شمـّا ماعرضها عليـّه
مادام غابت يوم نصب الموازين=انفوسنا عنها شباع وغنية
قوم نعرف الزين ونميـّز الشين=ضد الخطا ولانحب الخطية
ولا نلحق الشرهات كود الميامين=إللي لهم فالطيب روحه وجيـّه
ولا الردي مانلزمه بالقوانين=مادام ماله فالمواقف هوية
العمر رحلة والشدايد براهين=ولاينذكر كود العلوم الطرية
من قــدم العليا فزين ٍ على زين=ومن قـّدم الاخرى لقاها جزيـّه
وانا وقفت ووقفتي تعجب العين=ولي رايةٍ بين النشاما عليـّه
نطحت قوم ٍ فالملاقا شجيعين=وانا شجاع ولابتي صيرمية
ويوم احتمى الميقاف مافيه ثنتين=وكلن ذكر في ساعة الضيق حيـّه
تلفتت عيني على يسار ويمين=ولا شفت ربع ٍ فالحرايب عصية
غابوا وتجهلني السبايب إلى الحين=لا به عذر جاني ولا به وصية
لاهم بذلان ٍ ولاهم رديين=قضية ٍ ياكبرها من قضية
قولوا لاخو شمـّا ترانا غنيين=لو غاب عني.... شمس الامداح حية
أنا عزيز ومن رجال ٍ عزيزين=أهل الفخر والجود واهل الحمية
وأنا حفيد مرجحين الموازين=أهل الظفر من عاد بقعا صبية
الله خلقهم روس ماهم كراعين=واذكارهم في كل نجد العذية
ماعندهم وقت المواجيب بعدين=حاضر بحاضر والعزايم قوية
.. كتبتنا موجز فقط بالعناوين=وختمتها باغلى سلام و تحية
تحيةٍ فيها عتب للميامين=ولا الردي مهوب يطري عليـّه
ولو غاب عني راعي الفزعة سنين=يحسب حسابه... شمس الامداح حيه
هاماتنا عليا على العسر واللين=ونفوسنا من فضل ربي غنية

 

 

 

 

[معلومات العضو شافي القويسي المخاريم]

يافارج الضيق والكربات والشدة=مابه إلهٍ سواك أرفع له يديه
لاعسكرت في الفواد هجوس ممتدة=وتزاحمت ماعرفت الحسن والسية
مرن كبير الامل بيديني أشده=ومرن أعود ولاهذي ولا ذيه
البارحة والخفوق مبيـّحن سده=سريت ليلي على ترنيم قمرية
كنها تحس بنزيل ٍ قلبي يحده=لكنها هيجنت وانا على النية
وماينزع الهم لامن زاد عن حده=ويركي على هامته خنجر وشبرية
إلا حبيس ٍ إلى من ضقتنا اهده=ولامنه صاد الجزيلة جابها ليـّه
صيده ثمين ٍ وانا بيميني أمده=للي ببيت المراجل نارهم حية
في خاطري كلمة ٍ تجتال من مدة=عاداتنا ياهل العادات ... مغزية
من عدة شهور والساحات مشتدة=قامت على تراثنا مليون جنية
صار المزاين على ماروجوا ردة=والاهتمام بعطايا الله رجعية
كم كاتب ٍ لا كتب لمـّح و هو وده=يقولها بالصراحة دون رمزية:
ياشيخ باب ٍ يجيبه ريح لك سده=واكتب على ماضي التاريخ مرثية
ومادام كلش يبين إذا عرف ضده=ولا ضرا بالمعالي عاشق الفية
عمارةٍ ماحملها ساس منهدة=لو كان جدرانها من صلب مبنية
والكاتب اللي من النعمة برق خده=ليته خذا اجازته فـ جبال تركية
وينشد أوروبا عن التاريخ وتعده=البل واهلها وطار العز ياحيه
ملاحم ٍ تظهر اللي طيب ٍ جده=و (راكان) فيها غدا للطيب مارية
سيف ٍ على هامة (البلقان) ياحده=كل أصوكٍ يفتخر لاحل طاريه
يارب يافارج الكربات والشدة=ياللي إلى ضقتنا بارفع له يديه
استر عواقب الامور اللي لها مدة=وفرسانها تختبط في داخل الفية!
وبيض وجه من حمى الميقاف واستده=واحيا لنا ماضي ٍ ما فالعرب زيه
واحفظ لنا مـ الخليج إلى بحر جده=الدين الاول وحكام السعودية

 

 

 

 

[معلومات العضو شافي القويسي المخاريم]

إي والله أعرفه وهو بالمدح عرف=يومن عيال اللاش محدن عرفها
لامن ردي الجد (م) المرجلة صرف=(بادي) عشقها عشقة(ن) واحترفها
دكتور طيب(ن) قبل مايكتب الحرف=ماشرفته الدكترة... هو شرفها
لاجا نهارن فيه للطايلة صرف=وكلن على بنت الاصيل التغفها
جاتك (بابو سلمان) ماردها جرف=بنت الحصان و (بادي) اللي عسفها
من لابة(ن) تغرف من الطايلة غرف=مقيدين جمالها من صلفها
يآل الصباح اخوان مريم هل العرف=شيوخ البلاد اللي كساها ترفها
عطوني الجنسية أيام لي ظرف=بأرد لبنوك المراجل سلفها
باصوّت لرجل(ن) عن الهينة صرف=والكايدة لو هي عسيرة ولفها
ومادام عرفي له يساوي مية عرف=حشو العرب مهوب شرط اعرفها

 

 

 

 

[معلومات العضو شافي القويسي المخاريم]

الدمعة اللي حدّرت في ضحى العيد=من موق عيني والخدود اجرحتها
حاولت أخفّيها عن أهل المناقيد=وخانتني عيون الشقا وذرفتها
كني مع جروح الزمن لي مواعيد=حتى نهار العيد... وش تاليتها !
أحيا الجروح الميتة شمعة الغيد=شبيهة اللي مهجتي مانستها
صغيرة(ن) كنها من الحور وتزيد...=عن غيرها.... كل العيون بهرتها
عرفتها من بين الاطفال بالجيد=الله فرقها بينهم برقبتها
ولاجت تخطى كن فارجولها قيد=ريمية(ن) ذاب العسل فاضحكتها
عيون قرناس(ن) تعوّد على الصيد=وهي تصيد وصيدها بهدبتها
عكش(ن) إلى من سلهمت جات بالعيد=فيها حروف الموت عيني قرتها
قلت: اسمحي سؤال واحد ولا ازيد=عمـّن مكانتها بقلبي بنتها
قالت: (فلانة)؟ قلتنا إي والله أكيد=من غيرها بعد السنين أبعدتها!
بعد أصبحت داري عن اديارها بعيد=كيف الليالي في غيابي قضتها
مدري جنت من حاليات العناقيد=ولا السنين اللي حدتني حدتها
قالت البارح عرسها علّـه سعيد=ياحظها ياسعدها يابختها !
تزوجت... واليوم راحت لمدريد=قبل دقايق مقلعة طايرتها
وقفت كني وسط طابور تجنيد=والرجل عجزت لاتدير احركتها
كنت أرسم الاحلام لبعيد.. لبعيد=وسود الليالي بالفراق ادفنتْها
ياليتني ماجيتنا قاطع البيد=ولانشدت اللي جروحي نكتْـها
راحت ورحت وراس مالي تناهيد=ياحظ دار(ن) شيخة الزين جتها
أنا أشهد إنها جات بالعيد فالعيد=ريمية (ن) كن الشهد فاضحكتْها

 

 

 

 

[معلومات العضو شافي القويسي المخاريم]

في ليلة(ن) من ليال العمر مذكوره=ليله سطع بدرها وأنور محياها
وقفت محتار والابيات منثورة=قصيدة(ن) في غلاكم كيف بابداها؟
لو كنتنا فالمحافل ماخذن دوره=مقامكم يعجز الشعار واملاها
سقت القدم منتشي من (دار أخو نوره)=مع ربعي اللي يشرفني مخاواها
لحفلة رجال(ن) بفعل الطيب مشهوره=(آلا شكرن) عسى أهل الدون تفداها
سلام ياعزوة(ن) بالعز مذكوره=من يوم وقت الجهل مايقرب إحماها
لاجا نهارن به الابطال مذعوره=يتلون شيخ(ن) على الجزلات ضـرّاها
من ماضي الوقت (وابن حفيظ) له دوره=شيخ(ن) يقود الجموع ويتعب اخطاها
ياما تعشت طيور الجو من سوره=مع لابة(ن) ترهب الفرّيس لقياها
وحنا لهم في نهارن تكثر شروره=لامن عوى ذيب حوله يكثر عواها
دواسر(ن) دوّن التاريخ بسطوره=أمجادنا اللي على وجهه كتبناها
وقول(ن) بليا دليل تبين به عوره=واهل الحكايا مهيب تطول بحكاها
(وسم العصا) صفحة(ن) بالمجد منشوره=و إلها الفخر دام حنا اللي نشرناها
لامن زبنـّا دخيل(ن) يشتكي جوره=عصاه تمـّن إلى منـّا وسمناها
تشوفه عداه لـوّ تموت مقهوره=من دونه (الوسم) و (أهل الوسم) عـدّاها
ومادام (بعض السوالف) ذكرها عوره=(حنا هل الوسم) بأولها وباتلاها

 

 

 

 

[معلومات العضو شافي القويسي المخاريم]

البارحة مانمت ليلي تعاجيب=عفت المنام إن كان غيري هنابه
تكدرت لي صافيات المشاريب=وقلبي شكا جرح(ن) جديد صطابه
كانت جروح القلب تعيي التطابيب=واليوم زاد الجرح ظلم القرابة
هرج القفا يا كاسبين المواجيب=عيب(ن) على اللي في اللقاء يعتزابه
يا ربعنا ياهل الوفا منقع الطيب=مهوب حق السيف يجرح انصابه
يا شينها لاجات بين الاصاحيب=ولا العدو ما قد حسبنا حسابه
من ماضي الازمان نرقى لصاعيب=ومنزالنا بالعز عالي هضابه
نحرص على الطالات ما نقرب العيب=وميقافنا في الحرب كلن حكابه
وما ننتظر في حاضر الوقت تجريب=ناخذ من الماضين فعل(ن) امشابه
فينا الولد يمدح إلين أبيض الشيب=يظهر بوجهه لاتقافا شبابه
ولامن تغربنا حداد المخاليب=ما نرتضي بالهون واللي سعابه
وخوينا ما يلحقونه عذاريب=يفخر بخوتنا ويمدح جنابه
ويفرح بنا اللي حاديته الكواليب=نفك قيده ويتهنى شرابه
وما نلتفت لاهل الحكي والشواذيب=نرقا سنود وضدنا في عذابه
يابنت ياللي فارقه فالرعابيب=يابنت منهو في اللقا يندعا به
اللي على ظهور النضا كنه الذيب=يحوف عدوانه بيوم الحرابه
كبي ردي الجد ضخم التلابيب=اللي حصيله في المراجل ترابه
اللي يجنب درب الاجواد تجنيب=ويبني على دروب الرخامة اطنابه
وعليك باللي ذكرهم فيه تطريب=ربع(ن) على كسب المعالي تشابه
إللي إيلا دارت عسير الدواليب=ما منهم إللي في القسا صك بابه
قلته وانا أونس في فوادي لواهيب=من هاجس(ن) بين بقلبي صوابه
وختامها... ياحيف ياهل المواجيب=هرج القفا نقص(ن) على من حكابه

 

 

 

 

[معلومات العضو شافي القويسي المخاريم]

من شاعر(ن) ماتاه بين لحونه=ولاهيب عادة للهجوس تخونه
إذا وقف تنصت لذان لشعره=وإذا كتب بإعجابهم يقرونه
والشاعر اللي لاوقف ماجمّـل=خل أشقر الفنجال يقصر دونه
سلام يادار الامير الشامخ=حمد الامين وديرته مامونه
حمد.. حمد شيخ(ن) مورّث شيخه=والشعب كحّـل من غلاه عيونه
حقق لهم الاحلام لو هي صعبة=وإيلا زهمهم كلهم يوحونه
وولي عهده تمّم الله عمره=تميم شوق العندل المزيونة
اللي تباها كل ماجا ذكره=وتشوم له من كثر مايطرونه
شيخ(ن) تربى في عرين الشيخة=وبهيبته عهد البلاد يصونه
ودام المشاعر جات بالشاعر هنا=يالله عساها ماتخيب ظنونه
قصيدة(ن) فاهل قطر مختالة=فتانة(ن) في حبهم مفتونة
غيداً يداعبها الهوى لانسنس=من دار ابو مشعل وساق شجونه
في ليلة(ن) شعشع قمرها ساطع=وفي محتفل سلطان يفرق لونه
سلطان ولد أحمد عريب المنسب=اللي ابركت الامداح له مقرونة
شيخ(ن) غرس في الطيب من جدانه=سور البلاد مثبتين اركونه
تشهد لهم وقفاتهم في دارهم=يوم الحريب يوسعون طعونه
لازعزعت في الخيل: ياهل العليا=حوض المنايا طبعهم يردونه
ونشهد لهم في دارنا بالخفجي=ياسعد منهم فالملاقا عونه
ليل(ن) جفا ابن سعود لذة نومه=من صيحة العذرا وهي مرهونه
ويوم اوصلت الاخبار لابن ثاني=ماطب نوم العالمين جفونه
قال: أبشروا بالعز يا اخوان نوره=وتباشري يالجادل المصيونة
والله ماينداس شبر(ن) لجاري=واليا زما الباغي ندك حصونه
عاداتنا فالحرب يظهر فعلنا=وفزعاتنا فعروقنا مدفونه
لاخير في جار(ن) رضى في جاره=وشهو بدوني ، ويشني من دونه؟
واليوم جينا والوفا عادتنا=كلمة شرف باقولها موزونة
راياتكم بيضا مع أهل العوجا=وميقافكم والله ماينسونه
وآل السعود أمجادهم معروفه=تاريخهم زاهي وهم يزهونه
توسطوا شبه الجزيرة عنوة=بوقت(ن) عجاج الخيل هو قانونه
نوّ(ن) تزبّـر من ضواحي مكة=وهلـّت على خير البلاد مزونه
ياهل قطر من يوم جانا الداعي=طول المسافة لاجلكم ياهونه
دعوة فخر من كف شيخ(ن) وافي=العز شوفه والوفا مكنونه
خليفة ابن أحمد كريم السبلا=الطيب راسه والكرم ماعونه
خليفة اللي علّ عمره باقي=وياجعل من حبوه مايبكونه
شيخ(ن) خذا الامداح في شبابه=وله مجلس(ن) روس الرجال يجونه
جانا رسولن لا اعتزى في مُرة=تطير من نفس الحزين احزونه
( علي ) علا للنايفات بطيبه=يازين ترحابه لمن ينصونه
ومعه رجال(ن) كل منهم وافي=بيت الفخر بيدينهم يبنونه
وماهي غريبة دامهم مرية=المدح سوقه لاغلا يشرونه
ونيابة(ن) عن عزوةٍ زايدية=دواسر(ن) درب العلا يرقونه
دواسر(ن) لعهودنا ماخنـّا=وأرواحنا لاوطاننا مديونه
دواسر(ن) لامن نخانا حاكم=نقوم له وانفوسنا ممنونه
ثقالن مواقفنا وساع(ن) طعوننا=والموت حنا سوقه وزبونه
وسم العصا في نجد سلم جدودنا=سنـّة فخر بايماننا مسنونة
جينا نلبي دعوته ونشارك=غالي وحنا عزوة(ن) يغلونه
وشبيت في ليل القصايد جمرة=إلين ولـّع حرها غليونه
قصيدة(ن) سيقت على أهل العليا=من شاعرن ماتاه بين لحونه

 

 

 

 

[معلومات العضو شافي القويسي المخاريم]

من الديرة اللي حبها في الضماير ساح=ولبسنا غلاها لبسة الرجل لهدومه
ديار الملوك اللي خذوها بضرب ارماح=ولاجات بالهدنة ولاهيب مقسومه
ديار السعود اللي سكن حبها الارواح=ومن هام في حب أطهر بقاع مالومه
قبل يصدع المذن بحيا على الفلاح=غبشنا شمال وكل نوام في نومه
ونطحنا نسيم(ن) هب من ديرة الصباح=تعطـّر بكادي وازرق العود يشمومه
نصينا رجال(ن) برقهم فالمراجل لاح=وذكر الحيا يكفيك عن باقي علومه
وصلنا لكم من داركم والقلوب صحاح=ومعنا رسايل شوق بالحب مختومه
من العزوة إللي يوم ذا ذابح وذباح=لهم بصمة(ن) لاهل التواريخ معلومه
دواسر إلى منـّه علا للمغير صياح=تباشر بنطح الموت والقومه القومه
ولاهيب تخلي كان جاها النذير امراح=دواسر بهم خطوات الامجاد مرسومه
دواسر إلى من جالنا من زمانه شاح=بهجنا الصدور اللي من الوقت مكلومه
ودون الدخيل اللي من الوقت سده باح=نبيع النفوس الغالية باول السومه
وقصير الدواسر بـدّ من جا ومنهو راح=لنا سلم ماتلقاه في باقي سلومه
إلى منّ وسم الدوسري في عصاته لاح=يسج القدم وتهاب من وسمنا خصومه
وجار الدواسر يوم قـدّر جداره طاح=دفعنا الدية والجار مايلحقه لومه
سلوم(ن) تميزنا بها والفعول إيضاح=لنا صفحة التاريخ تنقاد مخطومه
وباقي القبايل تكسب أيمانهم الامداح=وكلن خذا من بحر الامجاد مقسومه
ألا ياهل كويت الكرم دامت الافراح=بهجتوا صدور(ن) تعشق الطيب وترومه
لعبتوا بقلب ضيوفكم لعبة المسباح=وحكمتوا نفوس(ن) قبل ماهيب محكومه
دواوينكم من جالها خاطره ينساح=ومن قابل وجيه السعد زالت همومه
عليكم عدد مالاح برق وحمام(ن) ناح=سلام(ن) مفاهيم المناعير مفهومه
لبسنا المفاخر فوق بيض الثياب وشاح=بعد شوف ربع(ن) عن هل الذم معصومه
كسبنا الرجال اللي مكاسيبها الارباح=وهي راس مال(ن) حطـّم المال برقومه
رجال الكرم الطيب وان جا السلاح سلاح=سلاح(ن) يشوق العين لاكبرت الهومه
وبعد ماجمعنا الله في دار ابو جراح=عسى عظام شيبانه عن النار محرومه
وعسى بيرق أهل الطايلة عالي(ن) ماطاح=وعسى بيت راع الطيب ماتدرس ارسومه
بياض الوجيه وفعلكم كنه المصباح=تشوفه عيون الخلق ، وتميز وسومه
وانا اشهد شهادة حق ماهوب وقت امزاح=ملكتوا قلوب(ن) قبل ماهيب محكومه

 

 

 

 

[معلومات العضو شافي القويسي المخاريم]

يامير حلمي الوقوف بشاطي الراحة=حلم(ن) يسوق القدم ويسهّر عيوني
مابي ورا روحتي تنفيس وسياحة=ولاجماهير في المسرح يحيوني
باعلـّم أهل الشعر واعلـّم الساحة=إنـّا (هُـنا)... لين كل الخلق يدروني
وبارفع اسم القبيلة والبس وشاحه=واقول: شاكر يابو تركي وممنوني
وانكان حظي خذا المليون واجتاحه=باشري به البيت ولا اسدد ديوني
وفي فزعتك تكبر الاحلام بـ (الراحة)=وان ماحصل والله إن وقفتك مليوني