قصيدة الشاعر راكان السبيعي في خويه الشاعر معيوف الدوسري

[معلومات العضو ابن قرنين]

قصيدة الشاعر: راكان محمد السبيعي
مرسله الى
الشاعر المبدع:معيوف مبارك المسعري الدوسري

شغّل الفكسار أنا يافهيد ناوي=نيةٍ مالي سواها اليوم نيّه
اشهد أنه منوة القلب الهواوي=لانوى قطع الفجوج الجرهديّه
مركب اصحاب المعالي والعزاوي=ماركبه اللي رصيده دون ميّه
لو وصفه اللي على وصفه رهاوي=تنتهي فيه الحروف الأبجديّه
كن وجهه لامشى وجه النداوي=يوم شالوا برقعه والشمس حيّه
ثم تعلاّ فوق خرب وجاك هاوي=حرٍ اشقر من حرارٍ صيرميّه
والإضاءه كنها برقٍ سناوي=لاح في كبد السما وقت العشيّه
ولون بديه بين الأزرق والسماوي=والمراتب لونها لون برديّه
والخطوط تقول من كثر الملاوي=كن في نص البدي مطبوع حيّه
وأن ركبته عزتي لأم العراوي=كنْك داخل في قصور الفاخريّه
لا تزيد ولا تعيد ولا تراوي=ألا كنّك وسط برج الفيصليّه
وكن حسّه لأشتغل حس السحاوي=العنود اللي سوالفها نديّه
وأن تهادا للخطوط السود طاوي=خطرٍ أنْه يطير لولا الجاذبيّه
ذا خويّك كان تبغالك امخاوي=أشهد أنّه ماتردّى في خويّه
لااستوى فالخط والخط امتساوي=زان بدعك ياللحون السامريّه
بدع شاعر محترف ماهوب هاوي=شاربٍ لإبداع شرب الشاذليّه
نص خطي صوب شعّار النداوي=وخص أبومبارك وسلمْه الوصيّه
ياسلامي عد ما غنّا الخلاوي=وعد ماهبّت رياحٍ موسميّه
وعد ماذيبٍ رقا المرقاب عاوي=وعد مابالصوت ناحت راعبيّه
يالرفيق اللي على الجزله نحاوي=وفالشرايد لك شهاده عالميّه
وش تقول بحالة المليون غاوي=والشعر عقب العصور الأوليّه
شوف حاله لاطبيب ولامداوي=ماتشالا لوكوي مليون كيّه
ابتلوه اهل الحكي واهل الرشاوي=كلّن يهدّف ذلوله والعبيّه
عنده أن ماله على الجزله امساوي=كن ربي ماخلق مخلوق زيّه
هذا وضع الشعر في عصر البلاوي=في زمان البلبله والعنصريّه
صار راعي الذود يامعيوف شاوي=والشواوي صار يملك له رعيّه
والختم ياصاحبي حل الدعاوي=مالها ألا الدوسري زبن الونيّه

وهذا رد الشاعر / معيوف بن مبارك الدوسري

مرحبا باللي على الجزلات حاوي=صاحبي راكان زيزوم السريّه
مرحبا برسالتك والليل ضاوي=واصبروا يومين والدنيا مديّه
لين أفكّر واتعب أفكاري وأساوي=وآتلفّت في ملفات القضيّه
المعَرفه ماتجينا بالمناوي=لازمٍ نتعب على هذي وذيّه
فرق مابين المفتّح والعماوي=فرقهم فرق النضيم امن العليّه
راكب اللي لا انتحا الخط النحاوي=كنْه سيلٍ نازلٍ له من شظيّه
لكزسٍ يبعد من القلب الشكاوي=منوة النفس الفقيره والغنيّه
لا اشتغل كنْها تسولف لي مهاوي=لأجتمعنا وسط سوق القيصريّه
الهنوف اللي لها قلبي مخاوي=تاخذه وتروح به وتعود ليّه
وان نطحته ناطحٍ شيخٍ حماوي=ضايقٍ على الشئون العسكريّه
ثم لبس بشته تقول أنّه فداوي=ثم دخل على وزير الداخليّه
خلّص الموضوع مزبان الجلاوي=أشهد ان راسه يشوش امن الحميّه
والمراتب جلد لونه زنكلاوي=وشاشته كنك تشاهد مسرحيّه
والكفر لامن ضرب له في مطاوي=ينفرش يا لعنبو جدّه وحيّه
بس عذروبه شوي أنّه غلاوي=يالجمارك نزّلوا منّه شويّه
ريّحونا يا بعيدين الهقاوي=قيمته ماعاد تعطي معنويّه
مايوقّف غير عند اللي يساوي=له قبيله من قبايلنا الوفيّه
ذاك راكان السبيعي لولاوي=لولاوي في المراكز لوليّه
ياعريب الجد يا كثر الرواوي=والقليب امهدّمه والماء بليّه
وش تقول بواويٍ مُغرْم بواوي=لو يسولف له سوالف فارسيّه
قام يضحك حضرة إلياس الهراوي=مقتنع بالمفردات الشقلبيّه
جلسةٍ على البحر وألا القهاوي=عندهم تسوى الفياض النرجسيّه
ياعرب والغصن لا من صار ذاوي=لا يجيبه لاثمار ولاش فيّه
الحساوي لو وصل جدّه حساوي=البطاقه بيّنه ماهي خفيّه
وزبدة الموضع كبمودي وجاوي=والسلام اختام واخرها التحيّه
والنهايه ما اطيب اصحاب الفتاوي=سالمين امن الأمور الدنيويّه

صح لسان الشاعرين السبيعي والدوسري

 

 

 

 

[معلومات العضو ابن ذيب الودعاني]

صح الله لسان الشاعر راكان السبيعي والشاعر معيوف المسعري الله يوفقه في برنامج قصيدة التحدي القصايد جزلة وانت جزل يا ابن قرنين

لاهنت طال عمرك وتقبل تحيات اخوك ابن ذيب الودعاني

 

 

 

 

[معلومات العضو نايف الخييلي]

لاهنـــت يابن قرنين


على إختيارك الموفق لهذه المساجله بين راكان السبيعي و معيوف المسعري

 

 

 

 

[معلومات العضو ابن قرنين]

المشاركة الأصلية كتبت بواسطة ابن ذيب الودعاني

صح الله لسان الشاعر راكان السبيعي والشاعر معيوف المسعري الله يوفقه في برنامج قصيدة التحدي القصايد جزلة وانت جزل يا ابن قرنين

لاهنت طال عمرك وتقبل تحيات اخوك ابن ذيب الودعاني

وانت ماتهون والله يطول في عمرك ياابن ذيب الودعاني أفتخر بمرورك

 

 

 

 

[معلومات العضو ابن قرنين]

المشاركة الأصلية كتبت بواسطة نايف الخييلي

لاهنـــت يابن قرنين


على إختيارك الموفق لهذه المساجله بين راكان السبيعي و معيوف المسعري

وأنت ماتهون اخوي نـــــــــايف شاكر ومقدر وافتخر بمرورك