الشاعر والفارس=-هجاج بن عيد الغييثات-=

**معلومات** **العضو** · 03-06-2005, 08:08 AM

بسم الله الرحمن الرحيم

هو الشاعر الفارس هجاج بن عيد الغييثات الدوسري.المتوفى سنة 1385هجري وكان عمره يقارب مئة سنة تقريبا.

واليكم بعض قصائده

========ربع بالقسا تكرم الخطار================
قصيدة مدح بربعه الغييثات وهم هل المدح

يقول:

بين النجادى والقريات والخوار=سقاهن مخاييل تملي محاجيره
مداهيل ربع بالقسا تكرم الخطار=خطرهم على نشر المعادين بمغيره
ذيدانهم ترعا القراره بليا جار=ولا رتهق من الحرب لا ولعت نيره
يدوسون نار الحرب لاعمست الاشوار=لواليب حرب ماتبطل مساعيره

===========================================

==========يانعم والله ياصلايب جدي================

يقول:

يالله بليل كن تكيشفه بارقه=عليه من سل السيوف رموع
جعله على لاطواء يهل مخايله=ومشيمغ قبله عليه رثوع
ترعاه وضحى سيرها متمرجح=كنها هنوف من البني فروع
وضحى ندللها ونتبع شفها=لامن قعد بالعش فرخ تبوع
ياراكب للي ريف هذيله=توه على حب الغرض مصروع
انص القعود محمد لاجيته=تبديه بعلومك وهو مقروع
وكل الجماعه يطلبون علومك=مافيهم لاخجل ولادنوع
حنا خذينا حقنا بيدينا=يوم التقنا بالعريق جموع
يانعم والله ياصلايب جدي=يوم الموازر صوتهن يروع

==============================================\\

==========اللي يخلي سلم جده هافي===================

قال هذه القصيده بعد انتصارهم بأحد المعارك

يقول:

كل الشروع الطيبه بانينها=واللي يخلي سلم جده هافي
حيث اللحم عيب علينا بيعه(1)=مناب من يضفي عليه لفافي
حقاتنا منه ثلاث فقاير=مركب رديف ولا ادبرن زلافي
والى عطينا مدة مانردها=حيث العطايا بين الرجال اسلافي
ويازين فزعتنا لخطوى هجمة=لامن لحقنا خليت عطافي
ويازين فزعتنا لراعي ليلى=يجمع ضرير في ايديه اتلافي
يوم جتنا الفنسا تهل دموعها=تقول وليت دارنا ياكافي
حنا حجاب الدار وانا سترها=والله مانرضى لها بخلافي
والنعم ابن سبهان هو وجموعه(2)=جموع عبده هم وبن حلافي
لاشك جاهم لابة مصطوره=ربع تورد شذرة الاسيافي
لين انثنى من الدار مايبغيها=صابه من الشر الشرير خفافي

(1) من سلوم الدواسر وعاداتهم المعروفه
-----

(2)ويتضح من القصيده بالبيت التاسع ذكر الشاعر لابن سبهان
اللذي ينتمي لعبده شمر
وابن سبهان كما هو معروف خوال ابن الرشيد امير شمر
فهذه القصيده قيلت بمعركه بين الغييثات وشمر... والله اعلم
وارجو ممن له درايه بالموضوع من الاخوان ان لا يبخل علينا

-------
===============================================

==========يستانس الشاعر على شبة النار===================

هذه القصيده يمدح بها الدواسر ويخص بها (الرجبان والمساعره وآل حسن):

يستانس الشاعر على شبة النار=ضو عليها كاسبين النفيله
جات السوالف مثل ورد وصدار=مثل الدلي فوق القليب الطويله
سوالف الرجبان هل قب الامهار=اهل المزين والسيوف الصقيله
واالاد ابن مسعر وهم سقم الاشرار=من علقوا بالشلف واعزتي له
مساعره نطاحة الهوش لاثار=كم طلقو في ورودهم من حليله
لا شالوا الريشه(1)معا الصبح لانظار=كم حلة حطو عليها دبيله
مثل اللذي جاهم وساقته الاقدار=هلى الجفير لله يضيع دليله
والاد حسن من دون حسكات الاوبار=يروون حد مشرخات صقيله
الى اعتلوا مثل الوضيحي الى ذار=لاعود الصياح يومي شليله
يردون بهم حوض المنايا الى ثار=من طاح بالميدان محد(ن)يشيله
ذيدانهم بالخوف ترعى بلا جار=يقتل وراها من الجوازي جميله
ان اشملت يرعى بها نبت الاقفار=وان اجنبت ترعى مظامي الطويله
كم واحد(ن)حطوا على كبد امرار=ومركاضهم يبري الكبود العليله

-------------
(1) الريشه مثل البيرق تكون امام الجيش ...علامه تعرف بها القبائل.

**معلومات** **العضو** · 03-06-2005, 08:57 AM

الله يرحم الشاعر الفحل هجاج بن عيد الغييثات الدوسري

بيض الله وجهك والله لايهينك يابن مشخص على هذه النبذة

لاتبطي بجديدك ،،،،

**معلومات** **العضو** · 03-06-2005, 09:09 AM

لاهنت يابومشخص والله يبيح من الشاعر وجعل الجنه مهايده *************

اخوي ابو مشخص في بالي انه مدح ال حسن في اخر قصيده مع الرجبان والمساعره

**معلومات** **العضو** · 03-06-2005, 10:14 AM

الله يرحم الشاعر

الله لايهينك يا ابن مشخص

وماقصرت ولاخلا ولاعدم طال عمرك

**معلومات** **العضو** · 03-06-2005, 08:21 PM

البراق الله لايهينك ولاعدمنا دودك الطيبه
صخبور الاكبر لاهنت وبيض الله وجهك على الاضافه والعذر والسموحه على نسيانها العجله شينه
الشامخ مرحبا ومسهلا وبيض الله وجهك على ردودك الطيبه

شاكرا لكم اخواني مروركم الكريم

تحياتي
ابن مشخص

**معلومات** **العضو** · 14-03-2008, 01:46 PM

الغييثات الغييثات الغييثات

دواسر الغثييات

الله يرحم الشاعر الفحل هجاج بن عيد الغييثات الدوسري

**معلومات** **العضو** · 14-03-2008, 03:03 PM

لاهنت يابن مشخــــــــــص علي الموضوع الطيب

وبيض اللــــــــــــــــه وجهك

والله يرحــــــــــم الشاعر ويغفر له

**معلومات** **العضو** · 15-03-2008, 07:37 PM

لا هنت يا بن مشخص على هذا الطرح ولدي تعليق بسيط اذا سمحت

هو / هجاج بن ادريس ( زويان الموت ) بن محمد بن عيد آل عيد الغياثات

فارس وشاعر ورث الفروسيه والشعر عن ابيه وجده ،وعرف عنه انه

حسن الوجه ، وشهد اكثر معارك الغييثات مع الاميرين

وقيّان بن رديني وابنه محمد بن وقيّان وكان هو أحد الفرسان العشرة الذين

تصدو للضياغم مع الامير وقيّان وله ابيات موجوده في المنتدى وله مواقف بطوليه

لا يسعنا ذكرها ونتمنى من الاخوة من آل عيد التكرم بوضع نبذه عن شاعر الغييثات

الاول في زمانه .

و توفي منذ كثر من خمسين عاما ً على وجه التقريب وهو أحد المعمرين توفي وقد

تجاوز المئه.

نأتي على النصوص التي ذكرتها النص الاول لا اعلم مناسبته ولا بقيته ولكن

نأتيي للبقية النصوص :

هذا النص قاله الشاعر بعد انتصار الدواسر على قحطان عندما نزلوا الجفير

وهو للغييثات واعطوه للمساعرة وانتهت المعركه بمقتل نخيعان أمير القحاطين :

استانس الشاعر على شبة النار = نار ٍ عليها كاسبين النفيله
جات السوالف مثل وارد وصدّار = مثل الدلي على القليب الطويله
احد ٍ بعد يقول انّا نهمل الجار = واحد ٍ يقول انّا نعز القبيلة
(مساعرة ٍ ) بايمانهم سو الاقدار = كم طلقوا في وردهم من حليله
فلاد (بوسباع) هم شر الاشرار = من علّقوا بالشلف واعزتي له
(مساعرة ٍ) نطاحة الهوش لاصار = كم حلة ٍ جطوا عليها وهيله
لاشالوا الريشه مع الصبح الانظار= كم حلة ٍ حطوا عليها سحيله
مثل (نخيعان) يوم حذفته الاقدار= عند الجفير الله يضيّع دليله
وسوالف( الرجبان) هل قحص الامهار= اهل المزيّن والسيوف الصقيله
كم واحد ٍ حطوا على كبده امرار = مركاضهم يبرى الكبود الغليله
ربع ٍ تغرس الغرس ماعليه احضار = ياكود مرد العميل لعميله
و(لاد حسن) دون حسكات الاوبار= يروون بحد مشرخات صقيله
اليا اعتلوا مثل الوضيحي الا ذار= لاعوّد الصياح يومي شليله
يردون حوض المنايا الا ثار = من طاح بالميدان محد ٍ يشيله
(يالمصطفى) مانرت ياطافي النار = خلّيت ملحا في ولدها شليله
(بالمصطفى) ماطعت ياعمس الابصار= ماطعت ابوك اللي علومه دليله
(يالمصطفى) هذا( العضب) جاك زوّار = تنشّده و(ابن الدفين) الدليله
(يالمصطفى) ذيدانّا مالها جار = نقتل وراها من الجوازي جميله
ان اشملت نرعى بها عشب الاقفار= وان اجنبت (لمشيمخ ٍ) ( والطويله)
وحنا وراها بالكريزي اليا ثار = نقصر بها اللي حياته طويله

ومناسبته تهمة السبعان لــكرسوع بن زريجين المزاريع ولقد ذكرها الاخ الراحل /

دغش بن بطي في المنتدى اما الابيات فهي :

يــالله يــاللــي فــوقــنا رقــيـــب=يـاواصـلٍ فينا ماهـوب قـطـوع
روَح برايــح لــيـلـةٍ تنشــيـبـهـا=يومك لطـلبات الـعـباد سـمــوع
محيي قنيفٍ كن تكيشاف بارقـه=عليه من وصف السيوف رموع
جعله على لطوى ينـهـل وبـلــه=ومشـيـمـخٍ قـبـلـه عـلـيـه رثوع
نرعى بوضحاً سيرها متمرجح=كـنـها فـتـاةٍ مـن الـبـنـي فــروع
وضحاً ندللها ونـتـبــع شــفــهــا=لاقـعـد ربيب العـش مـعـه تبوع
وياراكـب اللـي ريَـفٍ هذيــلـــه=توَه على حسب الطلب مصروع
نص النضو محمد ويلا جـيــتـه=يآخذ علومك والنـضـوْ مـقـروع
تراه بيقول ياراعي النضو هـيــَد=يويمـن وخـل شـديـَده مـجـفـوع
وتســــــابقوه الجـمـاعة كـلــهــم=قـرومٍ لافـيـهــم خـجلٍ ولادنـوع
وتسابقوه يبون المرجلة وعلومه=وسبقهم إبن غدفان على المطموع
ثم قل لهم وليدٍ يستعي في حربكم=كنه حصانٍ مابعـد جــاء طـــوع
وقولوله إن جيتوه وإلأ جاكــــــم=وأخير مـاجـابـه يـبـي كـرسـوع
وكرسوع حلفله بالله وعياَ يرضى=وعـيـاَ يـطـيـع فريضة المشروع
ولاعندنا له إلأ ضــرب الهنَمـــي=ومـخـيـَراتٍ ضـربـهـن شلــــوع
ينشد غنيمٍ يوم ذاق ضـــــربــنـــا=يمشي معه ومـنـكـبـه مقطـــــوع
خلاَ المزيَن ماإنثنا دونـــــــهــــا=فوقه عماشاء خشمها مقطــــــوع
خمسه وتسعين غدوْ من وقعــنـــا=مثل الخشب في واديٍ مصــــروع
سبعان ياظفرهـــم فــي بيعتهــم=يوم إلتقينا في العريق جمــــــــوع
فرحو بنا يوم إنفركنا ســــاعـــة=كأننا عـيـالٍ يـلـعـبـون الشـــــــوع
مير إنا خدمناهم بضرب سيوفنا=لين الصعب من ضربنا جاء طوع
يانعم والله ياصـــلايــب جــدي=يوم الميازر ضربــهـــن يــــروع
وبسام خلي طايحٍ متكــــرســع=لاهوب في ســـرقٍ ولامــمــنـوع
لين هج السهلي يسحب عباتـــه=يدعــي مــعــه كـلـب الغـنم جدوع
ولاخاين إلأ من خان أخو السر=خـوي خـدعـانٍ يـامـال الــــــروع
أخوه من السر رديف إشــــداده=أخوه لافيه لاطـامـع ولامــطمـــوع

اما هذه اتركها لكم مع بعض التوضيحات

كـل الشـروع الطيبـه بانينهـا=واللي يخلي شـرع جـده هافـي
يوم ابن عنّـاز1) ذبـح فـي جـاره=والقصـيـر خــلاه مـكـلافـي
بيع اللحم عيـب ٍ 2)علينـا منتظـر=مناب من يظفـي عليـه الفافـي
حقتنـا مـنـه ثــلاث3) فقـايـر=قسـم الرديـف لأدبحـن زلاّفـي
فتـرى الغييثـي ماتـرد عطيتـه4)=يوم العطى بين الرجـال اسلافـي
وجدنـا زبــن المجـنّـا لاوزى=ومن يزبـن فينـا وهـم متعافـي
واللي مكذبني هـذا ابـن مطـرّف5)=يـوم الشريـف يـدوره بآلافـي
حال الفديـري والفويضـل دونـه6)=يـروون حـد معكفـت الاسيافـي
يـوم المزيـن بالحديـد مقـيّـد=ومصقلاتٍ ٍ فـي اللقـاء تنشافـي
لين اقضى حكم الشريف ودولتـه=خطلان الأيدي طوعـوا الأشرافـي
رصاصنا خطر ٍ على قتـل العـدو=خطر ٍ على الشيخان منـه اتلافـي
مثل( المرضف) 7(والعضب)8 ردوبه=ولا (ابن الجبعا) 9في محير الجافي
وإلا( المهري) 10اللي يقـدي سربـه=وإلا( ابن معدّل) 11مكـرم الضيّافـي
يازيـن فزعتنـا لخطـوا هجمـة=لامـن لحقنـا خليـت عطّـافـي
مثل (الضياغم )12يوم جانـا عندهـا=هـم التقينـا بالفشـق وقّـافـي
ماقصـروا فينـا وفـك لـنـا الله=قمنـا نعـزّف جيشهـم عزّافـي
هـذا طريـح ٍ وهــذا مدعـثـر=من بيننـا مثـل ارنـب الحذافـي
يازيـن فزعتنـا( لـذود انقاعـه)13=قدم آل عازب جيشهـم الأردافـي
بعنـا عليهـم بيعـة ٍ ينحكيبهـا=معنا ابن طامي ٍ حاضر ٍ يشتافـي
ماردنا ضـرب الكريـزي دونهـا=لين انثنـت لحوارهـا المشعافـي
يازيـن فزعتنـا لراعـي ليـلـى14=بجمع ضرير ٍ فـي ايديـه اتلافـي
جمع ضرير ٍ صامـلٍ فـي بيعتـه=شيبـا جهلهـم مامعـه عرّافـي
يوم جتنا الفنسـا15 تهـل دموعهـا=وتقـول وليـت دارنـا ياكـافـي
يوم نار ابن سبهان16 وخلى الديـره=ماسرّتـه عبـده وبـن حـلاّفـي 17
لاشـك جاتـه لابـة مصـطـورة=ربـع ٍ تـورد شـذرة الاسيافـي
ثم هج من الديره ماعـاد يبغيهـا=صابه من الشر الشريـر اخفافـي
من ضربنا الواقع وراي شيوخنـا=شرب الكزز من عقب شرب الصاف
فحنا حمـا الـدار وحنـا عزهـا=والله مانرضـى لـهـا بخـلافـي

1: ابن عناز هو جد ال عناز له كانت الحرب مع المخاريم عندما زبن عنده رجل واندلعت الفتنه بين الغييثات والمخاريم ثم تم الصلح بينهم على يد امير الدواسر ابن بدران في قصه مشهوره ،

4-3-2:الغييثات هم اول من حرم بيع اللحم في الدواسرولهم قسم الفقار بين الدواسر وعطيتهم لا ترد يقول دغش بن بطي :

وترانا في العطيه سلمنا عطيت سويقات=والى منا عطينا مانرجعها ونرجيها
وترا بيع اللحم عيبن علينا نرفض البيعات=سلوم طيبه عند القبيله مانخليها
وترا قسم القبيله من اللحم ساعت الكرمات =فقارً وافين خلف السنام وحقنا فيها

5- ابن مطرف زبن على محمد بن فادر الغييثات في قصه مشهوره موجوده في المنتدى

6- فارسين من اشجع فرسان الغييثات ذكرا في ابيات ابن مطرف

موجوده الابيات في المنتدى ولقد ذكرهما بن مطرف في ابياته

قال :

وترى عنزتي منهم الفارس (( محمـد ))=عليـه مـن جديـد الجـوخ لحـاف
وصفراء(( الفويضل)) كنهـا مهجـورة=عليهـا مـن زيـن البتـات لحـاف

7-المرضف :فيصل المرضف امير ال مره

قال بن عيد ابيات منها :

دوك المرضف عند هيت ٍ ذبحناه = وربعه عقبه لجايا ضعوفي

8-العضب :احد عقداء الدوشان من مطير قتله سعد الحديبي

وقال أحد المطران :

مخيلة ٍ وبلها يركي = والقريزي هلل ماها
الخيل عدة من المركي = ضرب الغييثات عداها
والخيل بيعة على التركي = ياعلاها الزود وفلاها
يا جادل ٍ عندنا تبكي = تبكي العضب ولا جاها
9-ابن الجبعا:احد عقداء الدوشان قتل مع العضب

10- المهري :خزام المهري قتل في احدى غزوات ابداح الحطيم شيخ ال سلمه الغييثات

11:مناحي المعدل كريم وشيخ قبيله السهول

12-جماعة هايف الفغم المطيري ويوم هل العشر

13-من العجالين

14- هي فزعت الغييثات للعجالين عندما غزاهم ابن رشيد

15-الفنسا ابنت شيخ العجالين استفزعت بشيخ الغييثات وفزعو لها الغياثات

16- قائد جيوش ابن رشيد عند دخوله الافلاج

17-ابن حلاف الظفيري كان مع ابن سبهان

تقبلو محبت كاتب هذه السطور

ابو زيد الغييثي[/COLOR][/CENTER]

**معلومات** **العضو** · 19-03-2008, 02:38 PM

تعديل لبو زيد الغييثي
زبنا على رجال ال زايد طوال القنا للحاربين عساف
ترا عنزتي رجال ال فادر عسى دارهم عقب الربيع تصاف
عيا علينا عامر بحيلته ويسوق في وجه الشريف اعطاف

**معلومات** **العضو** · 19-03-2008, 06:11 PM

اقتباس:

المشاركة الأصلية كتبت بواسطة ابن حبيان

تعديل لبو زيد الغييثي
زبنا على رجال ال زايد طوال القنا للحاربين عساف
ترا عنزتي رجال ال فادر عسى دارهم عقب الربيع تصاف
عيا علينا عامر بحيلته ويسوق في وجه الشريف اعطاف

اررحب يا بن حبيان

تختلف الروايه من رجل لآخر وهذا شي

ليس بغريب

ولاهنت على ايراد روايتكـ

ابو زيد

**معلومات** **العضو** · 28-03-2008, 09:46 AM

الغييثات الغييثات الغييثات

دواسر الغثييات

الله يرحم الشاعر الفحل هجاج بن عيد الغييثات الدوسري

**معلومات** **العضو** · 07-08-2009, 02:36 AM

ابن مشخص
بيض الله وجهك على هذا الموضوع

ابوزيد الغييثي
بيض الله وجهك على الايضحات الوافيه

**معلومات** **العضو** · 07-08-2009, 04:02 AM

**معلومات** **العضو** · 15-08-2009, 12:01 AM

لاهنت

الله يرحم الشاعر والفارس الرمز هجاج بن عيد

**معلومات** **العضو** · 05-04-2012, 07:53 PM

رحت صوب العموده لين شفت الضعون هيضت مابقلبي والذي قد مضا
حتى ذا العين من شوف العرب يرتون
من سحاباغزيرا من ورده ارتوا
حي ذا العين من شوف العرب يقنصون
من قنص صاد صيدا ومنه شتوا
حي ذا العين من شوف العرب ينزلون
في فياضيا نفلها بنبات استوا
حي ذا العين من شوف العرب يطوون
عقب ما لاذ عشب مراحهم ولتون

شاعرشيخ مانع بن دهيم بن ادريس الغييثات الدوسري @كاتب من ابناءه

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
اللقاء التاريخي مع الأمير علي بن محمد بن وقيّان أمير قبيلة الغياثات	الإداره	:: قسم اللقــاءات والفعاليات والتغطيات الخاصة::	57	17-04-2013 10:52 PM
الدراسة التفصيلية الكاملة لشعر المحاورة	عقاب بن هذال ال بريك	:: قسم المــحــاورة والألــغـاز::	8	09-10-2010 08:54 PM
التغطية المصورة لحفل زواج الشاعرمشيع الغييثات والاخ فهد الغييثات	الإداره	:: قسم اللقــاءات والفعاليات والتغطيات الخاصة::	23	08-10-2010 12:21 AM
التغطية الـمصّورة للحـفل الثـاني لموقع الدواسر الرسمي برعاية الغرره	الإداره	:: قسم اللقــاءات والفعاليات والتغطيات الخاصة::	29	18-08-2007 06:40 PM

الذين يشاهدون محتوى الموضوع الآن : 10 ( الأعضاء 0 والزوار 10)

		منتديات صحيفة وادي الدواسر الالكترونية