القهــــــــــــــــــــــــــــــــــــــــــــــ ــــــوه

[معلومات العضو بن شايق]

السلام عليكم ورحمة الله وبركاته
القهوه رمزاً للضيافه



تعتبر القهوه عند الباديه رمز الضيافه والكرم والجود فلذلك حاولت جمع ماستطعت جمعه من الشعر الذي تغنوا به الشعراء عن القهوه ، واليكم ماجمعت وأتمنى إني قد وفقت بإختياري لهذا الموضوع الذي نعتبره جميعاً رمز للأصاله والجود عند البدو:

القهوة العربية كانت علماً على الكرم والرجولة والطيب في تاريخ الآباء والأجداد وقد تغنى بها كثيرا من الشعراء
ومدحوا كثيراً من الكرماء الذين عرفوا بالكرم (وقهاويهم ) نسبة إلى القهوة ( مبرهجه) أي مفتوحة طوال الوقت :


يقول الشاعر محمد بن أحمد بن محمد السديري:


صبه ومده يا كريم السبالي
يبعد همومي يوم اشمه بالانفاس
فنجال يغدي ما تصور ببالي
روابع تضرب به أخماس وأسداس



وكذلك هناك القصيدة المشهورة للشاعر دغيم الظلماوي في القهوة، وفيها يقول:


يا كليب شب النار يا كليب شبه
عليك شبه والحطب لك يجابي
الوالمه يا كليب عجل بصبه
والرزق عند اللي ينشي السحابي
حنا علينا جيب ماها وحبه
وعليك تقليط الدلال العذابي
ادغث لها يا كليب من جزل خبه
وشبه الى منه هبا كل هابي
باغي إلى شبيتها ثم قبه
تجذب سراة من بعيد غيابي
بنسرية يا كليب صلف مهبه
متلطمين وسوقهم بالعقابي
صبه لقرم صرفته ما حسبّه
يوم البخيل مدنهر الوجه هابي
وعده عن اللي ما يداري المسبه
اللي يدور بالقصي الغيابي
لا جاضع المتروع خطو الجلبه
يا حلو تالي الليل خبط الركابي
اقحص لهم وابدي سلام المحبه
لا شح بالهين كبير العلابي




وكذلك يقول الشاعر سعد بن حمد بن ضويان في القهوة:


ياحسين لاكني على الجمر مجضوع
من فقد خلاني وفقدي ربوعي
قم سو فنجالٍ ترى الراس مصدوع
صفه وزله عن سريب الخموعي
فنجال فيه مخموس الكيف مجموع
بدلال يشدن الخباس الوقوعي
ونجر دلاله ماو بالصوت مفجوع
يا زين حسه والخلايق هجوعي
وانجاك بالمجلس سنافي وبالوع
عده على الطيب وكب البلوعي




وهذا راكان بن حثلين يقول في قصيدة مشهورة:


ياما حلا الفنجال مع سيحة البال ...في مجلس ما فيه نفس ثقيله
هذا ولدعم وهذا ولد خال... وهذا رفيق ما لقينا مثيله



والشاعر / مدوخ بن ضمنة المطيري

في قصيدة رائعة يوصف بها القهوة و كيفية عملها ومن يستحق أن
تقدم له ..



البن كيفه عنـد مـن يشترونـه=الطيب اللي جابها مـن بلدهـا
يا حامسين البـن لا تحرقونـه=داروا على الحمسه يعدي صمدها
حتى يجيك محمـر تقـل لونـه=بزة جرادة طالعة مـن جسدهـا
عده على اللي لابتـه يدهلونـه=له ربعة من قام منهـا حمدهـا
وأثنه على اللي بينات أطعونـه=الخيل يركبها الوعر مع سندهـا
وصبه على اللي لابته يتبعونـه=مع دربه الخلفاء تضيـع ولدهـا
وعده عن اللي واقف وسط شونه=ليا باع شاته حافظلـك عددهـا
وسط الجماعة طايرات عيونـه=في كل يومن يحتسب في وعدها





والشاعر / عبلان بن سعد العجمي له قصيدة يبين فيها من يستحق القهوة ...



أوي والله كيفـه يـا مطالـيـق=ما هى بكيفة لا عبين السبـاره
كيفة أدلال بالوصايف غرانيـق=بيض تقلط صوب ضو المنـاره
ومحماسة يحرق بها البن تحريق=وتحمس وتفهق عاد فيها صفاره
فنجالها يأتي طـري ليـا ذيـق=من الخوي يبري من الراس داره
لا صب بالفنجال ما به سواريق=مونة نظيف زايـد فـي بهـاره
ويصب للفرسان خيالة الضيـق=نطاحة الفرسان في كـل غـاره
ويصب للي فرق المال تفريـق=ما هو يحسب ربحها والخسـاره
ويصب للي يحتمون المشافيـق=لا جاء نهاره فيه يشبك غبـاره
ويا الله أنا طالبك حظ وتوفيـق=والحظ ما هو للفتـي باختيـاره




و كذلك الشيخ سلمان البلوي له وقفة مع القهوة بأبيات رائعة تقول ..


يا مسوي الفنجال عجل بسوقـه=خص الشيوخ وبد ناس على ناس
خص الشجاع اللي تحلى طروقه=فكاك ربعه يوم الاريـاق يبـاس



و كذلك الشاعر محمد القحطاني يوصي ابنه ....


يابو محمد شب واقضب مكاني=في غيبتي قهو الرجال المشاكيل
وفل الحجاج لكل من جاك عاني=وابدا التحيه قبل سوق الفناجيل





و يقول الشاعــــر مشعــــان بن هذال العنزي :


قـم سـو فنجـال تـرا الــراس مـنـداش=لعيون من قرنه علـى المتـن مرجـود
ياابن المهارش كب حمسات الادقاش=تاتيـك حمسـات الينابـج بهـا ســووود
ودقــه بنـجـر يسمـعـه كـتـل طــراش=ايضا إلى حرك على الهـون بـه زود
وحـطـه بـدلـة مـولـع كنـهـا الـشــاش=وبهرها مقدار خمسـة عشـر عـووود
الهـيـل حـطـه لا تـدانـا ولــو جـــاش=ومن الزيـاد اقنـع علـى شـذرة العـود
جيـبـه رســم للنشـامـا عــن الـــلاش=الـــلاش لا فـاقــد ولا هـــو بـمـفـقـود
الطيـب سنـده والـردي ذاك مـن لاش=واللـي يريـد الطيـب مـاهـو بـمـردود
لـــذاذة الـدنـيــا مـعـامـيـل وفــــراش=وصينـيـة يقـبـل بـهـا العـبـد مـسـعـود
وصفر الى جا العصر عند كل هباش=تطـاوحـن قـلــب المنـاحـيـر بـالـعـود




هذه الأبيات لمحمد بن ونيان من بني علي من حرب , فقد كان رجلا كريما لكن أموره المادية كانت تخذله أحيانا ولا تأتي على مايريد .. في ليلة ما تناول ربابته وارتجل قصيدة معبرة منها :



لاضاق صدري جبت نجـر ودلـة=وسويت مايطفـي لهيـب بجاشـي
وان جا المسير عمس عندي دوى له=فنجال ماسـواه خطـو الخداشـي
بكر على بكـر ليـا جيـت ازلـه=يشبه خضاب مردوعـات النقاشـي
يوم ان ولد الـلاش ياقـف بظلـه=كنه على درب المراجـل يهاشـي
حين هشيـم وحيـن نوقـد بجلـة=ومـر نبهرهـا ومــر بـلاشـي
ونوب بيسر ونجمـع الكيـف كلـه=ونوب على الشاميـة أم الغشاشـي



غازي بن عون ::
..............................
يا ريف قلبي للمسايير قم شب

وحط المنارة في طويل الظلالي

عقب تشق لها لجزل الحطب جب

وهات النجر واحضر جداد الدلالي

دنّه وخلّه للمسايير يجذب

لا قام صوته للنشامى يلالي

يوحونه الجيران لا قام يقنب

ويجيك الاقصى والقصير الموالي

تحياتي

 

 

 

 

[معلومات العضو ابن وتيد السباعي]

لاهنت يابن شايق على الموضوع المميز جدأ

 

 

 

 

[معلومات العضو م/ سيف الجماعيين]

اشكرك على مجهودك الرائع واقولك لاهنت.
تحياتي.

 

 

 

 

[معلومات العضو ابوعبدالرحمن الودعاني]

تستاهل الفنجال على ذا الموضوع الطيب ..لاهنت

 

 

 

 

[معلومات العضو بن شايق]

تستاهلون الطيب وجزاكم الله خير على المرور الكريم

تحياتي

 

 

 

 

[معلومات العضو مبارك الخييلي]

أبداااااااااااع
يابن شايق
الله لايهينك
علي هذه الأبيات
وتقبل الشكر والتقدير

مبارك الخييلي

 

 

 

 

[معلومات العضو ابو زابن المسعري]

ارحب يابن شايق

موضوعك رائع وجميل

لاهنت وبيض الله وجهك

 

 

 

 

[معلومات العضو نايف الخييلي]

الله يعافيــكـ يابن شايق

موضوع مميز ورائع أبدعت في كتابته

 

 

 

 

[معلومات العضو أبونواف الدوسري]

لاهنت يابن شايق على الموضوع المميز جدأ

تقبل الله طاعتك

 

 

 

 

[معلومات العضو بن شايق]

ياهلا ومرحبا بكل من شرفني بهالزياره
والشهاده لله ان الي يستاهل الشكر هو صديق ارسلها لي بالايميل وانا حبيت اشارككم بهذا الموضوع الجميل وامانة جزاه الله كل خير على مجهوده الطيب
ولو ان المدح مغري الا ان الحق حق والشكر كله لصاحب الموضوع

تحياتي