في دمتي ما عاد باقي رجاجيل ...............

[معلومات العضو ابو طارد]

السلام عليكم ورحمة الله وبركاته

هذه قصيدة الشاعر/ وصل العطياني

اعجبتني فاحببت ان انقله لكم

هذي طبوعي كل ما عسعس الليل=أصلّـح الدلـة وأجـر اللحونـي
بريـةٍ موزونـة البـنّ والهيـل=والماء بوزن وحيّ هاك الوزونـي
منهـا تكيّفنـي ثلاثـة فناجـيـل=وأرتاح ويطير النعس من عيونـي
وأراجع الذكرى وأجـرّ المواويـل=والذكريـات بكـلّ شكـلٍ ولونـي
البعض منها يشرح الصدر بالحيل=والبعـض لا والله يجـدد طعونـي
وأرجع وأفكّر في الليال المقابيـل=لعل وقتـي مـا يخيّـب ظنونـي
وأدخل على الله من حياة الغرابيـل=حيث إن همّي ما تشيلـه متونـي
كنّك مفصّل فوقي الهـمّ تفصيـل=لين إلتبسني مثل لبـس الجنونـي
حالي كما حال القلوب المشاغيـل=اللي من أطرف شـيء يتأثّرونـي
لو يشتكون الغبن والجور والميـل=للغيظ وسط صدورهـم يكتمونـي
فكّرت الا الموضوع يحتاج تحليـل=وفنّ الدراسة واحدٍ مـن فنونـي
عرفت وش عكّر مزاج المشاكيـل=يوم إنهم مـن وقتهـم يشتكونـي
أول سبب: نقالـة القـال والقيـل=الطغمة اللـي جعلهـم يذهبونـي
قلوبهـم بالحقـد سـودٍ مغاليـل=ومن طبعهم بالمشكلة يفرحونـي
وثاني سبب: ناسٍ على مثل ما قيل=لا يقطعـون الشّـر ولا ينفعونـي
والله ما يرفع ضغطك إلا المهابيل=العالم اللي في النحـر ينشبونـي
وثالث سبب: ناسٍ سوات المخاييل=على سلوم الطّيب ما يحرصونـي
خلّو سلوم أجدادهم رغو مع سيل=وفي عالم التقليد جو يركضونـي
طشّوا عمايمهم ولبسـوا بناطيـل=والموس فال أشنابهـم والدقونـي
وأرقابهم ما سلمت من السلاسيل=تطبّعـوا بطبـوع هيـم البطونـي
في ذمتي ماعـاد باقـي رياجيـل=إلا القليـل وجعلهـم يثبتـونـي
صفّة بعد صفّة وجيلٍ بعـد جيـل=كلٍ من اللي قبله أنقص وأدونـي
هذي هي الأسباب من دون تفصيل=شرحت روس أقلام بس أعذروني
واللي يبي تفصيل بالحيل بالحيـل=يقـدر يكلمنـي علـى تيلفونـي

وسلامتكم ،،،،

 

 

 

 

[معلومات العضو سعد المقابله]

الله يعطيك العافيه

وصح الله لسانك ولسان الشاعر

ولاهنت