اللقاء التاريخي الشامل مع الأمير ناصر بن فيصل بن حفيظ وأسرة آل حفيظ الكريمة

[معلومات العضو الإداره]

بسم الله الرحمن الرحيم


والصلاة والسلام على أشرف الأنبياء والمرسلين سيدنا محمد وعلى آله وصحبه أجمعين.


الأخوه أعضاء وزوّار موقع قبيلة الدواسر الرسمي


يسرّنا أن نضع بين أيديكم اليوم لقاءا ً تاريخيا ً شاملا ً فريدا ً من نوعه ،اجراه موقع قبيلة الدواسر الرسمي مع الشيخ ناصر بن فيصل آل حفيظ بحضور جمع كريم من أسرة آل حفيظ العريقه .

فبدعوه كريمة من أسرة آل حفيظ العريقه، التقى الأستاذ هايف بن مبارك العماني رئيس موقع قبيلة الدواسر الرسمي مع جمع من أسرة آل حفيظ الكريمة يتقدمهم الأمير ناصر بن فيصل بن حفيظ والأمير محمد بن مناحي بن حفيظ وعدد من اسرة آل حفيظ .

وقد أجرت ادارة موقع قبيلة الدواسر الرسمي مع الأمير ناصر بن فيصل آل حفيظ، هذا اللقاء التاريخي والذي يتناول في طياته سيرة هذه الأسرة المجيده وقبيلة الشكره العريقه تلك القبيلة العزيزة اشتهرت بفزعاتها الشهيرة ونخوتها الدوسرية وكرمها الزايدي .

قبيلة اشتهرت بألقاب عديده تدل على شجاعتها واقدامها فهم (( أهل الست)) وسجلهم حافل بالقصص والوقعات والشواهد على ذلك فهم أهل الشهامة والحميّه والفزعه ، وعرفوا بمحبتهم لقبيلتهم فنالوا محبة الجميع واحترام جميع القبائل في الجزيرة .

قبيلة انجبت انجبت فرسان وابطال وشيوخ وشعراء خلدوا أسماءهم واسم (الدواسر) في صفحات المجد بأحرف من نور ، سواء بالشجاعه أو بالكرم او بالحميا والفزعه ، فاذا قلنا الشجاعه ذكرنا ابن حفيظ واذا قلنا الكرم ذكرنا كريم سبلا ابن هذال.


ويعتبر الأمير ناصر بن فيصل آل حفيظ أكبر أسرة آل حفيظ سنا ً ومن أحفظهم لتاريخ هذه الأسرة العريقة التي سطرّت الكثير من الأمجاد والمفاخر ، والتي يعتز بها كل فرد من أبناء قبيلة الدواسر العريقة .كما يعتبر الأمير ناصر بن فيصل آل حفيظ من أمراء قبيلة الدواسر المعروفين والذي لهم مواقف كريمة وشجاعه تحسب له مدى الدهر .نسال الله ان يطيل بعمره ويمتعه بالصحة والعافية .


أجرى اللقاء :

الأستاذ هايف بن مبارك العماني الغييثي .

أجاب عن الأسئلة :

الأمير ناصر بن فيصل بن عجب بن حفيظ .

حضر اللقاء وشارك به :

الأمير محمد بن مناحي بن حفيظ ، الأمير فرج بن عامر بن حفيظ ، الأمير عجب بن سند عبدالله بن سند بن حفيظ رئيس مركز المثناه بالأفلاج ، الشيخ الداعية حفيظ بن عجب بن فيصل بن حفيظ ، الشيخ سند بن عجب بن فيصل بن حفيظ ، وجمع من أسرة آل حفيظ الكريمة .




من اليمين : الأمير محمد بن مناحي بن حفيظ ، الأمير فرج بن عامر بن حفيظ ، الأمير ناصر بن فيصل بن حفيظ ، الأستاذ هايف بن مبارك العماني




من اليمين : الأمير فرج بن عامر ، الأمير ناصر بن فيصل ، الشيخ سند بن عجب.




الأمير ناصر بن فيصل آل حفيظ (حفظه الله)




س : بداية يابوفيصل هل تعطون ابناءكم أعضاء موقع قبيلة الدواسر الرسمي بطاقتكم الشخصية؟

ج : بكل بسرور ، اما بالنسبة لي باسمي الكامل :

ناصر بن فيصل بن عجب بن محمد بن فرج بن حفيظ
واشغل رئيس مركز مقبوله احد أحياء الخرج .
والعمر : 71 سنه .

س : هل ممكن ان تعطونا تسلسل أمراء آل حفيظ ؟

ج : طال عمرك آل حفيظ اول امارتهم على فرحان بن حفيظ ولم يعقّب ، وبعده شاخ أخوه فرج بن حفيظ

،وكل أسرة آل حفيظ الموجودين حاليا ً هم من سلالة فرج بن حفيظ .

وآل حفيظ الآن ينقسمون الى أربعة أقسام :

اولهم : سند بن فرج ، أنجب عبدالله وعبدالله أنجب شجاع وسند .
وشجاع لم يعقّب أحد ، واما سند فأنجب عبدالله ومسفر
وعبدالله أنجب : شجاع وبادي ومسفر وكذلك سند ، وسند أنجب عجب بن سند بن عبدالله رئيس مركز المثناه بواسط بالأفلاج.

ثانيهم : محمد بن فرج ،

وأكثر آل حفيظ من سلالة محمد بن فرج ، ومحمد بن فرج أنجب :

سند ، وعجب ، وعامر ، و فرج ، وفرج انقطعت سلالته .
فأما الأمير سند بن محمد بن فرج أنجب : مناحي ، وتريحيب ، ومحمد ، وشجاع .
ومناحي بن سند أنجب : سند وفيصل وشجاع وعجب ومحمد .
واما تريحيب بن سند أنجب : عماش .
ومحمد بن سند أنجب : فهد.
وشجاع بن سند أنجب : خالد .

وأما الأمير عجب بن محمد بن فرج فأنجب : فيصل وحسن
فأما فيصل بن عجب : أنجب عجب بن فيصل وناصر بن فيصل في (مقبوله)، ومحمد بن فيصل وفهد بن فيصل ، وفيصل بن فيصل .
وأما حسن بن عجب فأنجب :
محمد وبداح وفيصل وفرج وعجب وعبدالله .

والأمير عامر بن محمد بن فرج أنجب : محمد ، وخالد وفرج ،
وثالثهم : شايع بن فرج ، وأنجب مسفر وفرج ومحمد
ورابعهم : بدّاح بن فرج ، ولم يعقب احدا ً .





لذلك يتضح أن التسلسل الزمني لإمارة آل حفيظ كالتالي :

1- فرحان بن حفيظ.
2- فرج بن حفيظ، وبعده ابنه سند بن فرج بن حفيظ ، ولم تطل به حياته.
3- محمد بن فرج بن حفيظ.
4- سند بن بن محمد بن فرج بن حفيظ، وهو اكبر أبناء الأمير محمد بن فرج بن حفيظ.
5- عجب بن محمد بن فرج بن حفيظ، وهو شقيق سند وتولى الامارة بعد وفاة أخيه. وهو أيضا ً أمير هجرة مشيرفه بالخرج .
6- مناحي بن سند بن محمد بن فرج بن حفيظ وتولى الامارةبعد وفاة عمّه الأمير عجب.
7 - سند بن مناحي بن سند بن حفيظ وتولى الامارة بعد وفاة والده،
وناصر بن فيصل بن عجب وهو أول أمير لـ(مقبوله) .
وعجب بن سند بن عبدالله رئيس مركز المثناه بواسط في الأفلاج.
8-محمد بن مناحي بن سند بن محمد بن فرج بن حفيظ



وآل حفيظ كلبوهم دربهم واحد وسنعهم واحد والله يعز الإسلام



س : أبا فيصل ، ستكون بداينا بالأمير فرحان بن حفيظ ، فهل تخبرنا بموقفه اثناء مغزى ابن سعود على الأفلاج وماهي تفاصيلها ؟

ج : قام واحد من العربان ويروح لابن سعود في وقته الإمام عبدالله الفيصل .
وقال :

ياطويل العمر أنا وراي أنهار تمشي ماعليها الا شملول بدو ماهم مقدرٍ لها وتصلح لك .

وقام ابن سعود وارسل له قوة فيها عدد من القبائل ، احد قال انها بقيادة جلوي بن تركي آل سعود ، واحد ٍ قال بقيادة محمد الفيصل .

وعندما علموا أن آل عمّار الدواسر ، ان ابن سعود بيجيهم بقواته ، فاركبوا مستحمي (طلب فزعه) ، حوّل على آل حفيظ والشكره ، وقال :

انـّا بيجينا أمة ٍ ماعاد لنا فيهم نطحه (لاطاقة لنا بهم) ولا تخلوّنا.

قام فرحان بن حفيظ وهو وجماعته وحوّل وناوخ مع آل عمّار ، وخذوا في المناوخ حوالي شهرين والحلال معقّل ( مقيّد) .
وعندما علم فرحان بن حفيظ أن من ضمن القوات المهاجمة ابن حثلين وجماعته ، أما فلاح او ابنه راكان ، قام ابن حفيظ وارسل هذه الابيات لابن حثلين :

يالله يالمطـلـوب ياخـيـر مـزهــوميامخرج ٍ نفـس الفتـى مـن وحلهـا

ياراكـب اللـي ينبـه الكـور مزمـوممثـل السفينـه علقـوا فــي دقلـهـا

يلفي (لابن حثلين) زبن كل مضيومزبن الحدور اللي هفـت فـي نقلهـا

فأمّـا حـمـا لـديـار ذبـاحـة الـكـومولا شهر واقفى وعنـدي بدلهـا (1)

يذكـر لنـا منافعـهـم دايــم الــدومبسيوف هند ٍ تعجب اللي نقلهـا(2)

1-سبق وان قضى ابن حثلين فترة من الزمن مع آل عمار في ديرتهم ويذكره بال حفيظ بذلك وبموقفهم الطيبه معه .
2-يذكر ابن حفيظ ابن حثلين بمواقف الدواسر الطيبه مع قبيلة العجمان في عدة معارك (كالرضيمه) .


فلما وصلت القصيدة لابن حثلين ، انسحب هو والعجمان من القوة المهاجمه.


ابن سعود جاء بقوته وناوخ ، يبغي ان آل عمّار يبدؤون بالهجوم ، وأهل الديره يبغون القوات التي جاؤت هي من يبدأ بالهجوم .

المهم خذى لهم شهرين والابل معقّله واصابها الجوع وقامت الابل ترمي حيرانها وتأكل صعدها (الحوار غير مكتمل النمو) من شدة الجوع ، وقام راعي من الدواسر وفك ابله عشان ترعى من الحمض اللي قدامها .

شافت خيل ابن سعود الابل ترعى وكدّت عليها ( هجمت عليها ) وراحت بها .

ويلحقونهم واول من لحقهم خمسة خيالة من الشكره .وأعلقوا بسلاحهم واللي عقر عقيله واللي ذبح رجال ، وتلاحقت الفزاع للطرفين . وانسكرت القوة المهاجمة .وفك الله آل عمّار ووطنهم .


وبعد المعركة قال فرحان بن حفيظ هذه القصيدة مكملاً لقصيدته السابقه :

واللي مهيضني حنيـن أم قعصـومبيـن القرايـا نوّخـت فــي سهلـهـا

طويلة النسنوس ماهيـب زرمـوميـــوم الـهــداد معـربـيـن فحـلـهـا

نوّختها يـوم التقـى البيـع والسـومعـنــد آل عـمّــار يــثــوّر نـفـلـهـا

ونوّختها يـوم التقـى كـل شغمـومعند الغروس الداجيـة هـي وأهلهـا

فالله على الى بدل الصلب بالقومهو مادرى إنهـا خجلـة مـن خجلهـا

لهـوب مـن قـلاً ولهـوب مضـيـومولاب مـثـلـه يـــوم دبـــر فعـلـهـا

والله لـولا الديـن راعيـه مـرحـومماعـاد يـرجـع مــن ديــار ٍ نزلـهـا

اما القصيدة الثاني فهي للشاعر من الوداعين يقال له الهذية (الشاعر الكبير مبارك بن شيبان آل ضويّان).

وكان أعمى وكان وقتها حولهم ، وبنته تقوده ، ويسألها :

علميني ويش صار على ذي الأمة اللي مناوخٍ بعضها لبعض .

فعلمته بنته بما حصل ، وعلمته بالخمسة الخيالة الشكره الذي كانوا أول من لحق الإبل .

فانشد الهذية :

قـم يامقهـوي قــام نـاعـي مــن شـنـاكســـــو فــنــجــال بــــــن ٍ بـاعـتــجــال

فـــي دلال ٍ وصـفـهــا مــثــل الـنـجــوممـاثــنــاهــن الـمــقــهــوي بـالــحــثــال

خــمــســة ٍ نـفـلـتــهــم ذاك الــنــهـــاريـوم غـدى ضـرب الفشـق مثـل الشعّـال

مـنــهــم ( وقــيّـــان بـــــن ريـــعـــان)حـربـتــه خــجّــت طـوابـيــر الـشـمــال

والـمـنـافــق بــالــخــرز دزّه (ابــــــداح)فــي الشقـيـب وقــال ذا قـبــر ٍ هـيــال

ومـنـهـم (فـــرّاج ) وديـــع المـسـمـنـاتقــال جنـبـوا عــن در حـلـوات الـوشــال

ومنهم (حسين الجرو) رحمة المولى عليهجعـل لــه فــي الجـنـة الخـضـرا ظــلال

الـصـبـي (الـزايــدي) وافــــي الـشـبــورحــربــتــه مـــاجــــرّت الا بـالــحــبــال

أما البيت الذي يذكر فيه الرجل الخامس فللأسف لا أحفظه .



س : ماهي سالفة فرحان بن حفيظ مع عمّال ابن رشيد الذين يجمعون الزكاة ؟

ج : كان فرحان بن حفيظ مقيّظ مع جماعته على مشرب من مشارب (الأفلاج) ، وهو بدوي يشد وينزل .

ويوم جاء وقت الزكاة لين ذا طارفة ابن رشيد جاية ٍ تريد جمع الزكاه .
قال فرحان بن حفيظ لهم :
هاذي زكاتكم ، الحاشي ذا خذوه .

ويوم جاؤا يريدون أخذ (الحاشي) ، جاءت أخت للحاشي (بكره) أكبر منه تخطّم على اخوها (الحاشي) تريد ان تردّه .
فلحقوا اهل الابل يريدون ان يرجعوها ، فتعصّت عليهم حيث انها تريد ان ترد اخوها (الحاشي) .

فقال عمّال الزكاه للرعيان : يا اخوان حوش الزكاه قريب من هنا ، دعوا (البكره) مع اخوها (الحاشي) حتى نصل الى حوش الزكاه ، ثم ندخل (الحاشي) في الحوش ثم نغلق عليه الباب وبعدها ترجع البكره عليكم .

راحوا الرعيان وياهم ويوم وصلوا حوش الزكاه ، طمعوا ايضا في (البكره) فادخلوها مع (الحاشي) في الحوش وطردوا الرعيان وقال واحد من العمال (عبد) وهو يزجرهم :

يالله توكلوا على الله !!!!

قالوا الرعيان : يابن الحلال زكاتكم فقط هذا (الحاشي) .

قال العبد : يالله روحوا ، البكره هاذي تصلح للشيوخ ، وقام العبد وطردهم .

جاءوا الرعيان وعلموا فرحان بن حفيظ وجماعته ، وهب جماعته يريدون الفزعه ، فقال لهم فرحان :

لا لا ، لحد يفزع ، من جاء وقت مصدار ابله فليصدّر واتركوا الأمر لي .

يوم جاء حل مصدار الابل ، أخذ فرحان البشت وجعله بينه وبين بشته ، وذهب لحوش الزكاه .
وعندما وصل للحوش وجد (العبد) حاط ٍ رجل على رجل عند باب الحوش .

فهوى فرحان بن حفيظ بالسيف على راس (العبد) فقطعه . وأظهر بكرته (أم قعصوم) مع اخوها (الحاشي) وجعلهم يعارضون امهاتها .

وانشد فرحان بهذه المناسبة هذه الأبيات :

ياهـجـن ياعـجـلات حــل المـراحـيلا مـال مـن فــي المقـيّـل الأظـلّـه

ليت الردي لامن بغى الكور طاحـيوان جـاء يبـي لعيوزهـن قيـل خـلّـه

ماتنـقـل الا مــن طـيـور الـفـلاحـيواللـي لا مــن نـشّـف الـريـق بـلّـه

بالعلـم نببـوا مبعديـن المنـاحـي(1)ذيدانـهـم فــي كــل قـفــر ٍ تـحـلّـه

عقب (ام قصوم ٍ) ترى الحكم باحيتناكـفـوا يـاهــل الـقـلـوب المـغـلّـه

يالابـتـي حـطـوا علـيـهـم صـبـاحـيحتى يتوب (العبد) مـن مسهـن ٍ لـه

يازينـهـا قــادت عـصـيـر الـنـواحـيتنفـى الصديـر وتعمـل اللـيـل كـلّـه

مـع صـلاة الصـبـح ليـهـي ضـواحـيولـي ذا حنيـن اولادهـا مــرزن ٍ لــه

1- يقصد بهذا البيت جماعته من (الهوامله الدواسر) وزوجته منهم .


س : قصص الأمير فرحان بن حفيظ كلها جميله ، هل تذكر لنا سالفة اخرى له ؟

ج : نعم، بعد الهية التي فزع فيها فرحان لآل عمّار هو وقبيلته ، راحت بهم الأنواء والنيات ، حتى جاؤا (للديره) من تحت (الأحساء) ، والبدو يسمون الديار اللي من فوق الإحساء (الديره ) .

وجلسوا هناك فترة جاذبهم الرعي ، ولم تأتيهم أخبار تشفيهم عن ديارهم بالحيا( المطر) .

وفي يوم من الأيام ارسل فرحان بن حفيظ عبده وقال :

رح هات لنا (شاة) من عند فلان .

وكان فرحان ماعنده غنم عنده ابل .

ويوم جاء نصف الليل ، أمر فرحان العبد أن يذبح الشاه ، وتعشّى مع العبد منها ، وقال للعبد بعدها :

اذهب واجلب واحدة من الجيش(الركائب) ونوّخها عند كسع البيت اهنيّا قريّب، ولحم الذبيحه دعه في صحنه وطبقه (غطّه) .

يوم أصبح الصبح قال فرحان للعبد :

حط الحطب على الضو (النار) وصوّت بالخبر (أي نادي في القوم ليأتوا) .

صوّت العبد ، فإذا الجماعة جايين : العلم يالأمير ؟ّ!!

قال فرحان بن حفيظ لهم :

العلم يسر خطّركم ، أبشروا بالحيا (المطر) على دياركم.

فقالوا له :
من اللي جايك واعلمك بالخبر ؟

قال فرحان :

جايني واحد من بني عمكم عليه (مدري) ولا نيب معلمكم به ، هاذي باقي ذبيحته ، وهذا مبرك ذلوله ، هجدني(جاءني) تالي الليل وسرى (ورحل ) .وترانا حايلين(شادين) وعلى الله متوكلين ، ديارنا مرجوعة(سايله) .


وفرحان لا يعرف ان كان فيه حياء او لا وانما هي حيلة ، وكان قد مل من الديار التي هم فيها ومتبخت ٍ بالله وآمل به الخير وانه سيسقي ديارهم .

المهم حطوا الجماعه العمود على القعود(شدوا) وجاؤوك مسندين ، وعندما أقبلوا على (الدهناء) ، قال فرحان :

اركب يافلان واركب يا فلان ، روحوا وعسوّا (التوضحية) ومسايل بطنانها ، وانظروا هل جاءها مطر ام لا.

ذهبوا العساسه ويحلفون بالله انهم عندما تبينوا مع العروق التي توالي (التوضحيه) اليا التوضحيه كنها بحر جدّه (كناية عن غزارة الماء) ، والسيل يحز في العرق من كثرة الماء .

ورجع العساسه ليبشروا قومهم وقاموا وحذفوا عليهم بالبشوت :


ابشروا بالحيااا !

والله انه من الخرج الا الافلاج وهو مايخرج بخرجه ، والخباري هاذي هي قدامكم مثل البحور .

فزانت هذه الاخبار لفرحان بن حفيظ وفرح لصدق توقعاته ، وأنشد هذه القصيدة :

يالله يــاعــلاّم مــاكــان يـــــدرابأمره اليا منّه نوى الصيف طاحي

راحـت بـه سحـج الخـلايـا تـمـدراوغدا الوعر منها طريـق سماحـي

تبرا المحجّـه بـري يعـودان مجـراطـق الدجـر منهـا كبـار اللقاحـي

وراحت بنا الأنوى على الربع عزراواليا فقد ضاعت علينا المشاحـي

وسوالف الأمير فرحان بن حفيظ ومواقفه كثيرة وطيبه .



س : هل ممكن ان تذكروا لنا من قصص الأمير سند بن فرج بن حفيظ الملقب بـ ( ختاّل الخيل الشجر ) ؟

ج : نعم ، تقارب رجال الدواسر ورجال يام في وقت الصيف في وقت (ورد الماء) ، وكان في (هجلة ماء) يريدون ان يصبحوا عليها جميعهم .

فقالوا اليامية : يا دواسر ، انا بنتوارد انا واياكم الصبح وبيجي بينا علوم ٍ ماتصلح ، انا نبغي يظهر منكم فارس ومنا فارس ، واللي يهزم فارسه يتركون الماء ولاياردونه .

قال الدواسر : من فارسكم يايام .

قالوا : فارسنا الغاوي ،( من العجمان) ، ومن فارسكم يادواسر؟

قال الدواسر : فارسنا سند بن فرج بن حفيظ .

واتفقوا ان يكون ميعاد المبارزة عند صباح اليوم التالي .وكان الجمعان متقابلان وتفصل بينهما مسافة بسيطه.

وفي الليل ، قام الفارس العجمي (الغاوي) يدرب فرسه ويرشها بالماء لتكون مستعدة لنطح المجاول في الصباح وهو يحدي على هذا البيت :

أن سبلوا لي حبة (أم سعود)نطـحـة أنــا منـهـم (سـنــد)

والله أن أنخه نخّـة المفـرودلـعـيــون مــركــوز الـنـهــد

فسمعه سند بن فرج ، فأخذ يحدي على فرسه ويقول :

أن سبلوا لي حبة (أم عويش)نطـحـة مـنـهـم خـيــل يـــام

عـلـي أرد بخيلـهـم للـجـيـشلـعـيـون مـــردوع الــوشــام

وتجاولوا الفرسان عند الصباح وحوّل سند بالفارس العجمي من فرسه ولم يقتله ، ووفوا يام بالاتفاق ونزحوا عن الماء .


وهاذي من مواقف سند بن فرج وهي كثيرة .

س : هل ممكن أن تذكرونا قصة سند بن فرج مع الإمام سعود الفيصل ؟

ج : في فترة الخلاف بين الإمام عبدالله الفيصل وأخيه سعود الفيصل ، كان سند بن فرج من قوم سعود الفيصل .

وطلب الامام سعود الفيصل من سند بن فرج بمحاولة (طرح) فارس من سبيع وهو (وبدان أبواثنين) و كان من قوم عبدالله الفيصل.

وفعلاً تناطح سند بن فرج مع الفارس السبيعي وحوّل به وجابه منيع عند سعود الفيصل وطلب عليه .

فجاء عند سعود الفيصل وقال : انا جاي ٍ لك بحصان واطلب من الله ثم منك جاهي فيه(أي العفو عن وبدان أبو اثنين) .

فقال سعود الفيصل : الله عطاك الا وبدان أبواثنين( أي أطلب ماتريد الا العفو عن ابواثنين).
قال سند بن فرج : انا ماجيتك إلا في وبدان ابو اثنين.
قال سعود الفيصل : الله عطاك اياه (اي عفا عنه واطلقه من اسره) .

وقد اعطى الامام سعود الفيصل سيفا ً لايقدر بثمن لسند بن فرج ولايزال موجودا ً عند أحفاده حتى الآن .وإعطاة كذلك الفرس المعروفه باالدهماء.

س : الكثير يسأل عن سالفة (شعب طلحا ) فما هي قصتها ؟

ج : قصتها طال عمرك ، أنه جاء احدهم عند الدامر(أحد شيوخ وعقداء قبيلة العجمان المعروفين) ، واخبره ان أباعر (إبل) المساعرة على عد ٍ ما عندها أحد وأهلها يتقيضّون عند النخيل ، وسوف أدلك عليها .وفعلا قاده عليها وجاء الدامر وربعه من آل ضاعن وأخذوا الابل من دون وادي الدواسر .

ويوم قد الدامر ظاهر ٍ مع (برك) ، ووصل الخبر للأمير محمد بن فرج بن حفيظ ان الدامر جاي ٍ بأباعر بني عمه ، فتجهز هو وقبيلته لأستردادها منه .

المهم ان الدامر عندما ظهر مع برك ورد على ماء ، وجاءه واحد من بني عمه من (آل شامر العجمان) وهو جار للشكره ، وقال له :
يالدامر يوم أن الله عطاك ابل المساعرة وهم غايبين منها ، اشرب وتوكّل على الله ، عن ذا ابن حفيظ يتعدّاه الصوت ( أي ان ابن حفيظ قريب منكم فسارعوا بالرحيل) .

فرد الدامر :
انا ماجبنا بالابل من بعيد وحنا بنعيّن من يفكها من قريّب .لكن انت ذال ٍ لا تكرمنا .
(أي تريدنا أن نشرب ونرحل حتى لا تأدي لنا واجب الضيافة) .

قال الشامري : لا والله بكرمكم ، انتوا عشرين (خبره) وأنا عندي عشرين عنز .كل خبرة ٍ بحذف عليهم راس عنز .مير ذال ٍ لافجرت بكم خيل الشكره عقب شوي ليني جار ٍ لهم من جهه وانتوا بني عمي من جهة اخرى .

المهم قام الشامري جار الشكرة وكرّم الدامر وربعه .وعارضوا الشكره الدامر وربعه عند (شعب طلحا) وهو شعب يباري (برك) .

وذبح من العجمان ثلاثين ومن الشكره واحد هو بدّاح بن فرج بن حفيظ وكان في بداية شبابه .

وعندما انكسر الدامر وكثر القتل ، تغانم الدامر نفسه وزبن على ابن ملحم الحراجين في بيته ، وقام أهل بيت ابن ملحم وطرحوا العمدان عليه ، ونطح ابن ملحم محمد بن فرج بن حفيظ وعياله اللي معه وجماعته وفريّس الشكره ، وقال ابن ملحم : تكفى يا محمد شايب ٍ زبن عند شايب .

قال محمد بن فرج : يارجال سلم من يوم دخل بيتك وهو سالم ، خلّه يظهر يسلّم .

ومنعوا الدامر ، وأما ربعه فجلُد منهم ثلاثين رجل .

ووصلوا الدامر فرسان من الشكره عدّوه حدود الدواسر حتى أوصلوه لأهله .


وبعد الهية ، تذكر الأمير محمد بن فرج بن حفيظ (الشامري) واكرامه لبني عمه وهو جار لهم ، فأنشد الأبيات التالية :

الشامري عقب الكرامـة تعـرّاكني بما يجري على العير داري

دمحـت أنـا لــه زلتـيـن ٍ تـمـرّاوالثالثة قـد هـو بغوجـه يمـاري

طعنتهم طعن ٍ كله لعينك يسراّكلـه لعينـا لابـسـات الـخـزاري

ولا لـعـيـنـا بـكـرتـيـن ٍ تــجــرّاحنينها غب الصلف والمسـاري

ومن القصائد التي قيلت في هذه الهية قصيدة لشاعر من الشكره يقول :

هيـضـنـي الـدامــر مـقــدي جـــردةيزفى (صخاف الشول) من مصدارها

ثــم التقـوهـم لابـتـي فــي (طلـحـا)ربـــع تـعـفــي مـدنـهــا وأمــدارهــا

يــوم التقـوهـم لابـتـي مــا سـنــدّواوالـلـي يـعـز الـقـوم فـعـل اكبـارهـا

مـنـهـم (ثـلاثـيـن) ومـنــا (واحــــد)وان الله الـلـي مـمـضـي ٍ اقـدارهــا

ثـم سـال (مخضـارٍ) بسيـل أدميـهـممـن وقـع ربعـي مرخـصـة عمـارهـا

وقال شاعر أخر من الشكره قصيدة منها :

ياهيـه يالصبيـان اللـي تدوفـون المـلاححـذرتـه الأول وكـبـوا كـــدار احثـالـهـا

مـا بعـد خبـر المـداري تلـذذ واستـراحكون من هـو للحرايـب يشـب اشعالهـا

خلي (الدامر) عليه العمد والبيت طـاحو(شعب طلحا) من الزنايج عذت نزّالها

في نحانـا يشبـع الطيـر خفـاق الجنـاحوتشبـع العرجـا ويبقـى عشـا ً لعيالـهـا

س : هل تذكروا لنا بالتفصيل قصة الأمير محمد بن حفيظ وسالفة (الست ركايب) ؟

ج : نعم ، في سنة من السنين في وقت (القيظ) ، قال الأمير محمد بن فرج لجماعته :

يا جماعة حنا بنروح (غوّارة ) (نوّاره) ، ولا يذهب معي إلا راعي ذلول ٍ طيبة ٍ سمينة ٍ وناطحة ٍ للمغزى ، فالوقت حار ويتعب الركائب ويتطلب ذلك الناقة السمينة .

يوم ثوّر للممشى فإذا بعددهم جميعا ً خمس ركايب فقط ، ويوم قدهم بيمشون لين حولهم على عد الماء الذي هم عليه ابن عم لهم من قبيلة آل بريك الدواسر ،وعارضهم البريكي يريد الذهاب معهم .
فلحقت ابنة البريكي بأبيها وقالت : يا ابوي ذلولك ليست كجيشهم ، ذلولك عليها موخل والرجاجيل ذولا جيشهم ناطحه .
قال البريكي : بروح وبيستر الله ولا بيتاقي من دونا الله ثم حظ ابن حفيظ .

وفعلا ذهبوا وخذوا لهم ابل لآل روق من قحطان وأقفوا عليها ، ويوم اقفوا عليها ، فيلحقهم عندها ثلاثين خيّال ، ويوم لحقوا أهل الخيل ، قال ابن حفيظ لخوياه :
يالربع الخيل لحقت بأهلها ، وأنّا قدامنا هذا الدرب واذا وصلناه نوخنّا جيشنا لنرميهم كون الله يمنعنا غثاهم .

ويوم اقبلوا على الدرب وكان فيه مثل المضيق ، نوخوا ركايبهم واستعدوا للرماية ، ويوم قد الهيج بيلحق اهل الخيل ، فثورّا عليهم ويطيح من اهل الخيل ثمان من الخيل والرجاجيل أصاويب .
ولين ابن حفيظ وربعه ذابين مع الدرب ، وتقوم بكرة خويهم البريكي اللي مهيب سمين وتطيح في الدرب الضيق ، ويتحاضنونها ويلحقونها رفايقها .

وبهذه المناسبة يلعب ابن حفيظ :

عند الضحى بـادي ٍ روس المراقيـبهنـي مـن طـاب حـظـه واستـراحـي

يابندقـي جـارك الله مـن التسابـيـبياللـي تسوقـون مشخـول المـلاحـي

لحقـوا هـل البـل (ثلاثيـن) تقاطـيـب(آلاد روق) مـــرويـــة الــرمــاحــي

في الهيج الأول (ثمان) من الأصاويبوالضيـق غـدى لنـا طـرق ٍ سمـاحـي

عقـرت صفـرا ً محمسـة العراقـيـبكـلــه لعـيـنـاك يـازيــن الـصـبـاحـي

كلـه لعينـا البريكـي فـي المواجـيـبلا قـصـرت بكـرتـه مـالــه مـراحــي

حنـا اهـل السـت يـاوالله التعاجـيـبكــن الركـايـب بـنـا رتــع ٍ ضـواحـي

ب(لاد شـكــر) مـرويــة المغـالـيـبمـانـبـتـع الا بـصـبـيــان الـفــلاحــي

س : ماهي قصة الأمير سند بن محمد بن فرج بن حفيظ عندما عقر ثلاث من الخيل بطلقة واحده ؟

ج : كان الشكره واللي معهم من قبائلهم من الدواسر ، في أسفل (هريسان) ، وجاءهم خبر ان قوم ٍ سوف يغزونهم من (حدرى) من يام .فقام سند بن محمد بن حفيظ وكان في بداية شبابه وابوه محمد بن فرج قد هو كبير في السن .
وقال سند بن حفيظ : انـّا ياجماعة ، بنكمي(نتصدى) للقوم اللي صدنا خبرهم ونكمي لهم من دون الدبش والعرب .
قالوا وركبوا لهم على خيل وعلى جيش وجو من تحت العرب ومن تحت الدبش .

ويوم ناوخوا ، قال سند بن حفيظ لاثنين او ثلاثة من ربعه :
روحوا لـ (البرقة) ذي واسبروا من وراها وشوفوا يمكن تشوفون شوف ولا شي .

راحوا السبور ، وتباطئهم سند فركب فرسه ولحقهم ويوم لحقهم ، قضّب (جعل) فرسه بيد واحد منهم ، وذب سند بنفسه مع البرقه المرتفعه ، حتى يرى ماوراءها لعله يرى الاعداء .وكان مع سند بندق (كريزيه) ماخوذة ٍ من واحد من آل حثلين العجمان من خالد بن حثلين .

ويوم ذب (ارتقى) البرقة ولين ذا فرس معترضه أمامه فجأه ، فثور عليها ويوم طاحت لينها ثلاثة أفراس .

أثرهن ثلاث من الخيل عليها ثلاث سبور من الاعداء جاؤوا وذبوا البرقة من الجهة الاخرى ، ويوم ذبوا البرقة قبّضوا (اعطوا) ارسان خيلهم لواحد منهم والاثنين الاخرين ذهبوا يتجسسون ويتشوّفون .ويوم تبيّن سند بن حفيظ فاذا الفرس قدامه ويوم ضربها بالبندق لينها طايحات ثلاث بمخباط واحد (بطلقة واحده) .

المهم تشابكوا مع القوم ويعقرون فرس رابعه لهم ، وياسرونهم ويذبح من القوم واحد من كبارهم .

فأنشد شاعر من الجماعه هو محمد الهريش من آل تركي الشكره :

نافـدى اللـي ذببـوا خيلهـم مــع كــل ريــعخيـلـهـم مـــن خيـلـنـا يسـتـزيـد اجفـالـهـا

(أربع ٍ) من شيخنا في اللقاء طاح(ن) جميعكـــل مـنـهـم مـاتـعـوّق يـكــون احـبـالـهـا

و(ابن محنـان) لعـب فوقـه الطيـر المجيـعخـلــيّــت مـنــارتــه يـهــجــرن دلالـــهـــا

و(المرضـف) جعـل ربـي يجينـا ابـه سريـعتسحـبـه سـحـم الضـرايـا عـشـا ً لعيـالـهـا

وانشد الأمير محمد بن فرج بن حفيظ هذه الأبيات في ابنه سند بعد موقفه هذا :

اسمه( سند) وان الله اللي مسميهاسمـه (سنـد) ومسنـد ٍ كـل عايـل

مخبـاط ( سنـد) يـوم ربـي مقديـهعـقـر ثــلاث ٍ مكـرمـات ٍ أصـايـل

ماقـومـه الا عــوده الـلـي مربـيـهومعلمه وشلـون ضـرب الفصايـل

مانـي علـى هـد الجماعـه مضريـهابغيـه فـي يــوم يشـيـب الهـوايـل

س : اشتهر آل حفيظ بحبهم وولعهم بالخيل ، من اكثر من احبها منهم ؟

ج : كلهم يحبون الخيل ، واكثر من يحبها وينشد فيها محمد بن فرج بن حفيظ ولهم فيها نشيد واجد .

س : ماهي انواع خيل ال حفيظ ؟

ج : خيلهم هي الربد والدهم .
الدهم مربط لآل سند بن فرج .( هدية من الامام سعود الفيصل)
والربد : مربط لمحمد بن فرج وباقي آل حفيظ


س :هل بقى من مرابط هذه الخيل شيء ؟

ج : لا ، الحمدالله حنا الحين تحت راية الإسلام ، وبدل الخيل الدبابات والمدافع والله يعز الإسلام والمسلمين .


س : هل تسمعونا شيء من قصائد محمد بن فرج بن حفيظ في الخيل ؟

ج : قصائده كثيرة ، في مرة ٍ من المرات في صارت هية بينه وبين قوم ٍ من (السهول) ومن معهم من (سبيع) .

ولين حصانه (ربدان) مازال صغير ومعجبه مراكيضه ومعجبته أموره .

ويوم حصلت الهية عقر حصانه (ربدان) ، وقام محمد بن شايع بن فرج (الدحّام ويلقب بالدحّام لأنه يداحم الجموع) وعبدالله بن سند بن فرج ، وكل منهم ذبح له رجال وقلع له (كسب) فرس :

اركب ياعم!! اركب ياعم!!

وحصان محمد معقور .

وكان بينهم وبين السهول صلح محد يغير على أحد ، لكن السهول ماألتزموا بالصلح وغاروا ،

المهم ان نتيجة الهية ذبح رجالين من القوم المغيره ، وكسبوا الشكره فرسين .

وبعدها رجع محمد بن حفيظ الفرسين على السهول (بسبب الصلح الذي بينهم) وقال للسهول ان يعوضوه في حصانه المعقور (ربدان) .

تأخر السهول ، وتأخر العلم على محمد بن فرج بن حفيظ فأنشد :

طرشت انا صوب (الرصيعي) مطيّهوابي اتنبّـا ويـش علمـه وطاريـه(1)

أحــــب (ربــــدان) يــــوم غــذيّــهمـزيــن ٍ طـبـعـه وربـــي مـسـويـه

راسه كمـا وصـف العلـق فـي يديّـهوذيلـه يرادفنـي اليـا صـرت محميـه

ويصبر علـى الدخّـان فـي كـل هيّـهوصبره على الدخّان من صبر راعيه

ويانفـدى اللـي حـط عـنـده ضحـيّـهغمـر ٍ شجـاع ٍ ماتـونـي نعـاويـه (2)

1 : الرصيعي : كبير السهول .
2- يقصد محمد بن شايع وعبدالله بن سند عندما قتلوا رجلين وكسبوا فرسين عوضا في فرسه .


أما قصيده في خيله الأخرى ، فيقول في فرسه (ربداء) بعد هية صارت بينه وبين قحطان ، حيث غار عليهم وأخذ له ابل ، وعارضهم عندها ثلاثة سلفان وفكوا ابلهم ، كل ماظهروا من سلف ، عارضهم السلف الثاني ، وكانوا في طراد من ظهور الشمس الين جاء عقب العصر المهم افتك ابن حفيظ وربعه على جيشهم وراحوا .

ويوم الفوا على أهلهم ولين مع ابن حفيظ قوم ٍ من (آل مره) وقيل انهم على راس واحد ٍ من آل شريم .
ويوم نطح المري ولده يبغي يسلّم عليه :

مرحبا ً يابه ّ!! ( أي مرحبا يا أبي )

رد ابوه :

لا لا ياولدي ، والله ماتسلم عليّ لين تسلم على( محمد بن فرج) اللي كل ماضيّق علينا مايفرج لنا الا الله ثم هو .

سمع كلمة المري أحد الدواسر فقال :

لا اله الا الله ، حظوظ ٍ من الله والا مافعل ابن حفيظ اكثر مما فعلنا .

سمعه محمد بن فرج بن حفيظ ولم يرد عليه .

وبعد مرور سنة ، واذا (ربداء) على أحسن غاية ، فقال محمد بن حفيظ :

ربـدا تشعشـع كمـا بالوصـف شيهـانـيعلى العلـف مـع صـلاة الصبـح ندعيهـا

يامرحـبـا عــد حصـمـا الـعـرق لابـانـيترحيـبـة ٍ يــا جــوادي ويــش يحصيـهـا

ألـهـا الـجـلاده تـنـازا فــوق الأجمـانـييــوم الـــردي جـــواده زاهـــد ٍ فـيـهـا

يحلـب لهـا مـن حجـر حلـوات الألبانـيوالفـرد مـن ضدهـا بـان الخـلـل فيـهـا

يشرى لهـا القـت والصفـري بالأثمانـيويـــــدوّر لــلـــي غــالـــي ٍ بـقـويـهــا

ويقطـع لهـا الصانـع البيـطـار حذيـانـيأربــع وطــي ٍ بصـيـر ٍالـلـي مسـويـهـا

مهـيـب تـغـدى لنـهـار الـعـيـد حـبّـانـيوالا لاجـــاء عـرضــة ٍ لـيـهـو يـورّيـهــا

أبــي لـمـن تـفـرشـي الـجــو دخـانــيوكــلاً نـسـى عـزوتـه مـاعـاد يطريـهـا

ليـهـي تصـالـى بشلـفـا وقعـهـا بـانــيبـأمـر الـولــي دايـــم ربـــي مقـدّيـهـا

يوم (ابـن قطنـه) بسـو المـوت ينحانـيشلفـاي مـن فطحتـه رويــة ضواميـهـا

وانــا وديــع لـراعـي البـكـرة الـوانــيلـعـاد هــداد فـــي المـجـلـس يخلّـيـهـا

وحنا شيوخ العرب اللـي شانهـم شانـيوحـنـا هـــل الـرايــة العـلـيـا ونبنـيـهـا

هـل فرسـة ٍ مـن عصـر (ابـن بدرانـي)مـن ركـب منـا يـوسـع فــي مناحيـهـا

وانشد هل الخيل عن صفرا (عظيماني)شلـفـاً وديـــع ونـــا بـالـكـف مهـديـهـا

نافـي بحـق القصـيـر وواجــب العـانـيوسـلـوم المـراجـل نعبّـرهـا ونعطـيـهـا

فاللـي لا جـاء الفهانـي ضـاق وازرانـيوالخيـل فـي نجـد تبغـي مــن يناحيـهـا

ويقول ايضا :

ربــدا كـمـا شاهـنـت يــوم هـبّـابتصفق وتصفح في علاوي الفروقي

شبتهـتـنـا سبيـبـهـا يـــوم لـلــدابشختور صيف ٍ في مخال ٍ حقوقـي

فاما عليها طارف النشر وأشـرابولا تــوردنــا حــــلاة الـعــروقــي

مانيب منهو منزله وسـط الأجنـابيتبـع قصيـره غـادي ٍ لـه سلـوقـي

مع بنـي عمـي هـل الديـن وكتـابومن ضاق منا نحمسـه بالحقوقـي

وقال أيضا في حصان له آخر اسمه (ربدان) :

يـاغـوج يـازيـن الـحـلا والتواصـيـفياللي ذراعه كل مـا اقبـل طفوحـي

أعطيه من لبن العرّاب المصاخيـفوأعطيه ذخر البيت واضد روحي(1)

ابغـي لمـن دبـروهـن هــل الكـيـفنكسب عليه مـن الثنـاء والمدوحـي

وأبغيـه يـبـرى للبـكـار المشاعـيـفلاقــام بــرّاق الـوسـامـي يـلـوحـي

لعيون من خدّه كمـا بـارق الصيـفاللـي مـن الحجّـار عيّـت طمـوحـي

1- العرّاب : المقصود الإبل .

س : ماهي سالفة قصيدة محمد بن حفيظ في أخيه( بدّاح) ؟

ج : طال عمرك ، غزى آل حفيظ وجماعتهم في ناحية وغزى محمد بن فرج بن حفيظ في ناحية اخرى وترك ابله عندها فقط عبد وفيها ستين ناقة وذهب للمغزى .
المهم غزى على قوم وخذى أباعرهم ولحقوهم أهل الإبل وجاء بينهم طرّاد وفكّوا اهل الابل حلالهم ، وعوّد محمد بن حفيظ ويوم عود على اهله وعود على ابله ولين العبد مذبوح وإبله مأخوذه .

ولين آل حفيظ والشكره في ناحية اخرى وسمعوا بالخبر وجاءوا بالسلفان وبالخيل وجاءوا ناصين الأمير محمد بن فرج بن حفيظ ، واللي جاب فرس واللي جاب ابل :

أبشر بالعوض !! أبشر بالعوض !!

فقال الأمير محمد بن فرج بن حفيظ :

ياجماعة ، وفيتوا ولا هفيتوا وعلومكم كلها طيبه ، وانا باخذ بس فرس أخوي بدّاح ، والباقي كلن يرد حلاله صوب محله ، مراحنا اليوم خالي والصبح ان شاء الله بيمتلي .

وانشد هذه القصيدة :

حي الرجّال وحي من قـال حيّيـتحـي الرجـال اللـي طــرّي ٍ نبـاهـا

(بدّاح) في عطـى الأصايـل تعدّيـتصفـرا ً ولا قبلـك كـريـم ٍ عطـاهـا

بنت الحصان اللي قديمٍ على بيـتعساني اعطي من ظهرهـا جزاهـا

لاشفت انا صفرا ً من الخيل فزيّتوكـلــن يـفــز لحـاجـتـه لا لـقـاهـا

يالـربـع هــاذي غـايـتـي لاتمـنـيـتربـدا هـوى نفـسـي وغـايـة منـاهـا

لاصـاح صيّـاح الضحـى ثـم تعليـت(ربدا) على الموت الحمر سقتناهـا

وان جيتـنـا عـنـد المعـقـل تثنـيـتمــع لابــة مـاهـو بيسـهـج حمـاهـا

انطـح بهـم وجـه الـعـدا ماتتقـيـتابني بيـوت الحـرب وانطـح شباهـا

س : تداولت البعض مؤخرا ً قصة أن الأمير سند بن محمد بن فرج بن حفيظ قُتل على يد يام، فهل هذا صحيح؟

ج : الذي ذُبح على يد يام مهوب الأمير سند بن محمد بن فرج ، وانما اللي ذبح على يد يام (سند بن فرج بن حفيظ ) وكان في في (الجوب) جوب الدهناء اللي شمال ٍ من خريص حيث وقعة معركة بين يام والدواسر بعد أن قتل الدواسر المرضّف شيخ آل مره . وحصلت معركة وذُبح من المشاهير هذاك اليوم سند بن فرج من الدواسر وذبح من يام (ابن الدعيّه) .

اما سند بن محمد بن حفيظ ، فالذي قتله هو ابن الرومي من قوم ابن عقيّل من الدعاجين عتيبه .وذبحوا الشكره ناصر ابن عقيّل العقيد في ساعتها .

ذُبح سند بن محمد بن حفيظ من الشكره وذُبح ناصر بن ابن عقيّل الدعاجين في وقتها ، وهذا على بداية حكم الملك عبدالعزيز بن عبدالرحمن .

وقصتهم أنهم جميعهم غزوا ذولا قوم وذلا قوم ، وتواجهوا وتنابوا بينهم بالكلام ، وقالوا : مالكم فينا لحام ولا لنا فيكم لحام وكل ٍ يروح في فاله .

قام واحد من الدعاجين وكان أول مغزى له وغلام توه ظاهر ، ولاحظ الرجال (سند) اللي مشهر ٍ على الذلول الزينه ولبسه زين ، ووده يتفوّه بذا الرجال الشّهر ، وثور عليه فجأه وبدون سابق انذار وثوّر عليه بالبندق لينه ذابح سند .

فيقوم واحد من الشكره اسمه( مرضي بن خليّان من آل موسى الشكره ) في نفس اللحظة ويثوّر على ناصر بن عقيّل الدعاجين لينه فاقع ٍ راسه .

وليـن ذا نـد ٍ لـذا .

س : يسأل البعض عن صلة القرابة بالضبط بين آل مهنّا الشكره في العيون واسرة آل حفيظ ؟

ج : نعم ، آل مهنّا الذين في العيون منّا و هم مارثة محمد بن جمعان من الطلاحبة ، والطلاحبة اربع فخوذ ، وهم :
آل حفيظ ، وآل تركي ، آل فرج بن طلحاب ،و آل مهنّا .أربع فخوذ ٍ كلها ترجع في (طلحاب) .

وآل مهنّا عيال محمد بن جمعان الطلاحبه .واسم (مهنّا) منتحلينه من ربع ٍ تجاوروا هم واياهم في (العيون ) ، وذولاك من زعب أو من بني هاجر . وإلا فهم ينقال لهم آل محمد بن جمعان .

س : هل يتواجد احد الأن من قبيلة الشكره في (وادي الدواسر) ؟

ج : نعم فيه ولاهم واجد ، فيه حمايل من (الحنابجة) ، والحنابجة فخذ كبير من الشكره .

س : متى نزح الشكره من وادي الدواسر ؟

ج : ظهر الشكره من الوادي يوم جاؤهم قوم ٍ من (جميلة) يستفزعون بهم على بني عم ٍ لهم بينهم وبينهم حرب ، وكسروهم اقبلاهم وجاؤرا مستفزعين بآل زايد في الوادي .ذاك الحين الأفلاج مابعد فيه أحد من رجال آل زايد .

ويوم جوهم جميلة في الوادي ، قالوا آل زايد :

ياجميله ، انتوا جيتونا تبون منّا الفزعه ، وحنا بنفزع لكم لكن القوم اللي وراكم حنا أكثر منهم عدد وبعضنا بيكفي عن بعض وانّا بيجيكم من كل قبيلة فارس ورمحه معه واختاروا الرمح اللي تبون حمياته وفزعته .
ويجيهم من كل قبيلة من الدواسر خيّال على فرس ورمحه معه .
واختاروا جميله رمح آل حسن بن صهيب بن زايد .

فقالوا آل زايد :

خلاص يا آل حسن انتوا المعنيين بهم .

ويركبون الشكره وآل عمّار والفرجان ويجونك مشملين ويحولون على خصوم القوم الذي طلبوا منه النجده ، ويظهرونهم من الأفاليج ويروحون وبعضهم بالكويت، وينزلون الشكره في الأفلاج وماقعد في وادي الدواسر الا الحنابجة .وآل عمّار نزلوا في سيوح الأفلاج ، والفرجان في قرايا من الأفلاج وبدو .

هذا اللي قضبنا من علوم الرواه .



س : تعرف سالفة البيت ( هم الذروة العليا سنام آل زايد ) ؟

ج : هذي القصيدة طال عمرك راعيها عجمي ، كان عزبيٍ (ضيف) لثاري ، وثاري من آل بوعلي من الشكره ، وفي البديع أو في السليل ، ويوم دارت السنة ، ويسلم العجمي على ثاري ويوادعه ويرحل ، ويوم راح ويوم قده عند عربانه شمال ، فخلف له بنشيده :

يـاراكـب يــا مترحـلـيـن ٍ قـلايــصاخـذوا معـكـم يــا منجبـيـن ســلام

سـلام احلـى مـن در شمّـخ الـذرىواخــن وانــود مــن عنابـيـر شــام

وألفـوا علـى الأفــلاج فانـهـا ديــرةديــرة كــرام وللهاشـلـيـن اكـــرام

ترى (ثاري) الأدنى اليا نوّس القـرىمضـيّـف ضيـفـان الشـمـال ويـــام

ولا قضيتـوا فاقلطـوا عنـد (دهمـي)راعــي زلـفــات ٍ فـوقـهـن ايـــدام

وترى (فايز بن عويمر) مزبن مجرملاصـار مـن ضـيـم الـزمـان يـضـام

من (لاد شكر) مركز الجود والنـدىلاجـاء الصيـف نـوّه عجـة ٍ واكــدام

رسى جدهم في الجود مثل مارسىمـبــدا ً طـويــل ٍ قاعـتـيـه احـثــام

هـم الـذرة العلـيـا سـنـام آل زايــدمــدح ٍ قـديـم لـيـس فـيـه أوهـــام

ثاري ، دهمي ، فايز وعويمر : من الشكره

هذه قصيدة العجمي يثني بها بسبب مالقاه من علم جميل من ثاري .


س : حصلت مواقف مهمة بين الأمير سند بن محمد بن فرج بن حفيظ والملك الموّحد عبدالعزيز بن عبدالرحمن هل تذكروا لنا بعضها ؟

ج : من ضمن مواقف الأمير سند بن محمد بن فرج بن حفيظ .

ان به قافلة للدواسر ظاهرة من (الإحساء) ، وجاء قوم من عتيبه واخذوها ، ويوم صار بعدها بفترة ، وتمر قافلة لعتيبه ويعارضها سند بن حفيظ والجماعه وياخذوها .
فلما علم عبدالعزيز بن عبدالرحمن آل سعود ،وصلى ان يأتي سند وكان هذا في بداية حكمه وفي عهد أبيه الإمام عبدالرحمن الفيصل .

وعندما جاء سند ، قال له عبدالعزيز :

من شق بالإسلام يا ابن حفيظ (يقصد قافلة عتيبه التي اخذها سند وجماعته) .؟

فرد سند :

ياطويل العمر ، فكك لنا من عتيبه اللي خذونا ، وفكوا منّا .وحطونا في حكم واحد .

فقال عبدالعزيز :

انا داري انك منتب مخطئ لكن الإمام مهوب راضي ٍ عليك .وانا بوقفك قطعة أيام عشان خاطر الإمام ( الإمام أبوه عبدالرحمن الفيصل) .

وراح عبدالعزيز ووقفوا سند بن حفيظ في السجن ، ويوم أخذ له عشرين يوم ، واذا به يستغرب انهم لم يخرجوه حسب ما قاله عبدالعزيز .

ويمر السجّان من أمام سند وقال له سند :

ياولد عبدالعزيز وينهوا ؟ّ

فرد السجّان :

عبدالعزيز مهوب يمّك ، راح قنّاص ٍ صوب الشمال .

عندها عرف (سند) ان الأمر سوف يطول به بالسجن .ونوى بالهروب منه .

وقام (سند) وأخذ رشا (حبل) الدلو التي تنزل في بئر السجن ، وأخذ الرشا ، وانزلها الرشا مع نافذة السطح من فوق ، ويوم وقف الرشا واذا به لم يصل الا الأرض وبقي مسافة بسيطه تفصل الرشا عن الأرض .

واذا المصمك من وراه حفر ، وكانت أرجل( سند) مقيّده بالحديد ، ويقوم سند ويرفع الحديد الذي في رجليه حتى بطنه ويربطه ، ونزل (سند) مع الرشا( الحبل) ، وعندما شارف على الوصول الى نهاية الحبل وكانت الأرض لاتزال بينه وبينها مسافة ، فقام سند ورمح الجدار برجله واذا الجدار طايح جزء منه ويسد الحفره ،واذا الله فاك ٍ له من هذه الحفر .

ويحط له الله مخرج ، ويظهر مع الدروازه (البوابة) الحدرية من الدراويز ، ويسري لين جاء الى (البطحاء) ، ووجد امرأه عندها مخايط ، ويفك الحديد اللي مقيد به ، وواصل مسيره على رجليه .

ويوم وصل السّليْ (أحد احياء الرياض حالياً) وكان في الليل ، واذا به يشاهد الضو (النار) أمامه ، ويوم اقبل على الضو ولين اهنا ذلولٍ باركه ، وقربتها مليانه وشدادها عليها ووالمه للسفر مافيها الا عقال .ولين ذا راعيها قدامها مستغرقٌ في نومه .

فقال سند بن حفيظ في نفسه :

اللي فكني من (المصمك) وفكني من الدراويز وفكني من الرياض ، بيكفني ان شاء الله مع باقي طرقتي .ولا أفجع راعي ذا المطية في مطيته
( أي لا اسرق مطية هذا الرجل ابدا ً فالله الذي انقذني من السجن كفيلُ بأن يسهل باقي طريقي) .

فقام سند وشرب من قربة الماء ، واكمل دربه ، ولم ياخذ شيئا من الرجل النائم .

وفعلا ً سهل الله له أموره حتى وصل لجماعته ، وكان جماعته مع (برك ) يبغون يسندون ل(الأحمر) ولـ (الدّحي) ، وكان اخوه (عجب) قد جمّع من الشكره خيل وابل يريد ان يتوجه بها لعبدالعزيز ليهدوها عليه ويتشفعون لإطلاق سند من السجن .

ويوم خذوا لهم شوي واذا زوجة سند تقول :

ياعجب :

قال عجب بن حفيظ :

نعم .

قالت : ابشروا بسند .

قال عجب بن حفيظ :

ويش العلم ؟

قالت :

اهنا رجال ٍ يغني جايكم مع أسفل ذا الباطن من حدرى ، والله ان يموت ماعاد تشوفون سند .
(سمعت صوت زوجها سند وعرفته) .

ويوم جاءوا اذا هذا سند .

فقال سند لهم :
ياجماعة ، تراني قوم ٍ على ابن سعود (أي عدو له ) ، وانا بحدر لـ(قطر) وابن ثاني ، اللي بيخاويني حياه الله ، واللي بيقعد في بيضة الإسلام بصره .

وقال سند هذه القصيده بعد خروجه من السجن :

يالله ياللـي تجعـل الصبـح ينطـارياخيـر ٍ ماغـيـرك احــد ٍ شفـانـي

لابــار (ابوتـركـي) فلانـيـب بــوّارويالله لا ترضـى عـلـي بالهـوانـي

لانــيــب زرّاع ولانــيــب بــقّـــارولا نيـب فـلاّح اسـو ق السـوانـي

لامن ركبنـا فـوق زينـات الاكـوارياويل مـن نطلـب عليـه الوحانـي

ولامن ركبنا فوق قحصات الأمهارنقصر حبال اللي لـه اليـوم دانـي

مير عديتني جعل تعداك الأشـرارعديـتـنـي يـالـنـادر الصيـرمـانـي

وعــــــديـــــــتـــــــنـــــــي ...ماشفت عقب (الجريباء) مكانـي

الجريباء : مركز لمدفع ابن رشيد في (الدلم) ، وكان سند هو اللي قتل المدافعي وكسر المدفع .وانكسر ابن رشيد ، ويذكر سند عبدالعزيز بفعله بالجريباء وموقفه معه .


بعد وصول سند لجماعته ، أخذوا لهم أيام والعلوم تروح وتجي ، المقصد انهم عزموا على الرحيل مع سند ، وحدروا ، ويوم قدهم من تحت(الإحساء) واذا بالخطوط تلحقهم (مراسلين الملك عبدالعزيز الذي ينقولون الرسائل) .

والملك عبدالعزيز الله يرحمه سياسته محنكه ، فكان لسند بن محمد بن حفيظ ، ابن عم له ينقال له عبدالله بن سند ومعروف وعلمه طيب وكان معهم ،وعبدالعزيز موجه لعبدالله بن سند بن حفيظ الخطاب ويقول فيه :

(من عبدالعزيز بن عبدالرحمن الى عبدالله بن سند بن حفيظ ، لا يأخذكم ذا القيماني في جرايره ، هذا قيماني ٍ مرتد ٍ عن الإسلام ، وانت اقعد وتراك أمير الشكره ) .

ويوم جاء الخط لعبدالله بن سند وقرأه ، ويوم احتار عبدالله ، فقال له ابن عمه الأمير سند بن محمد بن حفيظ :

يا عبدالله من كلى(أكل) صاحبي تعشاني ، لا تقعد سق عصانا والعلم اللي تبغي مهوب حاصل ، معنا؟

قال عبدالله بن سند: قال أي والله معكم .وحدروا كلهم .

ويوم قدهم من تحت الاحساء وصار لهم سنتين ، فإذا بعبدالعزيز يرسل لهم الخطوط .


( يا ابن حفيظ وعوّد ، ظالم وتجي سالم ، وعليك الله وعهد الله) .

رجع سند وجماعته ويوم قدهم مع (مثناة الدهناء) ، بيحطون (الرياض) على يسراهم يبغون يسندون ، وابن سعود بيجونه ، قال بعض الشكره لسند :

ياسند ، لا تسـنّد ، فسنعارض عربان بينا وبينهم مطالب رجاجيل وتعارضنا قيمان(خيل) وسيأخذونا .خلنّا نعوّد من يسار صوب بني عمنا .

فرد سند :

والله ان أسنّد والعدو مهانمـن بيـن اصاحيـب وقــوم

كله لعينا الفاطر المسماناللي علـى الـرص الدحـوم

راح سند وجماعته بهدايهم لابن سعود وقبلها وعفى عنهم ، وسندّوا ، ويوم قدهم مع مثناة العارض ، ولين معهم واحد من آل دمنان من يام مع ابل ٍ واجد وجار ٍ لصويّان من الشكره .

ويوم خذوا مع المغرب ولين ثلاثة رجاجيل من احدى القبائل كل منهم يشاور الثاني في أخذ ابل الدمناني ، ولين مع الدمناني بندق صمعا كريزيه ، وثوّر عليهم لينه ذابح ٍ منهم اثنين ، والثالث سلم .

وضف ابله وحول على على جاره صويّان الشكري وقال :

يا صويّان ، الجبل ذا بياكلني وبياكل ابلي ، ابلي واجد وبياكلها ، حدرني لين تعديني الخرج ووجهك أبيض .

الجماعة اكملوا طريقهم ، أما صويّان فجاء مع جاره ويوم قده عند (فرزان) بالخرج ، واذا هنا عرب من عربانا ،ويغيرون على ابل الدمناني وياخذونها .

فقال صويان الشكري :

يابني عمي يا صهبه ، لا تاخذون ابل جاري .

قالوا :

ماعندك جار

وطقوه وبغوا يفقعون راسه .واخذوا الابل ، ويقوم الدمناني ويعقر اثنين من الخيل اللي غارت على الابل ، ويشيل جاره الشكره على ذيك الذلول ويروحون صوب جماعتهم سند واللي معه .

ويوم وصلوا لهم ، قال سند :

ويش العلم ؟

قالوا :

العلم هذا اللي حصل .

قال سند :
سلّه سلّه ،

قال ابوه الشايب الكبير محمد بن فرج بن حفيظ :

مالك لوى ، مهيب سلّه ، الا العمود على القعود ، والظعن والسلف .

ويحدرون عليهم مع (نساح )، ويجون عربانهم اللذي خذوا ابل الدمناني ويفكونها كلها .

وقالوا : رح بابلك يادمناني .


س :هل تتحدث عن الامير عجب بن محمد بن فرج بن حفيظ؟

ج: تولى الاماره بعد أخيه سند بن محمد بن فرج بن حفيظ ، زمن الملك عبدالعزيز بن عبدالرحمن, وشارك في توحيد الجزيزه العربيه, وكان حاملا للواء (مشيرفه) في فتح مكه زعيماً للشكره وأحد الابطال المقدمين عند الملك عبدالعزيز يرحمه الله ، وأصابت الحمى الامير عجب بن محمد بن فرج في فتح مكه وتوفي فيها ، وكان رحمه الله مضرب المثل في شجاعته ، وقد كان ممدوحا من الشعراء ومن ذلك قول احد الشعراء فيه.

عيّا علي الهجن( أبوساره)يوم الردي طارت اعيونـه

الحـرب لا شبـت أقـطـاراشيوخنـا الـلـي يصالـونـه

ومن ذلك قول ابن الجعاثنه:

تلفي على (عجـب) صبـي التجاريـبتثـنـي جــواده فــي نـهـار الـمـثـاري

هل سربة تركض على الموت لا هيبطريحـهـم داجــت علـيـه الـضـواري

والامير عجب مع هذا كله فارس ومقدام ومن القلائل الذين يجدون اصابة الهدف بدقه متناهيه " بواردي " وهو ايضا شارع مجيد رحمه الله وغفر له.

س : هل تحكي لنا احدى مواقف الأمير عامر بن محمد بن فرج بن حفيظ ؟

ج : عامر هو أخ سند وعجب أبناء محمد بن فرج بن حفيظ وهو أصغر منهم ، وكان مع اخوانه يوم وقت اخوانه ، ويوم حصل حرب اليهود على فلسطين ، وتروح قوة من المملكة العربية السعودية لفلسطين ، ورئيس الشكره واللي في ضفهم عامر بن محمد بن فرج الله يرحمه .وعلومه كلها طيبه في الإصلاح وفي الراي الأعلى لين الله توفاه رحمة الله .

س: بلدة المثناه في الأفلاج تتبع لأي آل حفيظ ؟

ج : هي لآل سند بن فرج بن حفيظ ، ولهم مركز فيها .


س : هل تذكر لنا ماتعرف عن وقعة (العراص) أو (العريق) الشهيرة ؟

ج : العراص سبق ودوّنت ، والكلام فيها كثير والوصف فيها كثير والوهيلة فيا واجد والزبدة انه قام واحد من آل نصار أمراء الغييثات خواله الأعزه من سبيع ، وجاله عندهم بعض اللزوم ، والله مدري ويش صار من بعض الخلافات من السبعان بينهم وقاموا عليه وذبوحه على ذلول وروك خاله السبيعي .

وعقب طلب منهم الأمير وقيان بن نصّار المخاليص ، وواعدوه ولا وفوا في وعدهم ، واستحمى ابن نصّار ببني عمه، واستحموا بني عمه ، الشكره والفرجان وآل عمار والحراجين وطبعا ربعه الغييثات واللي حضر من الدواسر .

ويوم شافوا السبعان ان الدعوة بتكبر ، قالوا تدرون يادواسر للحقان (الجلوس للحق والتحاكم)، ولا يحصل مواجهه .

ويوم قد الدواسر على (التنظم) عند الجلالية ، واردين الدواسر يشربون على ان الدعوى محاكم حقّان وحق ، واثر السبعان ناوين بهم بمبغاته وهجوم .

ولاخذوا الى السبعان ظاهرين عليهم بالبيارق والمزينات ، وبيوت آل حفيظ قد بنيت ، واللي غيرهم بعضهم اللي بنى واللي مقبل واللي مابعد بنى .

ويتواقعون هم واياهم ، ويكسرون سبيع الدواسر ويقفون بهم ويوم قد الدواسر مقبلين على حلّتهم التي بُنيت ، قام سند بن حفيظ وعقل رجله ويزهم حياة سند الله يرحمه :

يا لاد صـهيب ، يا آلاد حـسن ، يا آلاد شكر ، يا لاد عـلي مخصوصة .

ويثنون عليه من فريس الجماعه والغييثات والدواسر ويتحامون حوله ، وأول بندق ثارت من بندق الأمير عجب بن محمد بن فرج بن حفيظ ويطيح منها بسّام السبيعي وكان يقود بالمزيّن ، ويكسرون السبعان ، والوقعة معروفه ويشهد عليها نشيدها وتفاصيلها كثيرة ولكن هذا مختصرها .

منها قصيدة محمد بن كليب الشكره منها :

يا مخال من المنشي سب حلّـههل وبله على (التنظم) سبهانـي

السبيعي غدى في زمته اغثا ً لهقومه يومه سروق ٍ بايق العانـي

جمعنا ينطح الجمعين شرع ٍ لـهقومنا فـي اللقـا ماحـن بذلانـي

(العمانـي) طريـح ماحـدا ً شلّـهفـي نحـا لابــة ٍ مـاهـم بـذلانـي

واكثر من نشد فيها واحد من الغييثات يقال له دغش ولانيب احفظ قصيده جدا ً .


س : هل قُتل احد من الشكره في ذلك اليوم ؟

ج : لا لم يقتل أحد من الشكره .

س: هل تذكر لنا احدى مواقف الشيخ مسفر بن سند بن فرج ؟

ج : مسفر بن سند بن فرج ، صار في خاطره على بعض قرايبه وراح في غزوة مع بني عمه (المساعره) ، وغزوا على قحطان مدري عتيبه ، وخذوا لهم ابل ويجي عندها طراد مهوب هويّن ، ولين بعض القوم مايعرف مسفر بن حفيظ ومكانته ، يعرفون انه دوسري وبس ، ويوم جات الهية لا ضيّق بهم ماحوّل الا هو ومثله من ظفرين الرجاجيل ، وتطيح عقيره ولا رجال ، ويعتزي : خيال البويضا انا ابن حفيظ .

ويوم انفك الطارد من المطرود ، قاموا اخوياه وحطوا له الفراش وحطوا له المعناز وقالوا :

العذر من الله ثم منك انّا (نحن) ماعرفناك مع بداية المغزى ، واما الحين فانت معروف وهذا محلك وانت راعيه ، ولا خذوا وهم جالسين ، فإذا رجالين اثنين مقبلين عليهم ، واحد منهم معه مشعاب(عصا) ، اليوم وصلوا لهم وسلموا عليه ويوم وصل الرجل الذي معه مشعاب لمسفر بن حفيظ ، ويصقع مسفر بالمشعاب على راسه وهو يعتزي :
خيال الحرشا الخضيري !!!

ويقومون المساعره ويطرحونه ويجيبونه قدام مسفر بن حفيظ ، قال مسفر:

اتركوه اتركوه.

وسألوا الرجل الذي ضرب مسفر : أنت خضراني ؟!! (الخضران من الدواسر) .

قال الرجل : الله الله

قالوا : تعرف الرجال اللي انت طقيته ؟

قال الخضراني : نعم ، هذا مسفر بن حفيظ .

قال مسفر بن حفيظ :

شقومك طاقني ؟ هل ضربك احد من آل حفيظ؟

قال الخضراني : قال مالك لوى (لا) .

قال مسفر : طاقك (ضربك) احد من الطلاحبه(أقرب الشكره نسبا ً الى آل حفيظ).

قال الخضراني : مالك لوى ( لا ) .

قال مسفر : اجل من طاقك (ضربك) ؟

قال الخضراني : طاقني واحد ٍ من الغرابا من الشكره .

قال مسفر : واذا مني خليتك مع ذي الطقه ، بتخلص من الغربي ماعادك بتالبه؟ .

قال الخضراني : ايه نعم .

قال مسفر : ها خل الصهبه يدرون اني مانيب راعي مشاعيب ، رح ياخضراني تراها منك خط ٍ في ماء ( أي غفرت لك وكأن شيئا ً لم يكن ) ، والغربي ترى ماعاد لك فيه سنع .

وهاذي من نوادر العلوم التي تذكر للرجال الذين يفعلونها ، لاهوب تلاّب ولا راعي مشعاب .


س : ماهي عزوة الشكرة ؟

ج : عزوة الشكره طال عمرك ، من طرف فندة ٍ كبيرة منهم وهم آل بوعلي عزوتهم : ابن علي .

وآل بوعلي فخذ ٍ من فخوذ الشكره وعزوتهم كلهم مع آل حسن : ابن حسن .

س : وآل حفيظ ماهي عزوتهم الخاصه ؟

ج : البويضا عزوة آل حفيظ الخاصه وباقي الشكره كلن له عزوته الخاصه .

اما آل حفيظ فعزوتهم في الإبل : البويضا
واما عزوتهم في النسوان : أخو نوره .

س: ماهو وسم الشكره ؟

ج : وسم الشكره ، آل بوعلي وهم الواجد : الشمطري وهو مطرق مضرب فوقه رقمه وتحته رقمه .
وباقي الشكره لهم ستة وسوم :

اللي كاز واللي ثاقبي واكثرها كاز وثاقبي ، واللي سرد وغيرها .

س : هل تعرف شي من سوالف الأمير الكريم وقيان بن هذال ؟

ج : وقيان بن هذال راعي كرم ومعروف على مستوى نجد وأهلها وفيه قصيد واجد .

ومن اللي قيل فيه قاصد ٍ فيه قحطاني :

يابانـي بيتـه علـى مفـرق الـطـرقوياماخذ ٍ ضيف (الأحمر) بالضماني

حر ٍ على حـر ٍ ومنشـاه مـن غـرقمـهـوب الـلـي مـاكـره مشبهـانـي

واليا عطى يعطي عطاياه من فرقمهوب يطلب فيمـا عطـا بالمثانـي

وكرمه معروف على مستوى نجد وأهلها ، وعياله من بعده مثله .

س : هل ممكن ان تعدد لنا بعض شعراء الشكرة المعروفين ؟

ج : من شعراء الشكرة المعروفين ، جلوي بن سالم من آل حوشان .

ومنهم شايع بن برجس من الجعاثنه ، ومنهم طويرش بن بدّاح من آل فرج بن طلحاب .

والباقين شعراء مثلهم وعلى حدهم واجدين الشعّار .



ومن عرض القصائد للشعراء التي ذكرتهم ، قصيدة لشايع بن برجس :

صار له بعض الصدف مع حضري في (ميراه) ، وجاء بينهم مساءله كل منهم ينشد رفيقه من انت منه ، وكل منهم علم الاخر منهو منه ، ونشده الحضري من انت منه :

قال شايع : انا دوسري .

قال الحضري : من أي الدواسر؟ .

قال شايع : من الشكره .

(ولين في ذاك الأيام توه متوفي الشيخ هذال بن وقيّان الشكره راعي الأحمر) .

قال الحضري : انت من الشكره ، الله أكبر ويش بتسوون يا شكره يوم مات أميركم .

قال شايع : اعقب ، لعنبوك ويش أميرنا ؟

قال الحضري : أميركم هذال .

قال شايع : قال لعنبوك هذال أمير ٍ وغيره أمراء .

رجع شايع الى اهله في (عرق السر) ، علوا ً من (ميراه) ، وتهيّض تالي نهاره وانشد :

قال ابوبرجس بـادي ٍ فـي مرقـبمن ضيقة ٍ في خاطـري مصطـاع

اعـــد للقـيـفـان لا ضـــاق بـالــيبـهـرج دلـيـل ٍ ثـابـت ٍ مــا ضـــاع

هيضـنـي الـحــوّاج بـايــع فلـفـلـهويـقـول ظعـتـوا مابـكـم شـجــاع

(هـذال) اللـي قـد مـضـن فعـولـهشيخ ٍ على شيخ ٍ اعروف سناع(1)

مـخـلـف ٍ ربـــع ٍ قــــروم ٍ نــــدّرمـاكــر حـــرار سيـفـهـم قـطّــاع

و(أبوسـنـد) لــه ربـعـة ٍ مـدهـولـهصينيـتـه تشـبـع بـهـا الأجـيــاع(2)

موارث اللي تدبـل الخيـل روسهـمحــرز السبـايـا تـرخـي المـصـراع

نطـاحـة الفـرسـان لا حــل الـبــلافي دقلهم كم طاح مـن صعصـاع

و(أهل الحمر) ربعي مقابيس البـلالاجــاء المصـيّـح مـقــدم ٍ فـــزّاع

لاجاء الخطاء مـن عايـل ٍ متعيفـنلازاد لــــه شــبـــر ٍ زادوا بـــــاع

عقب العباصـة جـاء دليـل عـارفقـدهـو لـمــن ينـصـحـه مـطــواع

عــزالله انــه مشحنتـنـي بنـدقـيسـبــر نـظـرهـا ضـربـهـا وقــــاع

أبغـي بهـا نطمـر خــلاف الضـمّـرلاجــات زلـبـات الـرمــك خـــرّاع

عــادات ابــوي وخـالـي وجـدّانـيلاجاء المضايـق حولـوا فـي القـاع

و(عصام) فـي بيعاتهـم طـاروا بـهشوق الهنـوف مسويـة الأفنـاع(3)

عشوا به السرحان واخذوا سابقـهشـقــرا ً أصــيــل تــوهــا ربــــاع

وانا صحيب الضيـف لاجـاء هـادفهــــرج لـبـابــه دايــــم طـــــرّاع

ماكـان فـي بيتـي لهـشـال الـخـلامـانـيـب مـنـهـو لقـبـلـوا يــرتــاع

ولانـيـب بـقــن ٍ دايـــم مـسـربـلردي عـزمــي ٍ دايــــم ٍ رعــــراع

في حقوي اللي كنها سـم الحنـشوالا بـخـمــس ٍ ضـربـهــا شــــلاّع

وانــا لـمـن لـحـق ربـعـي ضـــدّهمانـيـب لأشــوار الــردي سـمّــاع

مخشع ٍ لهـم واصبـر علـى زلاتهـموان جاء الخطا من غيرهـم جـزّاع

وان لحقهـم كـرب ٍ كعـام العـايـلالـيــن يـاتــي يـقـتـدي الأســنــاع

ونخـبـر الـلــي جـاهــل ٍ بفعـلـونـاالخامـل اللـي فـي هروجـه ضــاع

ان قبلـنـا ربــع ٍ مـضـن فعلـوهـميردون عوص الجيش في الأطمـاع

اجابهـم فـي الابـل بسنـد الـغـاربعثـوى السنـام الفـاطـر المـقـراع

نـزالــة الـجـيّـان لا زاف عشـبـهـاعشب السهل فيها وعشب ٍ انقـاع

وحنـا هـل المنـزل اليـا جــت ردّهغـدوا العـرب تبعنـا وكــل ٍ ضــاع

1-هذال : الامير هذال بن وقيان الشكره .
2-أبو سند : الأمير مناحي بن سند بن محمد بن فرج بن حفيظ .
3-عصام : احد فرسان يام .

س : ماذا عن الشاعر دخيل الله بن محمد الشكره ؟

ج : الشاعر دخيل الله بن محمد بن دخيل الله رحمه الله من شعراء الشكره المعروفين ويعتبر من شعراء الشكره المعاصرين، وهو من ال موسى من ال ابوعلي .



س : هل تعرف سالفة ناجي بن نادي الجعاثنه الشكري وقصيدته عندما كان جار مع قبيلة اخرى ؟

ج : ناجي بن نادي من الجعاثنه ، راحت به الصدف مع العجمان في نية ٍ معهم وفي ربيع معهم وقاصرهم ،ويوم من الأيام يسولفون في المجلس ، جاء ناجي يبغي يسولف ، فقال خامل ٍ من أهل المجلس :

يادوسري ، انتوا سلومكم ماهي مثل سلوم القبايل لا تسولف !!

فقال ناجي :
الا لنا سلوم وأطيب سلوم القبايل سلومنا

قال :
مهيب أطيب لاتسولف يادوسري .

فقال ناجي :

ياجاري أسولف ولا ما أسولف .

قال جاره العجمي :

الا سولف وكنك في مجلس بني عمك.

قال ناجي :

ها برد عليك الصبح .

يوم اليوم الثاني واجتمعوا قال ناجي :

ياراكـب اللـي مااعترضهـن شواذيـبغضـع الرقـاب ونـاحـلات السـمـاري

معهـن دليلتهـم اليـا اقفـن مجانـيـبواليـا يخـوّع فــي الليـالـي الـغـداري

تلفي علـى (عجـبٍ) صبـي التجاريـبتثنـي جـواده فـي نـهـار المـثـاري(1)

هل سربة ٍ تركض على الموت لاهيبطريحـهـم داجــت علـيـه الـضـواري

ثم نصّها (هذال) مـن الفطـر الشيـبلاجـات نكـلات خـلاف المـسـاري(2)

تبشـر اليـا مـن جـات ببـن ٍ وترحيـبوصحـون بــر ٍ فوقـهـا الـثـرب واري

ياشيبيـه حـر ٍ فـي طـوال المراقيـبمـن طيـر سنـجـار ٍ يصـيـد الحـبـاري

ثــم حــدّره لـلـي نـكـل الأصـاحـيـبغمر ٍ على شرع الرجاجيل ضاري(3)

اهـل مقاصيـر ٍ تبنـى عـلـى الطـيـبماصكـكـت بيبانـهـا فــي الـعـسـاري

ربعي عزاز الجـار يـا ابـا القصاصيـبياللي على شيل المشاكيك ضاري(4)

قال العجمي : تعقّب

قال ناجي : يعقّب شاربك .


1- عجب : الشيخ عجب بن محمد بن فرج بن حفيظ
2- هذال : الشيخ هذال بن وقيان البرده الشكره .
3- يقصد : فارس من آل بوعلي الشكره اسمه منيف بن حمدان في (البديع) .
4- المشاكيك : اللحم ، ويقصد الشاعر ان من سلوم الدواسر الطيّبه عدم بيع اللحم .


س : هل تعرف سالفة الأمير سعود الكبير وشهادته للشيخ الفارس عبدالله بن سند بن فرج بن حفيظ ؟

ج : نعم يروي لنا فريج الشكره وكان أحد جلساء الأمير سعود الكبير (سعود بن عبدالعزيز بن سعود الفيصل ) .

وكان لفريج قضية في الرياض ويلفي على سعود ، ويجيه ،

قال الأمير : يافريج تعال بجانبي وسولف علي .

جاء عنده فريج ، وقال له الأمير سعود : عِد علي آل حفيظ كل منهم ويش عليه من العيال ؟(أي :عدد لي ابناء آل حفيظ) .

قام فريج وعدد له آل حفيظ الموجودين ، ولين في خاطر الأمير سعود الكبير رجال من آل حفيظ نسى ان يذكر اسمه فريج .

قال الأمير : فيه رجال ماجينتي باسمه وينهو؟

قال فريج : منهو ؟

قال الأمير سعود الكبير : عبدالله بن سند بن فرج .

قال فريج : عبدالله بن سند رجال ٍ مات مبطي وعليه رجالين .

ويقوم الأمير سعود ويصد عن فريج ويوّجه وجه للحاضرين وقال :
ياجماعة ، عبدالله بن سند على الدهماء والله أنه أظفر من ظهرت عليه الشمس منا ، وغابت عليه منا ، لكن الرجال حظّه وسط .

وهاذي شهادة من الأمير سعود الكبير في عبدالله بن سند بن فرج بن حفيظ .


س : هل ممكن ان تعطونا قصيدة محمد بن حفيظ ردا ً على قصيدة صحن بن حويزي بن قويد وسالفتها :

ج : قاموا المساعرة وحدروا بالجهام والسلفان يبغون الديرة والمرابيع الزينه ، وخلوا عد ٍ لهم عد ٍ في الدحي معروف باسم (الجفير) .

وياردون قحطان على الجفير ، ويقوم خامل ٍ من الخاملين ويجي له بكلام ٍ مهوب زين في العد وأهله ، ورد العلم لابن قويد.

قال ابن قويد : يامساعره ترانا مسندين على قحطان وترانا حرّابه .الرجال اللي مهوب جاي ٍ مظهوره وأهله وأبله ، تراه ماحما لنا ولا لنا فيه حاجة .

انضموا عليه رجال المساعره .

أراد الله أن المساعرة يتواجهون مع آل مسعود من قحطان ، ويكسرونهم ويذبح منهم عرب ، ويلعب واحد من القوده ينقال له صحين بن حويزي بن قويد وقال قصيده منها :

ياراكـب مـن فـوق ســت تعـنّـامن حميها تكسر قوي المواسير

تلفي على ابن حفيظ زبن المجنّامن عزوته ذبن بروس القناطير

يالـيـت سلفـانـه تـبـاري ظعـنّـايوم التقينـا بيـن عـذال ومشيـر

وصلت القصيده ورد عليه محمد بن فرج بن حفيظ :

يـاراكــب مـــن فـــوق تـســع تـعـنّــامحـيـلات فـــي اللـيـالـي المخـاضـيـر

تـلـفـي (صـحـيـن) عـيـدهــم لأقـبـلـنّـاعيد الركاب اللـي هجـاف ٍ مـن السيـر

يـامـرحـبـا ً بـركـابــه الــلـــي لـفــنّــالامـنـه بــدل رفقـتـه قـاطــع الـسـيـر

لـيــت الحـمـايـا يــــوم جــنّــا لـفـنّــابيـن (اللـدام) وبيـن عـوج الدواويـر(1)

والله ان يـجـيـكـم يـارفـاقــه ظـعـنّــاوخـيــل ٍ تـنــازا بـالـقـروم المـنـاعـيـر

حـربـيـنــا لاشـافــنــا جـــــظ مـــنّـــامثـل الخريـش اللـي بلاهـا مـن الطيـر

مـاقـومـه الا فـــي الـمـلاقــا طـعـنّــامن فـوق قـب ٍ معسكـرات المساميـر

ميـر يانـفـدى الـلـي يــوم غبـنّـا كفـنّـاسربة (صخاف الشول) عند المعاشير .

لاجـرّهـا( ابــن قـويـد ) زبــن المـجـنّـايسهـج حفيـف مـثـل سـهـج الطوابـيـر

1- يتمنى انه قريب منهم لكي ليفزع لهم .

س : هل تذكر لنا ايضا بعض القصائد في قبيلة الدواسر ؟

ج : الشعر ديوان العرب ، والقصايد كثيره :

هتلان بن هتلان من آل حوشان الشكره ، عربه دايم صوب العارض وهو يحب الجماعة اللي يمشون مع الأسهال ويمشون مع النيّات الوساع ، ويوم جاء سنة من السنين حدر بمظهوره واهله يبي يعارض الجماعة اللي يبون يروحون شمال ، واذا العرب قد سبقوه وفاتوه ، فيقول :

يــــادار ويــــن مـلـيـنـيـن الـمـصـاريــعهـــاذي جـدايـاهــم عـفـتـهـا الـريـاحــي

أهـــــل ذيــــــدان ٍ تـــوّلـــد مــرابــيــععـــرب ٍ مـظــرّات بـرعــي الـفـيـاحـي

وأهــل مـظـهـور مـــن الـقـفـر مـازيــعلا نغزلـت فـي الصيـف بـيـض الفقـاحـي

اهــل سـربـة فـيـهـا رمـــوع الـمـداريـعلاقـادهــا عـقــب الـعـذيــر الـصـيـاحـي

يـــروون مــثــل مــــورّدات الـمـنـازيـعلاجــات تجذبـهـا سـوانـي (ارمـاحـي)(1)

ولـهـم عـلـى شّـــان (سِـعــد) مـرايـيـعلامن استوى عشب الوعر والسماحي(2)

ومقيـاظـهـم بـيــن الـعــذوق المهـانـيـعومجالـس ٍ فيهـا اشقـر البـن فاحـي (3)

1-اراماحي : المقصود عد رماح المعروف .
2-سِعد : عد سعد المعروف .
3-العذوق المهانيع : النخيل .


س : مواقيف أسرة آل حفيظ الكريمة كانت ولازالت كريمة ويفتخر بها جميع ابناء الدواسر سواء في الماضي او الحاضر ، هل تذكروا لنا بعض هذه المواقف ؟

ج : صار سنة من السنين دهر على البوادي ، وضاف الحلال مع البدو ، وبعضهم ماقدر حلالهم يشيله من محل الا محل ، عقب قام الأمير مناحي بن سند بن محمد بن فرج بن حفيظ الله يرحمه وراح للملك عبدالعزيز وقال :

ياطويل العمر ، البوادي لحقهم نصب وحلالهم ضعف ، والزوامل التي تشيل اثاثهم وقفّتهم ، وفي حاجتكم بالفزعه .

قال عبدالعزيز الله يرحمه :

ارسلوا مع ابن حفيظ عشرين سيارة تشيل عرابانه وقبايل اللي يبي وين يبون ، وين تبغون تروحونهم؟

قال مناحي :احد بنروحه للأفلاج وأحد بنروحه للحساء .

قال عبدالعزيز : عطوهم سيارات اللي يبغي يروح الأفلاج للأفلاج ، واللي يبغي الحساء يروّح للحساء على الريل ، وحطوا على( التوضيحة ) مقصب ذبايح ومطبخ وعيشوا المسلمين لين الله يرفع خملهم.

ويفرج الله على المسلمين باسباب الله ثم اسباب الأمير مناحي بن سند بن حفيظ .

والموقف الثاني للامير حسن بن عجب بن محمد بن فرج بن حفيظ ، ، حصل بعد دهر ٍ مثله ، ولحق البوادي نصب ، وركب وراح للملك خالد ولي العهد وكان الملك في وقتها فيصل ، وقال:

ياطويل العمر البدو لحقهم من الأمور من اللي معاد يطيقونه ، وباديتكم في حاجتكم .

قال خالد :

يظهر امر على المالية تظهر سيارات بتمر ورز ودهن مع ابن حفيظ يوزعها على قبايله في المحل اللي هو يبي .

قال حسن بن عجب : تروح لخريص .

وفعلا جاته في خريص سبع وعشرين سياره ، أكثرها (شاحنات مرسيدس سقوس) .

ويفرج الله على المسلمين باسباب الله ثم باسبابه .وومواقف ال حفيظ من ذي وأكثر من العلوم الطيبه .



س : ابو فيصل ، عرف انك شاعر مجيد ولك قصيد في الفخر هل تشرفن بسماع بعضه ؟

ج : بكل سرور ، أقول في الفخر :

نـعــس ونـشــد الــيــا جـلـبـنـا الـهـنـيّـاتعــرب الـبـكـار الـــي تـنـومـس طبايـعـهـا

الـيـا نـقـصـت مـدوهــن اقـبـلـن عـجــلاتعـلـى ثــر زعـوجـن ظـاهــرات شوايـعـهـا

رعيـنـا الـزعــوج بـحـايـر زايـــف الـنـبـاتبـجــو الـخـبـاري يـــوم زانـــت مـراتـعـهـا

عـنـد الـجـهـام نـنــوس مـاردنــا خـيـفـاتولا زارنــــا قــــوم ٍ طـمـامـيـع نطـمـعـهـا

عمدنـا الضويلـع مـن جنـوب جـونـا غــزاتوقـفـى عـلـى الابــل قــد تـخـزز قرايعـهـا

لحقـوه ربعـي واعـفـرو بــه مــع الأمــواتورد الـجـهــام وشـلّـخــو كــبـــد زايـعــهــا

ومثل يوم جـاء (شعـوان) بأهـل الكريزيـاتيـبـي عـزمـة شـــرق السـلـيّـل بيقشـعـهـا

عينـا اهـل الـبـل حاضـريـن لـهـم صــولاتعـثـوا بــه منـيـع وسـربـة الشـيـخ وادعـهـا

ومثل يوم جاء( الدامر) وربعه على العيراتبثلاثيـن حــوض ٍ مــن شـبـا نـجـد قاشعـهـا

وجـاوه مداغيـش ٍ عـراض ٍ علـى الزلـبـاتعـثـوا بــه منـيـع وسربـتـه ضــم ضايـعـهـا

ذبحنا (الضواعـن) يـوم جونـا علـى الغـرّاتتـحــذّى حـوافــر خيـلـنـا مـــن قـنـازعـهـا

ومثل يوم جاء (مانـع) وربعـه و لـه هقـواتوشـاف الوضـاح اللـي كمـا البـرق لامعـهـا

فخـايـر وقـــال الـيــوم ماصـابـنـا قـــالاتعـــوّد عـبــات الـــذل فـوقــه مقـوبـعـهـا

ومثـل هيـة ٍ صـارت تنـيّـف عـلـى الهـيـاتتحـامـت( سبـيـع) ولايـمـت مــن يشايعـهـا

وجــو فــوق خـيـل ٍ حزمـبـاً بالـسـواريـاتوجـمـوع ٍ تـزافــا ً لـيــن قـمـنـا نطـوعـهـا

بـضــرب المـهـنـد والـتـفـق والعـريـنـيـاتنشـيـل النـفـوس اذا نــوى الــرب ينزعـهـا

جمـع( السبيعـي) فـر واخلـى( الجلالـيـات)ومـــن ضـربـنـا جـنّــب حـلالــه وضيـعـهـا

هـــاذي فعايـلـنـا وحـنــا هــــل الــعــادات.(صـهـيـبـة ٍ) رد الــبــرا مــــا يـزعـزءهــا

وصــلاة وســـلام عـــد مـايـزهـر الـنـبـاتعلـى مـن عطـى حـق الشفـاعـه يشفعـهـا

س : بوفيصل ، في ختام هذا اللقاء الرائع والممتع معكم ، هل من كلمة توجهها لأبناء شباب موقع قبيلة الدواسر الرسمي؟

لسماع الكلمة صوتيا ً



أو أضغط هنــا

ج : الشباب اللي قاموا بخدمة المنتدى ، شباب توجد فيهم جميع المزايا الحميده وتوجد فيهم النفس الطيبه والأهداف النبيلة ، ولا غروى فهم شباب مؤهلين لأكثر من هذا ، ونحن نشكرهم ونثني عليهم وبيض الله وجيهم ، وهاذي اثار ٍ تبقى للأجيال وهم السبب .

س : ما رأيكم بفكرة أنشاء الموقع ؟

ج : ناجح ، وأنا من المؤيدين له .


وبعد هذا اللقاء كان لنا هاذي الوقفات مع ضيوف اللقاء .


وكان لنا هذه الوقفة مع الأمير فرج بن عامر بن حفيظ :



الأمير فرج بن عامر بن محمد بن فرج بن حفيظ


س : هل تعطينا نبذة شخصية عنك لأخوانك وابناءك اعضاء موقع الدواسر الرسمي :

الاسم فرج بن عامر بن محمد بن فرج بن حفيظ
مواليد : 1366 هـ
أعمل في الحرس الوطني وتقاعدت منه ، وكان والدي الله يرحمه أيضا ً قضى عمره في خدمة الوطن في الحرس الوطني وكما ذكر ابو فيصل شارك في حرب فلسطين وكان احد قواد الجيش السعودي .


س : انطباعك يابوعامر عن موقع قبيلة الدواسر الرسمي ؟


لسماع الكلمة صوتياً أضغط هنا

ج : اما بالنسبة للموقع ومنتدى الدواسر ، فنشكرهم على المعلومات الصحيحه التي تنشأ من مصادر حقيقة ، ومن أصحاب الشأن الذي يخصهم أي مجال تسجيله .ونشكرهم على ماقاموا به ، ونبارك لهم في جهودهم وفي مما مشوا فيه.


وبعدها كان لنا هذه الوقفه مع الاميرمحمد بن مناحي بن حفيظ


الامير محمد بن مناحي بن حفيظ

س : ابو سالم ، نحن نعرف انك من أوائل المؤيدين للموقع ومن المتابعين له ، ومن خلال هذه المتابعه فما هو انطباعكم حتى الان ؟

لـسماع الكلمة أضغط هنـا

ج : اولا ً نشكركم على ماعملتوه في منتدى الدواسر ، وهذا شي ٍ شان ٍ للجميع ، ونشكركم على أعمالكم الطيبه و على توجيهكم الصحيح ، ومشكورين على كل حال .




كما كان لنا هذه الوقفه مع الشيخ والداعية المعروف حفيظ بن عجب آل حفيظ


الشيخ والداعية المعروف حفيظ بن عجب بن فيصل بن حفيظ

والذي ساعدنا ً كثيرا ً الى جانب اخيه الرائد سند في اعداد هذا اللقاء ، وقد اثنى الشيخ حفيظ على الموقع وترّجل بهذه الأبيات :

أهلا وسهلاً بـك علـى العـز والديـنياموقعـن حـاز الشـرف والكرامـه

(هايف) يديرك من قرومن عزيزيننسل (العماني) عزتـه فـي مرامـه

الله يـوفـق سعـيـكـم يالميـامـيـنويـزيـدكـم عـــزن بـلـيـا نــدامــه

مني وانا (ابن حفيظ) مافيه تخمينشاعـر واقـدر مـن يثـمـن كـلامـه

الأستاذ هايف مبارك العماني متوسطا ً الحضور


لقطة جماعيه آل حفيظ الكرام أمراء قبيلة الشكره .


الأمير عجب بن سند بن عبدالله بن سند بن فرج بن حفيظ
رئيس مركز المثناه بالأفلاج .



الشيخ الرائد سند بن عجب بن فيصل بن حفيظ



من اليمين الشيخ حسن بن ناصر و الشيخ حفيظ بن عجب و الشيخ ناصر بن عجب و الشيخ الرائد سعود بن عجب و الشيخ فيصل بن عجب و الشيخ عبدالله بن حسن




محمد بن مناحي وفرج بن عامر وناصر بن فيصل وسند بن عجب
وعجب بن حسن وسالم بن محمد بن مناحي


الشيخ عجب بن سند ومحمد مناحي وهايف العماني وفرج بن عامر


الشيخ عجب بن حسن بن عجب بن حفيظ


الشيخ فيصل بن عجب بن حفيظ


الشيخ ناصر بن عجب بن حفيظ


الشيخ عبدالله بن حسن بن حفيظ


وفي ختام هذا اللقاء الشيّق ، لا يسعنا الا نتقدم بخالص الشكر والتقدير لأسرة آل حفيظ الكريمة الذين غمرونا بكرمهم وحسن استقبالهم وسعة صدورهم ، وطيب محياهم ، ونسأل الله ان يجمعهم وان لا يفرقهم أبدا ً ، كما نتقدم بالشكر الخاص للوالد الأمير ناصر بن فيصل آل حفيظ على رحابة صدره ، واجابته على جميع الاسئلة ، ونسأل الله أن يطيل بعمره على طاعته ويمتعه بالصحه والعافيه.

موقع قبيلة الدواسر الرسمي
www.alduwaser.org/vb

 

 

 

 

[معلومات العضو أبونواف الدوسري]

أخواني الأداره وفقكم الله علي هذا اللقاء التاريخي مع

الشيخ ناصر بن فيصل بن حفيظ وأسرة آل حفيظ الكريمة

حفظهم الله لنا

وجزيل الشكر والأمتنان لأخونا العزيز هايف العماني حفظه الله ورعاه

علي جهوده في أتحافنا بهذا اللقاء...

 

 

 

 

[معلومات العضو أبو سعود الودعاني]

كفوا في ذمتي ال حفيظ

ولاهان اخي الغالي الكريم

هايف العماني

على هذا الجهد الذي يشكر عليه

وهذا ليس بمستغرب عليه وعلى مجلس إذارة هذا الصرح الشامخ

وتقبلوا خالص ودي وتقديري

 

 

 

 

[معلومات العضو فيصل الشكري]

نشكر الاداره الكريمه على هذا اللقاء التاريخي مع اسره آل حفيظ الكريمة

كما ان الشكر موصول للأخ / هايف العماني على اجراءه هذا اللقاء الطيب


وتقبلوا وافر التقدير ,,,

 

 

 

 

[معلومات العضو جلعود المخاريم]

اخي هايف العماني


لك منا كل الشكر والتقدير على ما اتحفتنا به من هذا اللقاء الجميل الذي سوف يحفظ في الاذهان لما اتحتفتنا به من قراءة لتاريخ آل حفيظ المليء بكل ما هو ينومس رجال القبيلة

دمتم بكل خير ونور

 

 

 

 

[معلومات العضو أبـوشـبيـب @]

بيض الله وجهك يا أبومبارك على هاللقــاء المميز.. والثري..


وكذلك السرد الرائع والطرح القوي ...



إلى الامام وإلى مزيد من التقدم ...



أخوك

أبوشبيب

 

 

 

 

[معلومات العضو سلطان بن دخيل الله]

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل ال حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,

 

 

 

 

[معلومات العضو خالد الحقباني]

بيض الله وجيهكم يا ادارة المنتدى على هذه الوقفات مع التاريخ
كل الشكر لك اخي هايف ولهذه الاسرة الكريمة

 

 

 

 

[معلومات العضو بن حفـيـظ]

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل بن حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,

 

 

 

 

[معلومات العضو ابن حنيش الودعاني]

نشكر الاخ هايف العماني على هذا اللقاء مع اسرة ال حفيظ
وبيض الله وجهه

 

 

 

 

[معلومات العضو فهد الغريري]

تسلم اياديكم على مجهودها في اللقاء المتميز مع احد اعلام قبيلة الدواسر الامير ناصر بن فيصل بن حفيظ واسره آل حفيظ الكريمة هايف العماني .. بيض الله وجهك على هذا المجهود الجبار الذي تبذله في سبيل الرقي بقبيلتك والله يجعلك ذخر لقبيلتك وابناء عمومتكم تقبل منـي ارق التحـايـا....

 

 

 

 

[معلومات العضو علي الجعيدي]

مشكورين على اللقاء مع الاخوان الاعزاء آل حفيظ
ونعم فيهم جميعا وفي الشكره صحبة حلوه وعلوم طيبه وطيب خوه

 

 

 

 

[معلومات العضو أبوبندر الحطيم]

الاخ ابومبارك كاالبحرالمتلاطم دائما كما عوتنا تسلم يمينك وبيض الله وجه ويستاهلون هل الست

 

 

 

 

[معلومات العضو تركي ال فنيس]

كفوا ال حفيظ

ولاهان اخي الغالي الكريم

هايف العماني

على هذا الجهد الذي يشكر عليه

 

 

 

 

[معلومات العضو الشــقاوى]

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل بن حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,