عزة النفس عند الأمير الشاعر محمد الاحمد السديري

**معلومات** **العضو** · 20-08-2010, 11:18 PM

الامير الشاعر محمد الاحمد السديري أسطورة الشعرالنبطي

شـي بقلبـي يامـلا حايـر فـيـه=شي تحيـر بـه العقـول الفهامـي
اخفيـه بفـوادي ولا ودي ابـديـه=وادور الخيـرات شـرق وشامـي
احترت به ماشفـت شـي يحاليـه=واليوم ابنشـد عنـه مانيـب كامـي
سيل حدر مـع وادي غيـر واديـه=مـدري حـلال مـاه والا حرامـي
كانه حلال وجايـز شـرب صافيـه=وش حلله يـا مفسريـن الحلامـي
هاتـو تفاصيلـه وهاتـو معانـيـه=نبي الدليـل اللـي عليـه الكلامـي
نبـي دليـل يفهـم الـدرب ماشيـه=يمشـي بـه التايـه بليـل ظلامـي
يمشي به التايـه ويقـدي مواطيـه=ويشرب قراح الما اليا صار ضامي
لاشك هجسي يـوم خـلا مماشيـه=انـه حـرام ومنـه زود الاثامـي
احرم مـن الزقـوم مـره وحاليـه=وشربه على الظامي يزيد الهيامـي
الله مـن قلـب همـومـه تقـزيـه=تـدك بـه مثـل الجـراد التهامـي
من مما جرا قامـت تتلـه مشاحيـه=تل الرشا من فوق هدف المقامـي!!
روابـع قامـت تصيبـه وتخطيـه=شاف الهوايل واختـلاف الاسامـي
ما يسمع الداعي اليـا قـام يدعيـه=يعوم في بحـر مـن الهـم طامـي
مـا ينتبـه للـي بصوتـه ينـاديـه=يزيـد همـه يـوم كــل ينـامـي
يشـوف وقـت ماعرفنـا توالـيـه=وقت يشيَب مـن بسـن الفطامـي!!
هـذا زمـان كـاثـرات بـلاويـه=والغيم يقلـب فيـه عـج وكتامـي
يابعد شرب الما على كبـد راجيـه=ما سيَل الغبـرا زعـوج الجهامـي
انبيك يامـن كلمـة الحـق ترضيـه=اعطيك ما ينفعـك وافهـم مرامـي
خله عسى ما صاب اغاديـر يفنيـه=يودع منازلـه الطويلـه رجامـي!!
لو زان مدخالـه وطالـت حواميـه=شيَد على الخيبـه قليـل الرحامـي
وحـي يوريـك المذلـه وتغلـيـه=انا اشهد انك ميـت القلـب عامـي
مـن لايـودك لا تـوده وترجـيـه=ارفـع مقامـك ياعزيـز المقامـي
ارفع مقامك عـن عـدوك وتوذيـه=ويلحقك من تركت رفيقـك ملامـي
حـق الرفيـق وواجبـه لا تخليـه=يلزمـك مثـل الوالديـن الحشامـي
اختر عزيز الجار والحـق يعطيـه=شبل على هرج يقولـه يحامـي
مادك بـه عـرق المذلـه وطاريـه=ويسبق على فعل الفضيلـه شمامـي
ومن قارب الاجرب بالامراض يعديه=عداوة تسطـي باللحـم والعظامـي
درب السلامـه بينـات مماشـيـه=ودرب العطب يرث عليك اللكامـي
ابعد وقلبـك نـازح البعـد يشفيـه=وتلقا عن الـدار البغيضـه مقامـي
دار بـدار وداعـي الـذل عاصيـه=ولا تقبـل الذلـه نفـوس الكرامـي
الـذل مـوت حايمـات ضوامـيـه=ادخل على منزل فروض الصيامـي
عن مقعـد بالـذل عينـك تراعيـه=الموت عند الـذل امـان وسلامـي
يرضى المذله من تـردت هقاويـه=والذل يجفل منـه قلـب العصامـي
والعبد له رب عـن النـاس يغنيـه=ولولاه ما صاب الهدف كل رامـي

**معلومات** **العضو** · 21-08-2010, 01:59 AM

انتقاء رائع لاحد اساطير الدواسر رحمه الله رحمة واسعه
وبارك الله فيك اخوي ابوفهد على الانتقاء الطيب والرائع

**معلومات** **العضو** · 21-08-2010, 02:16 AM

الله يرحمة رحمةً واسعة ويبارك فيك اخوي ابو مطر هذا من طيبك طال عمرك

تحياتي وتقديري~ْ،

**معلومات** **العضو** · 21-08-2010, 03:23 AM

الله يرحم الامير الشاعر/محمد الاحمد السديري ويسكنه فسيح جناته

والله يعطيك العافية ياابو فهد على الانتقاء الرائع وعساك على القوة

تقديري,,,,

**معلومات** **العضو** · 21-08-2010, 03:28 AM

بيض الله وجهك يابوفهد على هذه الرائعة لامير الشعر والكرم والخصال الحميدة

**معلومات** **العضو** · 21-08-2010, 03:48 AM

رحمة الله رحمةً واسعة واسكنة فسيح جنانه

لاهنتو يالنشامى على مروركم الكريم

اخوي محمد بن حمد الشكرة

اخوي شافي النتيفات

تحياتي وتقديري~ْ،

**معلومات** **العضو** · 23-08-2010, 02:23 AM

((مدرســــــة عزة النفس)) ...احسنت الانتقاء ...

**معلومات** **العضو** · 23-08-2010, 02:37 AM

صح لسان الشاعر العلم رحمه الله

لاهنت اخوي الكريم على النقل

**معلومات** **العضو** · 23-08-2010, 03:10 AM

رحمة الله رحمةً واسعه واسكنه فسيح جناته

ولا هنت مراقبنا الغالي محمد بن سالم الخضراني على مرورك الكريم

تحياتي وتقديري~ْ،

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية