تعقيب على موضوع في قسم تاريخ الدواسر

[معلومات العضو الكاتم]

حياك الله ياقحطاني وتقديرك وتقدير ربعك على العين والراس وانتم عواني وبيننا وبينكم نسب قوي على مستوى القبيلتين
واسمح لي بالتداخل في موضوعك رغم اني لست من الاداره ولست صاحب الموضوع ابو زابن المسعري ولعلهم يردون عليك بما تريد التوصل اليه.
بالنسبة لي أحب ارد على نقطة معينة وهي قول:

وزودن على ذالك ال قويد يختلفون عن بقية قبايل الدواسر في طبعهم واقصد انهم لا يمنعون الناس من شرب الماء او سقي الماشيه من العدود التي تعود ملكيتها للقوده

احب ابين لك ولكل قاريء أن القوده وجميع قبايل الدواسر لا يمنعون من شرب الماء أو سقي الماشية حتى لو كان الوقت شحيح ، ولعل في قصيدة وسالفة جريس بن جلبان العجمي اللي نزل عند الدواسر وكان لايملك من الحلال إلا القليل أو معدوم وقاموا الدواسر بإكرامه ويوردون ابله على الماء قبل ابلهم واعطوه من البل اكثر مما كان يملكه عند ربعه وبعد اشهر استأذن من الدواسر يبي يرجع لربعه ، ومر على أحدى القبايل المجاورة للدواسر ويوم اراد يسقي ابله الماء طلبوا عليه مقابل !!!
فتحسف العجمي على أنه ترك ديار الدواسر وعزم الرجوع لهم وقال الأبيات التالية:

أوي ديرة ٍ من بين حمر النفايد=قبليّها الجزلا و خـرب ٍ وراهـا
ديرة صناديد الرجـال آل زايـد=اهل ديرة ٍ من قل ماله نصاها
اهـل بيـوت ٍ كنهـن الفرايـد=يامن بها الخايف الى من وزاها
اعتضتنا فيها الوجيه الزهايـد=اهل القرايا اللي يبيعون ماهـا
فيا يا راكب اللي يقربن البعايد=حراير ٍ قطـع الفيافـي مناهـا
خلها تعـود دام ثرهـا جدايـد=تنصا آل زايد مكرمة من لفاها
عند الصعوب مهونة كل كايـد=لامن وردهم حجـة ٍ نجحاهـا
نصيتهم وانا من المـال بايـد=جلوا الهموم و طلبتي كملاهـا
تكملت من تمر هدب الجرايـد=و شريت منها البل بما ثمناهـا
ابوصي البيضا مع كـل رايـد=لاهل الحميه ممنيـن حماهـا

وبالنسبة لموضوعك القديم إن كان في الردود سب أو تعدي على قحطان العزيزة فهذا غلط وهذا دور الإدارة ولا نرضا أن تسب قبيلة في منتدانا لأنه عودنا على احترام الجميع في الحاضر والماضي واعطاء كل ذي حق حقه
وإن كان قصدك أن القصة غلط لأنك لم تجدها في الكتب التي قلت إنك بحثت عنها فهذي ليست حجة لأن السوالف تنقل من صدور الرجال الثقات وليس شرط أن تكون مدونة في كتاب.
وعموماً اترك للإدارة ولك وللاخ ابو زابن المسعري التواصل وحياك الله في منتدى الدواسر ياقحطاني والله يجمعنا وياكم وكل القبايل على العز والطاعة تحت قيادة ولاة امرنا اعزهم الله ونصرهم.
شكراً