قصيدتي في احتفال عيد الفطر 1434هـ بمحافظة وادي الدواسر

[معلومات العضو ابو زابن المسعري]

المشاركة الأصلية كتبت بواسطة راشد المسعري

السلام عليكم ورحمة الله وبركاته:
تشرفت بالمشاركة في حفل محافظة وادي الدواسر بمناسبة عيد الفطر 1434هـ أعاده الله علينا وعلى الأمة الإسلامية بالخير والنصر واليُمن والبركات ، بحضور محافظة محافظة وادي الدواسر بالإنابة/ خالد بن محمد الغملاس وعدد من شيوخ وأعيان وضيوف محافظة وادي الدواسر:-

مسّاكم الله ياهل الوادي بخير
ويسعد مساكم يالوجيه السفيره

لا جاتنا الدعوة تركنا المعاذير
وجينا نشارك والهقاوي كبيرة

في محفل الوادي سقته المزابير
يامربها اللي عالم بالسريرة

وإن طروّا الوادي يصير الوضع غير
وادي الدواسر والأسامِ الشهيرة

وادي تسمّا بإسم قومٍ مناعير
إي والله الوادي ولافيه غيره

ومن عاش معنا يبتهج كنّه أمير
يامرحبا وأفضال ربي كثيرة

في حفلنا فاحت زهور ونواوير
والشعر حاضر والمعاني غزيرة

العيد له فرحه ولذه وتقدير
عند أمة الإسلام في كل ديرة

عيد الفطر عيد الفرح والتباشير
يالله عساه يعود بأمن وستيره

ويالله عسى الإسلام من خير في خير
ومن ينصر الإسلام يالله تجيره

وتحمي وطنّا من شرور المعاثير
أهل الفتن وأهل العقول الصغيرة

في ظل أبو متعب حبيب الجماهير
زعيمنا قايد زمام المسيرة

هو درعنا وقت الليال المعاسير
وحنّا حزامه والسعد والذخيرة

لامن دعانا كلبونا طوابير
وحنا سيوفٍ في الملاقا شطيره

دون الوطن نثبت بوجه الأعاصير
ونخلّي الطامع يذوق المريرة

صح السانك يابو محسن جزل
والوادي واهله يستاهلون

 

 

 

 

[معلومات العضو حمد ابن فهد]

عز الله يستاهلون الامداح هل الوادي صح لسانك ملايين يابومحسن جزل دائما وتطرب مسامعنا قصايدك ياكحيلان لاهنت