أخواني الأعزاء ...
أسعد الله أووقاتكم بكل خير ..
اما بعد ...
أنقل لكم هذه المحاورة بين
الشاعر/
محمد بن عبدالله الغييثات الدوسري
والشاعر/
بدر الشلاحي المطيري
بدأها الشاعر /
محمد الغييثي
امطير أنا أشوفها قامت تشد الحزام = وقلوبها امن الشقاء فاحت لواهيبها
لكن جعل السعد في دربهم ماينام = أعزها ياعرب والله من طيبها
بدر الشلاحي:
امطير هقواتها فوق السحب والغمام = ماكر حرار(ن) تعشيها مخاليبها
وأنته من العزوه اللي مايجيها الملام = وأهل المواجيب ما تترك مواجيبها
محمد الدوسري:
أعرفك يا صاحبي والحمل فوق السنام = وامطير وقفاتها مده وندري بها
ياصاحبي راتبك روحه كله عدام = وأنا معك والربع ماعاد في جيبها
بدر الشلاحي:
يا محمد الدوسري مافيه برد وسلام = نارٍ تلظى وتحذف ابمشاهيبها
واللي وقف في طريق مطير لازم يضام = واشيب عينه من المطران وا شيبها
محمد الدوسري :
يا بدر ما هقوتي تملك يديك الخطام = دام العرب فتلت قدمك أشانيبها
ما أقول فيكم ردى ما أقول فيكم ملام = والناس في هالزمن كثرت هناديبها
بدر الشلاحي:
لابان نور القمر ينزاح كل الضلام = وتبين كل الحقايق لين تدري بها
لكن صبرك علينا يا عزيز المقام = انموت بالعز والهزعه ما نرضي بها
محمد الدوسري :
البنيه الي اكملت حذراك ترجع هدام = يا كود تصليحها يا هون تخريبها
دام الذيابه عوت ماعاد فيها منام = علتك يا صاحبي فالليل تمسي بها
بدر الشلاحي:
حنا بنينا بيوت العز شرقٍ وشام = بيوت عز وفخر كل ٍيماري بها
ولاعاد فيها مجامل فيه قص العظام = لو الجبال الشواهق عاويٍ ذيبها
محمد الدوسري:
ياصاحبي وش بقى ماعاد فيها كلام = واللي بقى ضربةٍ فالرأس توحي بها
قامت عليك العرب يا بدر ترمي سهام = وأحذر من العقربه تلوي لك أذنيبها
بدر الشلاحي:
حنا ليا قامت الهيجا وزاد الزحام = النا سهومٍ عطيباتٍ مضاريبها
والنصر من ربنا الخلاق رب الأنام = والعقرب ام الذنب شينه هناديبها
وسلامتكم ,,,,
و تقبلوا فائق التحية والتقدير
أخوكم /
عبدالرحمن بن سالم الشرافي