يـالله ياللـي مـارجـيـنـا بـدالــه =يا فالـق الاصـبـاح يا مبـدل الحـال
يا حـق يا مـرسـي رواسـي جبـالــه=يـا باسـطٍ سبـع ٍ وسبـع لـه اظــلال
يا مـن كشــف ليـوب والضـر زالـه =يا مـظهـرن يوسـف من الجـب بـحبـال
يا منـزلـن سـبـع المـثاني دلالــه =وانـزل كتـابه فيه تـحديد لعـمال
تـفـرج لـمـن قلبه تزايد جدالـه =سـلطـان فكـره بـيـن نـازل ورحال
واجهـت مـن عـسر الليالـي نـكالـه =وادركـت فيـها ما تـخبـيـها الانذال
وعانيـت فيـهـا ما تـعاني رجـالـه= لانـي بـها الاول ولاني بـها التــال
فيـها عـزيز النـفـس يبـلـش بـحاله =وانذالـهـا مـن مكـسـب الذل تكتـال
بــعـض الرجال يـظـن وزنه بـمـالـه =ما يعـرف ان العجــز مثله لـهن مـال
وخــلاف ذا يا مسـتمــع للـرسـالــه =ايــجــاز مبدا واحـد عنه ما حــال
فيـهــا لصافيــن السـراير عـماله= لا ضـاعت العـملـه مـع مـعرب الخـال
لا تفتـكــر نـهـج التـملـق رجالـه =ونـقـل السوالف يوصل الحبـل بحبــال
نقل الســوالف جر ذيل الرذالــه =وثوب الردى حتمن على الستر ينجال
واللي يبـي من منهـج الذل قالـه =اخطا الـهدف واصبح ذليل ومن محتال
ومن أنكر اصله ظل واترك مـجاله =عده فقيـد ترتـجي فيه الابــدال
ولعـل فـرع ما يظـل اظـــلاله =ولابه ذرى وان هبت الريح ميال
عسـى صروف الدهر تقطـع اجلالـه= ويـخر من عالي فروعـه إلى الجـال
واذا حضـرت بـمجلـس به جدالـه =وطال الـحديث وحل تفكيك الاقفال
اصحـى طويل الصـوت لا جـا مجالــه= يـخـدعك بقـواله وتصـدم بالافعـال
يلـزمك تطلب عـن سجلــه رسالــه =وتعـرف فيهـا عن سلوكــه ولحــوال
واذا تضـح لـك ما خـفا مـن خلالــه= كيـل التـعامــل قـدر وزنه بـمكيال
كـم واحـدٍ يطـغـى الشـره في مـقالـه =واذا سـمعـتـه قلـت ذا قـول رجــال
واذا الـزمــت واستـورطـت به حبالـه =عــود ذليـلٍ نـاكــسـن دون الاقــوال
يبغــي يسجـل ما قف من هبالــه= ما يدري ان تفعيل قوله له اقبال
ومن يكتـفي في مدح ابوه وخواله= لا نال مـجد ولا سـلم هــم وهبال
الـمرجلـه مـرقى صعيـبٍ منالـه =ما هيب فـي عـد الماثر والاجيال
ولا كل مـن يطـلب ذرى الـمجـد ناله =الا الذي يـوثر على النفـس والحــال
وكل تعـرف النـاس طبعـه وحالـه =وتلبـسـه ثوبٍ على الـقد تفصــال
ويـاك لا تسـمـع قليـل الـجماله =اللـي سـتـر حقـده بثـوبٍ وسربال
يطـمـح لـحمد ولا سعـى فـي وصاله =يريد شكـر ولا فعـل ربـع مثــقال
أكـذب كـذوب وحـب نفسـه بدالــه =ولا لـه بـهـم الـغير هـم ومدخال
فعلـه خبـيـث لو يـزخـرف مـقالـه =خله وطـبعـه عنـك يا طيـب الفـال
يظــن مـحـد عـارف مـا بـدالــه =والناس تدري عن جديده والاســمال