ّّّوقـــر العالـــم وتلقــى لك وقــار ّّّّ

[معلومات العضو السيف دايـم]

قل لبو نواف كملنا العذار=وانتوينا يا العطاوي بالمسير
كان ابو نايف تحصل له مدار=دوره والادفعنا له بشير
قل لبن عون تالي النهار=بالمثلث لا تسج ولا تحير
اعتجل يوم الهوى ذعذع ودار=اترك الراضه وعذر فيه مير
كان عندك بالبنا تالي جدار=افهقه والعيد ما فيه اتعمير
يم ابوسلطان عزم الفكر دار=يم غيره لا تقول ولا تشير
خلهن يمشن من ديره لدار=المواتر صافيه والدرب قير
مثل ابو سلطان له حقٍ يزار=جيته بالعيد مظهرها كبير
سجةٍ عنده تزود بالعمار=يدله الخاطر ويرتاح الضمير
في محلٍ قد جلسنا به مرار=صاحبٍ يا عز من هوله عشير
مجلسٍ يوخذ بعين الاعتبار=مدهل الشيخان وزاع العثير
دلةٍ فيها من الحب شي بهار=ومنسفٍ يشبع ضيوفه والقصير
نادرٍ له نطحة الموجب شعار=فاهمٍ بالمرجله درسٍ غزير
ما لبس ثوب النشاما مستعار=وارثٍ طيبه من الوجه السفير
أحمد اللي له تواريخٍ قرار=بالكرم مع سلة السيف الشطير
أسال التاريخ يعطيك اختيار=عن تواريخ السديري بتعبير
اقر ديوان الخليفه كان دار=شف مقاله عنه بالثلث الاخير
شف مراكيضه على قب المهار=يوم سفك الدم غادي له هدير
كان ابو سلطان هوماته كبار=تابعٍ عودٍ على دربه يسير
والعلوم طوال واحلاها القصار=زبدة الموضوع واحلاه القصير
ما بنيت الملحمه بني الجدار=كود ناسبها على فعلٍ شهير
كان للمعروف هالوقت اشتهار=السديري مع هل الجودا خشير
ما بنى السمعه على ملس العقار=ما بناها الا على فعلٍ ثمير
انشد اللي سمع بأفعال الكبار=نور الاول يقتبس منه الاخير
يوم وقتي عقب ابو زيد استدار=اجتبرت بجابر العظم الكسير
شمت لي فيه خصلاتٍ خيار=الذكا والدين والعرض الستير
لي بربعتهم معزه وافتخار=ربعة الطيب تنسيك الحقير
أفهم الطيب الخنين من البهار=يوم فاح المسك شميت العبير
قالها اللي له بعرف الناس كار=افهم الشبر الطويل من القصير
الرجال طيور توصف للحرار=وكل طيرٍ في جناحينه يطير
وين طيرٍ يحتري له كل جار=ووين طيرٍ يذعره صوت الصفير
وين طيرٍ لا نهض شق الستار=ووين طيرٍ ما يصيد الا الشرير
لا تقول ان الشجاعه بالطيار=كان فضلنا القطا عن كل طير
النداوي له على الفعل اقتدار=والحمامه بالمحارم تستذير
وان جهلت الزين والجنس المار=انشد اللي في معرفتهن خبير
افتهم مني كلامٍ باختصار=فرق بين الصوف من سلك الحرير
فرق بين الحب وانخال الشوار=اصلهن واحد لا شك الذوق غير
ربعة الطيب تزيدك بانتصار=ترفعك رفع العمد بيتٍ نضير
الردي عرفه مثل بيرٍ هيار=تنقبر فيها ويدفنك الحفير
حقة الطيب تجيك من الفقار=والردي يعطيك كرسوع البعير
لا ترابع واحدٍ بالعهد بار=وان وفا مره فهو خيرٍ كثير
التجارب خلها لك مستشار=لا تبي غير التجارب لك شوير
لا تجي مدخل يدينه بالخبار=ما لقى صيده لقى دابٍ ضرير
روس الرجال فهود وأدناها حمار=وأنت فكر بالفهود وبالحمير
وأنت في نفسك عليك الدور دار=لا تحسب انك مخلا يا الفقير
وقر العالم وتلقى لك وقار=وان حقرت احقرت لو انك أمير
والشرف لا يستوي فيه انهيار=الشرف هو مقضب السيف الشطير
والقناعه مرجله والضعف عار=وأطلب النجده من الوالي القدير
لا تجي للناس طلباتك اكثار=كل ديوانٍ تجي يمه مغير
ما خبرنا في هل الشحذه تجار=غير فقره كل نفس له تعير
خل عز النفس للعوره ستار=لو افراشك في طرف بيتك حصير
وأنت للعوده من الله بانتظار=واحدٍ ماله وكيل ولا مدير
مدت الله تمتلي منها النقار=تجعل الغدران بالملزم تحير
تجعل الوادي مريفٍ بالخضار=عقب ما هو يابسٍ قشعه هشير
الكريم معان والفارس مجار=مدي الواجب ونطاح الذخير
والعني بالذل ما فيه اشتهار=والفقر بالعز لأمجادك يثير
منزلٍ بالذل فوق أعلى منار=ينتفضل عنه مسكان الحجير
مرقدك في العز في حزم القرار=ينتفضل بالمعزه عن سرير
الغني بالنفس ما هو بالصرار=كم عنيٍ كن ما عنده ذخير
كم فقيرٍ في ثقيل الحمل ثار=وكم غنيٍ سمعته سمعة فقير
لا تقول فلان يملك له عقار=ليش انا ما ادركت من مثله واصير
واحدٍ معطيه ما هو فيك غار=لا تجي لأحوال خلق الله نظير
عز نفسك لو تبيع من القشار=بيع قرضانك ولا طلبة وزير
ولا تقول الوقت لايحني سطار=ضربةٍ خلت دماغي يستدير
غيرك الدنيا تلوحه بالحجار=لين صار الدم من خده خرير
ضامت الدنيا مدللت البكار=نازلين القفر لو جاهم نذير
وانكشف برقٍ مثل لون الشعار=يذكر الغزاي به عشب وغدير
جلعوا له ما لهم غيره مزار=في جهامٍ كنه الصيد المذير
وان مشوا لك بالسلف والنشر سار=زمة الحيران زاهيها النشير
حاسبينٍ للجهاد وللمغار=والبنادق ما تخبا بالجفير
كان شاط الهوش شيطات العشار=جتك أواليدٍ تعزوا بالفطير
موتةٍ عن قولة الخفرات نار=العذارى ما تعشق اللي ينير
وينهم هالحين مامنهم سمار=ما تشوف الهم ورود ولا صدير
مالت الدنيا عليهم بانكسار=عقب ما يضهد دبشهم كل بير
عقب شرب الدر من سور الحوار=هاجروا بالمدن يشرون العصير
والدبور اللي طبخ قدره وفار=ذوب اللي فيه من حامي السعير
لذة النيا مثل لعب القمار=لو جمعة المال شف تال المصير
لو جمعت من الذهب حمل القطار=عند نزع الروح منت بله دبير
صار بين الوارثين بلا مشار=وانعزل حق الكبير من الصغير
وأنت حقك خامةٍ عشرين وار=حقتك هذي ولا فيها خشير
فصلو منها حزامك والوزار=وأقرشوا بك صوب مثواك الاخير
وانسدحت من الفضا في وسط غار=يطردك منكر وقدامك نكير
واهني اللي مشي طلق الشكار=سالمٍ من ظلم عمر ومن عمير
لوه بالنيا بحالاتٍ خطار=يرتجي بالأخره فرحة نظير
من رحمه الله وقلبن العذار=رحمة الله تغفر الذنب الكبير
والأثيم من الصراط أقرش وعار=ان سلم من ويل طاح بزمهرير
يا الهي كان مالي اقتدار=ألتجي في رحمتك وأنت المجير
الشباب أقفى وأنا بأخر نهار=وارتجي فزعتك يا نعم النصير

 

 

 

 

[معلومات العضو مبارك الخييلي]

وونعم في الشلاحي



ماشالله عليه قصيدة أجمل من رائعة وقليل كلمت رائعة لها


والشكر كل الشكر لك يا أخي الكريم السيف دايم


وجعلك دايم الدوم سالم


تقبل شكري والتقدير

 

 

 

 

[معلومات العضو الراقي]

اشكرك من كل قلبي
وبيض الله وجهك

 

 

 

 

[معلومات العضو غازي المسعري]

ماشالله عليه قصيدة أجمل من رائعة وقليل كلمت رائعة لها


والشكر كل الشكر لك يا أخي الكريم السيف دايم

 

 

 

 

[معلومات العضو السيف دايـم]

مبارك الخييلي لاهنت يالقرم على مرورك المشرف تقبل تقديري

 

 

 

 

[معلومات العضو السيف دايـم]

أرحب يالراقي لاهنت يالقرم على مرورك تقبل تقديري

 

 

 

 

[معلومات العضو السيف دايـم]

أرحب اخوي غازي لاهنت على حضورك الغالي تقبل تقديري

 

 

 

 

[معلومات العضو فارس الدواسر]

السيف الدايم هذه القصيده كالسيف
وانت مبدع وذوقك عالي في اختيار القصايد الجزله
اشكرك وبيض الله وجهك استمتعت بقراءتها واخذت على نفسي عهد بأن احفضها

 

 

 

 

[معلومات العضو خاطر محمد الخاطر]

الله لايهينك على النقل المميز وبيض الله وجهك

 

 

 

 

[معلومات العضو السيف دايـم]

أرحب يافارس الدواسر

شرفني حضورك يالذيب

لاهنت

 

 

 

 

[معلومات العضو السيف دايـم]

ارحب يابومحمد

لاهنت على مرورك الغالي