تمنيت اني شاعر وهذي القصيده لي

**معلومات** **العضو** · 12-06-2009, 01:09 PM

إذا المراجل لبسة شماغ وعقال =قل للعذارى يلبسنّ العمايم
ما عاد يفرق زول حرمه ورجال =دام الفعايل تشبه البعض دايم
المرجله ما هيب كلمه وتنقال =وتروح ما راحت هبوب النسايم
وإلا خشونة صوت أو رفع الأثقال =أو رزة صدور وفعل الزلايم
ولا هي بعد مفتاح موتر وجوال =وإلا ردى لسانن حديثه شتايم
المرجله شيمه عن القيل والقال =رفيع نفس (ن) حر بالجو حايم
المرجله عقلٍ وزن وزنه جبال =ودون العقل وش فرقنا والبهايم
يا مسندي لو مايل الوقت بي مال =يا ولد أبويه يا عظيم العزايم
يا معرب الجدين من العم والخال =يا نخوة المفزوع وقت الهزايم
المرجله يا خوي هي طولة البال =هي العزم هي الصبر فالظلايم
فيها الكرم عزه دله وفنجال =فيها الكرامه عن ردى الطبع شايم
والدين لامنه خذا القلب منزال =مشى طريق الحق وابليس نايم
ومن لا عرف ربه في طيب الحال =لابد وقت الضيق بالهم هايم
حتى صلاتك مع جماعات ورجال =في خيرها يا خوي نعم الغنايم
ولامن نصف ليلك قم صفي البال =يا عظم أجرك بين ساجد وقايم
ولا من رفع ربي له كل الأعمال =حسن الذكر لا قالو فلان صايم
وخلك شريف القصد يا طيب الفال =سوء المقاصد فالبيوت الهدايم
واحذر تبيع النفس في دب الأنذال =وتتبع خوي إبليس راع النمايم
النفس خيل لك إذا كنت خيّال =ومن لا قوى نفسه قوته الهزايم
ولا صرت ما تدري لو يش أنت رجال =والله خسارة فيك ذبح التمايم

ولكم تحياتي .....................النادر

**معلومات** **العضو** · 12-06-2009, 08:43 PM

بيض الله وجهك يالنادر
وجعلك تسلم

**معلومات** **العضو** · 12-06-2009, 11:49 PM

النادر 2009 صح بدنك وان شالله تدهشنا بقصائدك قل

امين .

اختيار جميل يدل على ذوقك الرفيع

لك التحيه

**معلومات** **العضو** · 23-06-2009, 02:19 AM

ابيات جميلة ياليت تذكر اسم الشاعر اشكر اخونا النادر

**معلومات** **العضو** · 23-06-2009, 06:35 AM

لاهنت ,,,وبيض الله وجهك يالنادر 2009

ودمتم بحفظ الرحمن.....

**معلومات** **العضو** · 23-06-2009, 01:33 PM

الله أكبر .. صح لسانك ولسان من قالها

وأشهد أنها أبيات مؤثره وصادقه

محبك/ أبوعبدالرحمن الودعاني

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية