السلام عليكم ورحمة الله وبركاته
..................
الشاعر والأديب /
محمد بن عبدالله بن جلوي المهنا الشكره الدوسري
( فتيــل )
شاعر فصيح ونبطي ,, وكاتب روايه ,, وقصه قصيره
حاله كــ حال الكثير من شعراء الدواسر المظلومين إعلامياً
وأنا من خلال هذا الموضوع سأستعرض لكم بعض قصائده النبطيه ,, إن شاءالله تعجبكم
..
صلووو عــ النبي
..
(( ثالث نهار العيد ))
مرثيه في والده المتوفي في مكه ، حج عام 1423/12/13 هـ
وقد دفن في مقبرة
( المعلاة ) في مكة المكرمه ,, وقد كان مرافقاً له
فقال هذه الأبيات متأثر بفقدان والده :
يالله يالمعبـود يامنشـي الـكـون = بــ أمـرك يسيـر الكـون ذرّة .. و .. ذرّة
عالم خفايا السرّ لـو كـان مكنـون = وما يعلـن المخلـوق واللـي يسـره
ياناصر ٍ موسى على جنـد فرعـون = ورافع عنا أيـوب كاشـف لــضـرّه
تغفـر لعبـدٍ بــ(( المعـلاة )) مـدفـون = عند الحـرم والبيـت تعلـم مقـرّه
عدّ المطـر واعـداد نـاس ٍ يلبـون = وعدّ الهـواء لادار وسـط المجـرّة
وعسى حمام البيت حوله يحومـون = وفوقه قراح المـزن عـذبٍ تـدرّه
ونبت الخزامى فوق قبره يقومـون = والفـل والريحـان فـي مستقـرّه
سنة (( ثلاثة )) مات من عقب (( عشـرون )) = و (( اربعمية والالـف )) .. ماغيـر مـرّه
( ثالث نهار العيـد ) راحـو يطوفـون = وعلى فراش المـوت يقـرا سـورّه !
وصّاني " ارمي " عنه لاجـوّ يرمـون = ومالي فضل لو متّ في درب بِـرّه
استغفر الله ... كـان للـروح يشـرون ؟ = لاشري لابوي الروح في كـل مـرّه !!
لو ان شرع الموت في ابوي من دون !! = باقي البشر لاشب واطغـى بحـرّه
واشق وابعج لـو يقولـون : مجنـووون !! = حتّاي اذوق الموت واشـوف شـرّه
لكنّ ربي جاعـل المـوت مسنـون = نامـن بحكمـه والنواصـي تحرّى
آمنت بالله ، حق ، والمـوت بيكـون = مهما يعيش العبـد غصـبٍ يمـرّه
وسط الحشا زفرات ، ونات ، وشجـون = وريح الحزن والهـم بـي مستمـرّه
ربه ختم له خيـر والنـاس يثنـون = ومن صرّ له صرّه .. يجازى بصـرّّه !!
يارب قبره مجمع انهـار وعيـون = واسألـك ياربـي نعيـمٍ يـسـرّه
الفلك ساير بالبشـر ليـن يفنـون = مثل .. الرحى تطحـن دقيقـه وبـره !!
:::::::
(( ساعة الإستجابه ))
يا حشود الحزن هبّي .. وانصري جيش الكآبه = يكبر الإيمان فيني .. كل ما قالوا : كئيب !!
أكتبيني .. كان عندك من تفاصيل الكتابه = شي ٍ ابعد من حدود الحزن لو جاء له .. نحيب
و انثريني .. في سبات وحلم ولا وسط غابه = خلّي أُسد الغابة امن الحوم جسمي .. تستطيب
عقب أبوي .. اللي بقى لي بس خلان وقرابه = لو ذكرته ضاع قلبي .. كن ما عندي قريب !!
وش سوآة الذيب لامن كسّر المكتوب نابه ؟ = ما تهابه غير شاة .. و ما يموتها القنيب !!
آآه يا لبيه ، دنيا ً ، لحفيني في ثيابه = خلّي كل عروق جسمي للعزاوي .. تستجيب
كل عرق ٍ من عروقي .. ينفتح مزلاج بابه = ثم .. ياتي جيش كاسر ما يهاب ، الا يهيب !!
كنت أشوف اني صغير ٍ فاتح ٍ صفحة كتابه = آتهجّى الحرف كني .. نملة ٍ وإلها دبيب
والا أنا .. فجأة كبرت !! وكل ما قد كنت أهابه = صار هيّن .. و (( الظروف )) تعلّم الطفل النجيب
علمتني .. كيف كنّا نحتري وبّل السحابه = و علمتني .. كيف نصبر لا جفى الوبل الشعيب
و علمتني .. كيف أحقر اللي يعزفون الربابه = و علمتني .. كيف أعز ّ ، و كيف أنا افزع للصحيب
و علمتني .. كيف أمدّ العمر في زهرة شبابه = لأجل من دنياه راحت واقبلت له بالمشيب
وعلمتني .. كيف أنا أستر ( بنت جاري ) في غيابه = و كيف أقول الصدق لو عِلقت في راس الصليب
و حذرتني .. من زمان ٍ ما يساوي له ذبابه !! = لو يساوي ..؟ ما سقى الله كافر ٍ مآي القليب !!
يا ظروف ٍٍ علمتني .. كيف ما فيها غرابه ؟ = لو يموت أبوي .. لكن ، إيه ( طوبى للغريب )
شفت أنا يا أبوي .. مثلك ، منهجي نهج الصحابه = محسن ٍ ظني بربي ، قلت : ظني ما يخيب
يا حبيبي .. هي متاها بس ساعة الإستجابه ؟ = بس بأطلب يا عسى الله يرزقك .. شوف الحبيب
:::::::
(( بغداد يا يمه ))
مضى شعر الهوى يمه .. وجات الحرب تغتاله = تقطّع في شراييني .. ولا تفنى شراييني !!؟
صحيح اللي جرى يمه ؟ على الاسلام و ارجاله !! = أو أنه حلم .. مزعجني ، مروّعني ، ومشقيني
سماء بغداد يا يمه .. تساوت مع ثرى جاله = وأشوف الموت ، ما كنه سوى .. لعبة بزاريني !!
هنا .. طفل ٍ بلا كف !! وهنا .. رجال و أعياله = خذته العبره ، وجيت ولقيته ، جاء يوصّيني !
ويوم أنهى وصيّاته وكفكف همي وشاله = لقيته ماااات يا يمه !! على حضني و بيديني
صحيح ( أعياله .. أعيالي ) و أنا لي نفس كفّاله = بوعد الصدق .. بشرني نبي الله ( بهاتيني )
ولكن .. الطموح أكبر من اللي بس نحتاله = أنا .. منهو بيكفلني ليا ضاعت براهيني !؟
ومنهو اللي يقديني عسير الدرب و أهواله = ويبني لي تراب ارضي .. و يحفظ ريحة الطيني !؟
على ذيك السوالف لا غفيت و قبل أنا داله = و جاء بالحلم براهني خذا بيدي يدلّيني
تذكرت الزمان .. اللي مسكه ابوي بحباله = زمن فيه النفوس .. أغلى من الدولار و الجيني
وله مثل الخيال أسمع قصص و أعلوم تروى له = حديث ( أبو اليتامى ) لي ، أبوي اللي مربيني
عن الصديق ، والفاروق ، حزب الحق و أبطاله = وعن خالد ، وعن طارق ، وعن غر ٌّ مياميني
سقى الله أيام .. رجليه ، و ركابه ، و خيّاله = و سيف ، و رمح ، و رجال ٍ على الأمجاد ضاريني
قبل تاتي .. صواريخ ٍ ، و دبّابه ، و محّاله = عسفنا المجد يوم إنّا على العدوان صلفيني
يقولون : الصبي حكيه ، على ما علّمه خاله ..!؟ = وأنا حكيي ظما .. والظيم ظمنته دواويني !!
صدقتي أيه يا يمه .. صحيح النعمه زوّاله = عسى الله ينصر أخواني .. و ياخذني على ديني
:::::::
(( السؤال ))
للحدايق يالنسيم ، وللشتاء برد و رعود = والخريف اللي تساقط مع مراجيح الطفولة
السماء ماهي بخيلة .. والبحر ماهو حقود = والسؤال اللي سألته كم تساهلتو حلوله
والله إني جيت أحله لين مليت القعود = وانتهى وقت امتحاني والثواني بي عجوله
والمراقب مارحمني يوم أنا سارح شرود = بس أفكر كيف اجاوب ؟ لو إجاباتٍ خجولة
وعقب .. قال استاذ : يالله سكّر أقواس البنود = التفت حزني يدور مالقى الطلاب حوله
كن ظهري شال نجد .. وشال من رمل النفود = كيف أنا عاجز وغيري جاوبو بأقصى سهوله !؟
والله إني كنت أذاكر حاشداً حولي حشود = سيرة أبطالٍ تباهى فيهم حروف البطولة
واذكر اني كنت اسولف .. للكراسي والورود = والقمر خلف الجبال .. وينشدونه عن ذهوله !
هو قرا التاريخ قبلي خابراً مجد الجدود ؟ = الله اللي شق طوله .. قطعتينٍ شق طوله
عندها أرخيت سمعي .. بأسمع أقوال الشهود = عن تفاصيل الصحابة .. عن مفاهيم الرجوله
عن مداهيل الكرامة ، عن سيوف ، وعن صمود = وعن سوالف لا تعلّت .. مجدها ما أحد ٍ يطوله
وشمسنا اللي ماتغيب وتعشق أسرار السهود = شمس فيها نور عذب وكلنا نرجي هلوله
وعن عقيدة ألف عام وأربعين من العقود = عن فخر يرفع جباه .. وكم حضارات انحنو له !؟
إيه .. يا ( كسرى ) و ( قيصر ) .. إيه يا أحفاد القرود = تذكرون أيام خيبر ؟ تذكرون اللي بقوله !؟
تذكرون الحرّ ( اسامه ) الاسد وابن الاسود = ما بلغ عشرين عام .. وعاهد الله مع رسوله
وسيفنا المسلول ( خالد ) .. إيه يامال الخلود = إيه ( خالد ) بس ( خالد ) ماحدن يفعل فعوله
و ( طارق ) اللي كم تناسى مفردات أقصى الحدود = والمراكب شبّ فيها ..بعد مانزّل خيوله
أو ( صلاح الدين ) فارس مكرم ابطون اللحود = مرتوي لأجل .. الله أكبر .. صولة في جوف صوله
أو ( قتيبه ) يوم عدى جنده حدود الهنود = دان سور الصين تحته شاف له شيٍ يهوله
والفتاه اللي تعزوى ( معتصمها ) بالجنود = ماعليها إن كان راعت .. لأجلها بتقوم دوله !!
واذكرو ذات الصواري مجد ياليته يعود = يوم دكينا الجزاير .. والبحر أرخى سدوله
آآآآه ياذيك المآثر ، والحميّا ، والعهود = من صباها ماخذينا .. والتفتنا للكهوله
والسؤال .. اللي سألته ، لامتى جور اليهود ؟ = وأثرني ماني لحالي كنت عاجز عن حلوله !!
:::::::
(( بنوك الحظ ))
في بنوك الحظ ماعندي رصيد = مفلس وحتى الحديدة بعتها
وفي عيون الناس لي باس ٍ شديد = لو جيوش الجن جتني رعتها
دارع ٍ في ثوب رجال ٍ عنيد = معتلي والنفس ماخوعتها
شايف ٍ عمري مع طويق العتيد = وصورتي من كثر ما لمعتها ..؟
صرت أصدق بان راسي من حديد !! = وصرت أقول : ان دنيتي طوعتها
وصرت أشوف الناس من حولي تزيد = تستمع لي كل ماجمعتها
صرت أنا اللي شاغل قلوب العبيد = ومالي الدنيا وأنا قنّعتها
بهمهماتي .. قبل مابدا بالقصيد = وصفقت لي قبل ماسمّعتها !!
ويوم شبيت القصايد والنشيد = كل نفس ٍ جايعة شبّعتها
وصار في إيدي حربة ٍ لابن الوليد = كم فتاة ٍ في هواي افجعتها
مادريت الحب صرام الوريد = لين شفت اللي شبعت ... وجعتها !
الهنوف اللي خذت فكري بعيد = وردّتني للهلاك ... وطعتها !!
القوام الأكعبي ، الحس الفريد = العيون السود لا طالعتها ..؟
تنكسر عيني .. وأنا طبعي جليد !! = وتصبح الدنيا خطاوي ضعتها
يوم قالت لي : ( أحبك ) ماتفيد = كذبةٍ باول زماني شعتها
كنت أشوف الحب مع ( عذر البليد ) = لعبة ٍ بإيدي وأنا شرّعتها
بس جاني الجد والعلم الأكيد = علة العشّاق .. وتجرّعتها
قالت : ان الحب قيد . وقلت : قيد ! = وراودتني بقيدها .. وطاوعتها !
ورحت أسابقها ولي بلعون جيد = قاضب ٍ يدها عقب رثعّتها
وهي تضحك لي .. وتحلف بالمجيد = اني لأخليها تراي .. آجعتها
ويوم أهلها عزّموا نية شديد = كن فيني جمرة ٍ ولّعتها
وأقفت تسير الركايب ماتحيد = وفي ذهول أقفيت .. ماودعتها
يانديمي كل غصن .. وكل حيد = يشهد ان لي قصة ٍ ماذعتها
على نقا حبي .. على ذاك الصعيد = ليتني ميت .. ولا ضيعتها
دنيتي ( ساحة مزاد ) .. ومن يزيد ؟ = اللي معي قيمة حديدة بعتها !!
:::::::
(( المهره ))
يمّه .. على هونتس فـلانيب مرضان = كفي دموعٍ فوق خدتس همايل
لبّى مواطي رجلتس اللي بالإيمان = سارت على طهر وبياض العمايل
لا تتعبين القلب يمّه والأعيان = من شاف ذاك الزين شاف الهوايل
في زينها شيءٍ كما بنت سلطان = تجمع تروف الغيد تحت الجدايل
والعقد فوق الجيد للعنق سجّان = العنق .. ايه العنق .. وافي خصايل
هي كلها في بعضها صار هيمان = ( ديرة ترف ) تمشي .. وأنا مير اخايل !!
الجادل اللي لا ارتمى فوق الأمتان = يا تلّ قلبي من دلاله تلايل
تلة أسيرٍ حطه الله بقشران = عزيز قومٍ .. لكن العزّّ زايل
ماله سوا يصبر على جور خبلان = ويكتب وصاته في وضوح النصايل
يمّه هويت اللي لها عود ريان = يرسل هدبها في صميمي نبايل
غزة نهدها كنها بيض حوران = في عالي المرقاب .. صعب المنايل
إلى حكت في ثغرها طعم رمان = مثل النحل جوها شيوخ القبايل
شيخٍ .. يسوق من الذهب غالي أثمان = وشيخٍ .. توقّف حيلته والجمايل
لين افزعوا له ربعه اللي لهم شان = شجعان راحوا يفعلون الفعايل
ربعٍ على الطاله قرومٍ وفرسان = يردون حوض الموت فوق الهزايل
لا جردوا بأيمانهم شهب الأيمان = حدب السيوف مفرقات الخلايل !!
جت مع صهيل الخيل عزوة .. قهيدان = اللي على الطولات .. بـالعووون طايل
ماهوب ذاك اللي عن الخير نومان = زودٍ على الصفره .. ينام القوايل
مير الربوع اللي نخاهم كحيلان = شيخٍ ورى الهيات .. صايل وجايل
ردّو بذود القوم ، والخيل ، والضان = وشلفا الشجاع اللي تنول النوايل
وحطوا على .. الياقوت ، لولو ، ومرجان = وريش النعام .. وناعمات الخمايل
ومن الجواهر .. ساقوا أشكال والوان = وشيءٍ عجيبٍ مالقوا له مثايل
ومن ورث كسرى معه قيصر وهامان = وقوافلٍ من خير ربي تمايل !؟
كله لعين اللي له القلب شفقان = أم العيون السود بنت الحمايل
يمّه .. بدعت القاف مانيب طربان ! = ولابي جنون ومسّ والا هبايل !
يمّه .. بدعته ليه ؟ ودي وطمعان = أكسب غلاها يوم جتني دلايل
دلايلٍ من طرف مكحول الأعيان = يوم ان صد الرمش والكحل سايل
من البكا ثوّر بها الشوق بركان = وهلت لي العبرات بنت الأصايل
لبيت جيت وقلت : وش صار ؟ وش كان ؟ = قالت : علامك ماترد الرسايل !؟
قلت : أبشري .. بـالقاف سيلت وديان = بأقصى جنوب القاع وأقصى الشمايل
يمّه .. وردت المجد ما أحتجت لإنسان = وأرويت عرقي منه لين الثمايل
والمهره .. اللي حيرت روس شجعان = عسفتها وأعدمت كل الوسايل
(( عافت عطايا شيوخ من روس قحطان = ولدت للشاعر زايدي النسايل ))
يمه على هونتس فـلانيب مرضان = أنا على خبرتس ( عريب السلايل ) !!
:::::::
(( قاتل مأجور ))
يجيبك وقتك لعندي يجيبك والزمان يدور = أنا ماقلت لك : لاجيت أبي أسقيك من كاسي!
سقيتك حبي الأول عطيتك عقدي المنثور = هويتك لين ضيعت الدروب وبْرت في ناسي
عطيتك كل ماعندي غرامي .. سري المستور = كشفت أغلى ملفاتي عشانك كنت نوماسي
ورحت أتبع رضا عينك واسايرها بدون شعور = الين اهتزت اركاني وجيت أجر هوجاسي
بغيتك تلتفت صوبي طلبت لفزعتك جمهور = ولافكرت في ضعفي عقب طفيت نبراسي
زهمتك يوم خانتني عزومي والجروح تثور = ياليتك مير ... لديت النظر وأوحيت لاجراسي
ورحت .. وراحت أيام الغرام الظالم المغرور = وزين الحظ حالفني وقمت أجمع أنفاسي
أجمعها وأنا مدري اذا لي فالنجاة حضور = أو ان الموت واقف لي على بابي .. يبي راسي
عقب ذا قمت مافيني من اكسور الزمان اكسور = نسيت اللي مضى كله عقب مااشتد لي باسي
ياشيخ شجابك لثاري ؟ ، وأنا بي (قاتل ٍ مأجور) = ياويلك من سيوف الزير قبل ارماح جساسي
أقول شجابك لدرب الهلاك وغبة المحظور ؟ = بعد ما ربك أنجاك شتبي رديت لعماسي ؟
تبي يرجع غرام أول !؟ تبي نجمع لك البلور !؟ = تبي نشتاق للموعد !؟ تبي حرفي وقرطاسي !؟
تبي نضحك على الدنيا ، وأغني لك ( يابنت النور ) !؟ = تبي نرسم ملامحنا على صفحات كراسي !؟
تبي أنسى الطعون اللي متعبة الضماد شهور !؟ = تبي أنسى لك الدنيا ومافيها هلي وساسي !؟
تبي .. وش ما تبي آمر !؟ ولو ماقلت لي : مآجووور = أنا مشتاق للجرح القديم الدامي القاسي !؟
تعال .. اللي تبي كله يصير ومانجيب قصور = تعال أقلط على جوفي تعال انهل من احساسي
حرااام اني لاوفيلك وأقدملك من المذخور = غلاك الصدر ساطي به .. وأنا ماني ترا ناسي
حلفت الوقت بيجيبك وجابك والزمان يدور = ذبحني المرّ من كاسك .. وجا دورك مع كاسي !!
:::::::
(( نوف الغرام ))
توقعت الرسايل منك أكثر من نجوم الليل = ولكن .. للأسف مخطي وخانتني براهيني
توقعتك فقدتيني .. مثل ماني فقدتك حيل = وأنا ما أشكّ في حبك وأدري انك تحبيني
ولو ماجات من فمّك حروف الشوق والتدليل = كفاية أوهم أفكاري وأقول انك : دعيتيني
كفاية كل ما أصحى .. وأناظر في عيون الخيل = أشوف عيونك النجلا .. وأظن انك تناديني
واجي كلي كذا .. وأجدل شعر ماكنه الا السيل = نزل واخضرّت أعماقي وأغنيلك ( وحشتيني )
شعورك كيف يا ( نوف الغرام ) .. ونبرة التهليل = تحت شفة جمودك لا .. ولاحتى طريتيني
تذكرتك دعيتي لي .. ولافي دعوتك تمثيل = عسى ربك يخلي لك حبيبك .. لو تركتيني
وأنا ببقى على خبرك .. شربت أغلب مياه النيل = وعلى قول المثل ( برجع ولو طالت بي سنيني )
واذا جيتك صارحتك بحجم الحب والتبجيل = تجيني ميته فيني .. أو انك ماعرفتيني
يابنت الناس . أنا واحد من أفراد الزمن والجيل = ولايفرق .. لو أفارق وأموت .. و عزتي فيني
وأنا راضي كذا لكن سؤالي .. وش يجيب سهيل ؟ = بعد ماجفت أطرافي ونامت بي براكيني !؟
ولكن بسأل عيونك ولاتتعب ورا التفصيل = صحيح اني أحد أفراد جيلك لو فقدتيني!؟
أو اني بس رجال ٍ شهوره كلها ( ابريل ) !! = حلت لي ( كذبتي ) مره .. وجابتني على عيني !
ولقيتك في دروبي نور يحب الخير والتجميل = وعندك نامت أقداري وسالت بك شراييني
يا ( نوف ) النفس ماتهوى دروب المهزلة والميل = وأنا شفتك ( ذهب خالص ) وانتي ، كيف شفتيني !؟
توقعت الرسايل منك اكثر من نجوم الليل = ولكن للأسف مخطي وخانتني براهيني
:::::::
(( نم ياخفوقي ))
نم ياخفوقي لين تتعب من النوم = راحت عيون ٍ مسهرتك الليالي
راحت وغابت و اتركت فيني هموم = من عقبها والجوف يصلاه صالي
نم ياخفوقي نم ماصوبك حلوم = الحلم والله طيفها في خيالي
لاجت على الموعد وهي بنت زيزوم = ماتخلف الميعاد في كل حالي
بنت الشجاع اللي مع الناس صاروم = تهديني العذب المصفى زلالي
كريم راس اللي بها القلب مغروم = والوقت شح وماعطانا وصالي
وأنا على ماقيل والموت محتوم = ميت وبين الناس كني لحالي
لليل في عيني تفاصيل وعلوم = وللصبح صوت ليا سمعت يهنالي
صوت الهنوف المستحي همسها : قووووم = أضيع أنا في همسها لاطرالي
وأروح أرتب بالطواريق وأروم = غاية مرامي يوم اعد الجزالي
هب الشمال وصحت ياقوم .. ياقوم = ليت الهبوب يجيب شوقي قبالي
:::::::
* مقتطفات :
تعدى الظلم والتنكيل قلوب الناس والزلات = تعدى آخر حدود اللباقه آخر أقصاها
عرفنا في مصر ذا ( النيل ) ولادري .. ليه مصر بالذات ؟ = مع إن أغلب مياه النيل بالسودان مجراها !!
..
.
أنا آسف .. إذا قلبي عصاني وماقدرت أنساك = وبعد آسف .. إذا ودك تفارقني ولاطعتك
..
.
( 1 ) كل ماتمر به .. ويصير خلفك ..
لاتنظر إليه .. حتى وإن كان جميلاً ؟
فالأشياء .. أجمل أمامك !!
.
.
( 2 ) الجروح مؤلمة .. والألم لايقتل دائماً .. والعقلاء هم من يدركون أن .. الحياة لابد أن تستمر في المضي حتى النهاية .
.
.
( 3 ) قد يأتي الحظ أحياناً .. وقد لايأتي !!
لاتنتظره .. ولاتعتمد عليه ..
فهو " صديقٌ غير صدوق "
.
.
( 4 ) قال حكيمٌ قديم : لاتبني بيتاً في الوادي .
وقلت : لاتكتب بيتاً في الوالي ..!
فالوادي لايحقن "الماء" ..
والوالي لايحقن "الدماء" !!
...
..
.
في الختام سامحوني على الإطالة والقصور
واعدكم في مواضيع قادمه ان اطرح المزيد من القصائد لشعراء ( الدواسر ) الشباب من دون استثناء - اذا توفر ذلك -
مع تمنياتي للجميع بالتوفيق
اخوكم /
ولد زايد وسيع البنايد
21-08-2008, 04:56 PM
روائع الشاعر ( محمد المهنا )
رد: روائع الشاعر ( محمد المهنا )
العرض العادي
المواضيع المتشابهه
