مشير بن سيف

[معلومات العضو شافي القويسي المخاريم]

بسم الله الرحمن الرحيم






ديوان الشاعر مشير بن سيف الخييلات

 

 

 

 

[معلومات العضو شافي القويسي المخاريم]

امر" كتبه الله علي وارتضيــــته = واللي يجي من والي العرش مقبول
الله كتب لي حادث ما احتريته = جاني وانا في غفلة"عنه مشــــغول
بغيت اروح وراح شخص" بكيته = نور العيـــون وعوًد القلــب مذهــــول
الجادل اللي حبها ما محيته = يبقى على مر اللــيالي على طـــول
عذلت قلبي مير انا ما قويته= ياحًول من فرقاء هوى البال ياحًـــول
جمر الغضى كــني برجلي وطيته = وغديت كــني فاقد العقل بهلـــول
من عقبها نوم العرب ما اهتنـيته = وقلبي يجول وكن به دقة طبول
اللي لها بالقلــب قصر" بنيـــته = ماينمحي مبناه حـــول" بأثر حـــول
بنت الذي عند العرب شاع صيته = ريف الخوي والجار والبيت مدهـــول
دون المسيًر ما بعد صك بيتــه = يافي ليا مـــنه هباء كل مفــــلول
وارجع على قاف" جديد" بنيته = واقول وين اللي لها الفكــــر مشلول
مصيونة" عن كل درب" شنيته = ولا هرجت في غيبتي كل دعبــول
الطيب والعفه حشا مانسيته = جوابـــها لبيـــه والهرج معـــسول
يالله ياللي كل سأل عطيــته = ياغافر لام الكباير من الهــــول
تمحى خطاياها وفضلك رجيته = آميـــــن قولوها ليا منتهى القول
وتجبر عزاي وجرحي اللي شكيته = يا مبدل" عسرات الايام بسهول
واللي كتب باللوح جاني وجيته = مالي عن المقسوم مزلاج وقفول
وذي عادة الدنيا حبال بتيتــه = بقعا مصايبهــا جديــدات وسمـــول
وصلاة ربي عد من حج بيتــه= على الرسول اللي من الرب مرسول

 

 

 

 

[معلومات العضو شافي القويسي المخاريم]

تقولون لي لا باس ياكاسبين الطيب =وانا اقول هاذي مني الرجل مكسوره
ثلاثة شهور ومثلهن بين شك وريب =مقامي على المعكاز والحال مخطوره
يارجلي اللي ما مشت في دروب العيب =وعلى حرمة الجيران ماهيب ماموره
وعلى بنت عمي ماخطت والله الرقيب =كلام على البرهان ماينطفي نوره
اقوله وانا راضي بما صابني ويصيب =ترى ما كتب للعبد في اللـــوح بيـــزوره
الا يا ولي العرش يامطلع بالغيب =رجاي انت يا منزل على عبدك السوره
تفرج هموم اللي من الوقت راسه شيب =غدر به زمان يشكي الذيب من دوره
زمان غدى فيه الحصيني سوات الذيب =وفيه الشجاع يهام والنفس مقهوره
وفيه البخيل يفز له مع هلا ترحيب =على شان ماله صــارو الناس جمــهوره
وكريم السجايا فيه همل بدون صحيب =ليـا قـل مــاله خــف قدره ومــقدوره
وانا لي ربوع في القسا يكسبون الطيب =فعايل بني عمي مع الناس مخبوره
الاد الخييلي لابتي محتــمين النيــب =تواريخهم في صفحة المجد منشوره
ليا جا نهار فيه راس الرضيع يشيب =لهم وقفه عند الحــنازيب مشــهوره
كم شيخ قوم حولوبه عشاء للذيب =وعاف الطمع من يوم شالوه عن كوره
هذا فعل ربعي والكلام المصيب مصيب =شيوخ القبايل تثبث العلم بعصوره
سلامي عليهم عد مايخضر الشعيب =وعدد ما خلق ربي على البر وبحوره
تحية وفاء من شاعر" قالها ترتيب =محبـة ربوعه داخل القــلب مـــبذوره
وانا ما علي خلاف والعبد له نصيب= مقامي رفيع وعزة النفس مذخــوره

 

 

 

 

[معلومات العضو شافي القويسي المخاريم]

انا يا النشاما خاطري للمثل ينقاد=مع الشعر والشعّار ترجح موازيني
وانا ما أدعي بالزود يامارثة الاجواد=ولاني بمتحدي ولا حد متحديني
انا غايتي ومناي بدع البيوت جداد=احب المثايل والمثايل تسليني
اسلي بها قلب همومه علي تزداد=ليا قلت خفت جاتني بالملاييني
انا ياعرب من جاير الوقت حيلي باد=اهوم البعيد وجاير الوقت حاديني
انا اشوف لي وقت على الناس فيه عناد=يعاند هل الطالات في العسر والليني
زمان" غدا فيه الحصيني يسود اسياد=يهوش ويحوش وياخذ الصاع صاعيني
وفيه البخيل يصير كنه ولد شداد=على شان ماله صار خيال صوبيني
وكريم السجايا فيه ماعاد له مقعاد=ليا قلّ ماله جنبوه المواليني
وانا ما اشتكي من قل مير الزمن ما جاد=الوم الزمان اللي به الناس قسميني
غدوا كلهم عدوان والشر طال وزاد=وكثر الحسد واختل كيل الموازيني
مير عسى الله يعز الدار واللي لها رواد=مقاديم حكام البلاد المياميني
وبختم كلامي عد مالجلج الرّعاد=بسلام يخص اللي من الناس يوحيني

 

 

 

 

[معلومات العضو شافي القويسي المخاريم]

ياسلام الله بقاف نعدله ما يميل=من هجوس حاضره والعلوم بحلها
ودي العب واتمادا وزيد الكيل كيل=المثايل تنتحي لي وانا قدً لها
اتخير فالمعاني وادور للجزيل=مشتهيً قلبي وبالي بعد طرباً لها
نحمد الله يوم ربعي هل الباع الطويل=العلوم الطيبه لابتي ملفىً لها
الدوسر تاج راسي مزبنة الدخيل=من غزاهم عاف والنفس مات بذلها
يحتمون الجار والدار لا هاب الذليل=كم عقيدً حولوا به على سرجً لها
محتمين دارهم عاد بندقهم فتيل=من طمع في دارهم ما سكن في ظلها
يشهد التاريخ بافعالهم مع كل جيل=انشد الاشراف والسابقات افطن لها
يوم نادوا للحرايب وشمت خيل خيل=وردو ورد الضوامي على عدً لها
سعد منهم فزعةً له ليا بار العميل=تشهد الريشه على اللي قدم واحتلها
افتخر باللابه اللي لها وزنً ثقيل=لابةً يشهد على طيبها ماضً لها
افتخر في لابةً يدركون المستحيل=الشجاعه والكرم والوفاء طبعً لها
مدية للجار والفعل ذاك اكبر دليل=من جدار البيت محدً فعل فعلً لها
ما نطقت الزور والله على قولي وكيل=تشهد الافعال والناس تشهد كلها
تم قولي ياهل الطيب والفعل الجميل=واسمحوا لي في دقاق العلوم وجلها

 

 

 

 

[معلومات العضو شافي القويسي المخاريم]

امس الضحى عديت راس الطويله =من واهج بالقلب هيض غرامي
تكفون يالاجواد حالي عليله=والعين عيتَ لا تذوق المنامي
الله على اللي ما بعد دار ويله=توه على التمرين غاية مرامي
جمس" جديد وتو ما جا مديله=من الوكاله طالع باستلامي
ناصل عليه اللي وصوفه جميله=الصاحب اللي دونه البعد زامي
اقفى مع بدو" خطاهم طويله= عادتهم يرعون نبت الوسامي
اتلا العهد قفا وعيني تخيله= واليوم ما جا منه رد العلامي
الصاحب اللي ما قدرنا نجيله =عيوً عليه قريبًين العمامي
ماعد عندي بأريش العين حيله= ولالي جدى الا عضتي بالبهامي
القلب كنه فوق حامي المليله= والحال من عقبه طواه الهيامي
اقنب قنيب الذيب واهذل هذيله=لاشاف نور الصبح عقب الظلامي
عليك ياراع العيون الكحيله= اللي هدبهن مثل ريش النعامي
والخد براق بخطوى مخيله=والردف يذبح لا قفاه الولامي
والعنق عنق اللي تزايد جفيله=حل العصير وذيّره حس رامي
هذا وصوف الزين ضاف الجديله= هاف الحشى زاهي جديد الوشام

 

 

 

 

[معلومات العضو شافي القويسي المخاريم]

مل قلب صاير للببيِض شاره=كل ماقمت انصحه ركب اردعيه
ول ياقلب سعى الله في دماره=علته باقصى الضماير داخليه
ليتني ما رحت لطايف زياره= ولا مشيت العصر مع خط الحويه
شفت مثل الريم فزه واستداره=والجديل طية" من فوق طيه
والنحر يسطع بياضه في حماره=والنهود تقول بيض الراعبيه
عينها عين اشقر في راس قاره=يطرح الستين في وقم ضحويه
والردايف مثل ممطور الزباره=والحشا ملهوف ما يوجد حليًه
مايلام مشير لو قطع زراره=يوم وردني على حوض المنيه
يوم اقوله صدق ماعندي عياره=الصحيح يقال يارجال الحميه
ودي اصبر مير في كبدي حراره=افزعولي ياهل الاريا القويه
الهوى محد" سلم من حر ناره=من على وقت العصور الجاهليه
الهوى ياناس به ربح وخساره=فيه شر وفيه شربات" هنيه
الهوى سنه وانا ما جهل وقاره=بالنقا ماهوب بعلوم" رديه
الردى والبوق مالي به تجاره=يشهد الله والعرب تشهد عليه
اترك اللي يلتفت في بنت جاره=ذاك لايحشم ولا له معنويه

 

 

 

 

[معلومات العضو شافي القويسي المخاريم]

مبداي في ذكر الولي عالم السر= محصي عدد خلقه ببر وبحرها
إللهنا اللي يعلم الخير والشر = وبقدرته يجبر عظاما" كسرها
ما خاب من بسماه هلل وكبر = وصلى الفروض ونعمت الله شكرها
و أدى الزكاه وصام لله وافطر = والرجل عن شهوات نفسه قصرها
ولبس الاحرام وحج مادام يقدر = والطاف بالكعبه وقبل حجرها
بين الصفا والمرو يسعى ويذكر = يستغفر اللي للذنوب يغفرها
اللي على صم الصفا يسمع الذر = سبحان عازل ليلها من سفرها
من بعد ذكر الله نويت اتخير = واخترت من زين المثايل دررها
هاجوس قلبي باحسن القول عبر = وقطفت مما لاق لي من ثمرها
جبت القلم والبوك والفكر حضر = وقلبي غريبات المثايل سخرها
باب المعاني عقب ماهو مسكر = بطلت قفله يوم بان امعبرها
اسباب ما هيض غرامي وحير = وقتٍ به العالم تزايد قشرها
كثر الحسد والناس قامت تغير = وين السلوم اللي قديم" خبرها
السلم الاول تقل ما جا ولا مر= اقفا مع دنيا" سريعا" دوردها
دنيا العنا تضحك لاهلها وتمكر = ما ينعرف لي بطنها من ظهرها
اقفت على لباسة الجوخ الاحمر = زحول الرجال اللي بعيد" نظرها
اللي لهم بالطيب ما رد ومصدر = كرام السبال اللي تنثر حمرها
وبيوتهم تلقى بها البن الاشقر = ولا تسمع البيلوت في محتضرها
وسلام ربي عد ما هل وامطر = على رسول" سنة الله عمرها