الشاعر مشير بن سيف الخييلي الدوسري

[معلومات العضو صالح الجعيدي]

قصائد للشاعر مشير بن سيف الخييلي الدوسري ،،،

[line]

( 1 )
مناسبة القصيدة : عندما حصل للشاعر حادث مروري وأخذ له فتره في المستشفى.

تقولون لا باس يـا كاسبيـن الطيـب =وانا اقول هذي مني الرجل مكسـوره
ثلاثة شهور ومثلهن بين شك وريـب =مقامي على المعكاز والحال معسـوره
يا رجل ياللي ما مشت بدروب العيـب =وعلى حرمة الجيران ماهـي مأمـوره
وعلى بنت عمي ما خطت والله الرقيب =كلام ٍ على البرهان ما ينطفـي نـوره
اقوله وانا راضيٍ بما صابني ويصيب =ترى ما كتب للعبد في اللوح بيـزوره
آلا يا ولي العرش يا مطلـع بالغيـب =رجاي انت يا منزل على عبدك السوره
تفرج هموم اللي من الوقت راسه شيب =غدربه زمان ٍ يشكي الذيب من جـوره
زمانٍ غدا فيه الحصيني سوات الذيـب =وفيه الشجاع يهون وفيه النفس مقهوره
وفيه البيخل يفزبه مع اهـل الترحيـب =على شان ماله صاروا الناس جمهوره
وكريم السجايا فيه همل ٍ بدون صحيب =اليا قل مالـه خـف قـدره ومقـدوره
وانا لي ربوع ٍ في القسا يكسبون الطيب =فعايل بني عمي مع النـاس مخبـوره
الاد الخييلي لابتـي محتميـن النيـب =تواريخهم في صحفة المجـد منشـوره
اليا جاء نهارٍ فيه راس الرضيع يشيب =لهم وقفة ٍ عنـد الحنازيـب مخبـوره
كم شيخ قـومٍ حولوبـه عشـا للذيـب =وعاف الطمع من يوم شالوه عن كوره
هذا فعل ربعي والكلام المصيب مصيب =شيوخ القبايل تثبـت العلـم بعصـوره
وذباحة ٍ للحيـل للضيـف والطنيـب =كبار الصحون اللي على الدوم مجروره
وأهل دلةٍ صفراء على النار لشريـب =اهل هيل والبن الخضر مالهـا جـوره
سلام ٍ عليهم عد ما يخضـر الشعيـب =وعدد ما خلق ربي على البر وبحـوره
تحية وفاء من شاعـرٍٍ قالهـا ترتيـب =محبة ربوعه داخـل القلـب مبـذوره
وانا ما علي خلاف والعبد له نصيـب =مقامي رفيع وعزة النفـس مذخـوره

( 2 )
هذه قصيدة في محسن بن فهد الهذيلي الخييلي ، وهي ثناء عليه عندما قام بالواجب عندما طلب منه.

نافدى اللـي يـوم جيتـه مـا تـردى =يوم بعض النـاس قـدم لـي اعـذاره
قال انـا حاضـر ولازمـك المبـدى =با كفلك لـو كـان يلحقني خسـاره
جالنا محسـن علـى الضـن وتعـدى =اشهـد ان الطيـب ملبوسـه اشعـاره
قــام للعلـيـا وللكـايـد تـحـدى =قام يقدح من سطـر راسـه شـراره
ما تقاعس قـال انـا لـك مستعـدى =يوم جاءه العلـم مـا طـال انتظـاره
الوفـاء والطيـب عنـده مـا تعـدى =يستحـق المـدح يـوم المـدح كـاره
المراجـل دربهـا عسـر ٍ وسـنـدى =مير راعي الطيب ينجح فـي اختبـاره
جعـل ابـوه بجنـة الخلـد يتـهـدى=يا عسـى الغفـران والجنـة مـزاره
آرث اللـي بالشدايـد مـا يـصـدى =من اجمـال الحمـل وافيـة ٍ اشبـاره
يالهنـوف اللـي جدايلـهـا تـكـدى =اطمحـي لبـو فهـد نمـر النـمـاره
ما يحـوش المرجلـه كـود المقـدى =نـادرٍ بتـاع فـي قلـبـه جـسـاره
حـراً ومجـرب اليـا شيـل هــدى =يدمي المخـلاب وقعـه مـع طيـاره
معدنـه طيـب وفـي الازم يـسـدى =ما يحب الهـون فـي راسـه نعـاره
ودي اكثـر فـي المدايـح وتـمـدى =مرهيٍ بالقـول فـي فـن وشطـاره
ان سردت القـاف مـا للقـاف حـدى =وإن قصرت القاف يكفيـك اعتبـاره
بختصر ما قلـت فـي مسـك ونـدى =والسلام اعـداد مـا يشـرق نهـاره

( 3 )
قصيدة ثناء في شبيب بن حليس بن طواري الخييلي

الطيـب سنـدا والمـراجـل تعيـبـه =إلا على مثـل ابـو بنـدر كحيـلان
شبيـب نطـاح الامـور الصعيـبـه =يفرح به إللي من عنى الوقت بحـلان
خلـى بعيـد القـاع عنـدي قريـبـه =يقول انا في لازمك ويـن مـا كـان
من طيب راسـه جـاء بنفـس لبيبـه =ما قال يلقـى غيـري فـلان وفـلان
أنشهـد ان المرجلـه مـن نصيـبـه =غصب ٍ على من كان راضي وزعلان
وابـوه قـدامـه افعـولـه عجيـبـه =إليا عدوا اهل الطيـب يطلـع بليهـان
من شبتـه مـا جـا بـدرب المعيبـه =حاش المراجل كلهـا طيـر حـوران
حليـس اماريبـه وافاخـر بطيـبـه =وانا احمد الله عقـب حليـس شجعـان
وارجع لبـو بنـدر وفيـه اعتزيبـه =قرم القروم اللي لـه الطيـب عنـوان
مـن روس ربـع ٍ يكسبـون الغليبـه =معـرب ٍ مـا بيـن خـال ٍ وعمـان
شـوق الهنـوف اللـي تكـد الذويبـه =بنت الرجال اللي لهـم بالوفـاء شـان
ومني سلام ٍ عـد مـا ارقـب رقيبـه =وما غرد القمري على خضر الاغصان
وما لاح براق ٍ وما اخضـر شعيبـه =واعداد ما حجـوا وطافـوا بالاركـان
سـلامٍ احلـى مـن كـلام الحبيـبـه =اللي تـودك وانـت بالحيـل شفقـان
إن غبت قالت وش سبـب ذا المغيبـه =وإن جيت شفت الحب باطراف الاعيان
تـم الكـلام اللـي نقيـنـا عريـبـه =واعذر وسامح دام في القـول نقصـان

[line]

وتقبلوا خالص تحيات أخوكم/ آل جعيد الدوسري

 

 

 

 

[معلومات العضو يحيى الودعاني]

لاهنت أخوي آل جعيد الدوسري
وبيض الله وجهك
وصح لسان الشاعر مشير بن سيف الخييلي الدوسري

 

 

 

 

[معلومات العضو صالح الجعيدي]

ولا أنت ، يا أبيض الوجه ، يالسنافي.

أفتخر بمروك العطر أخوي "يحيى الودعاني"،، وتقبل تحياتي.

 

 

 

 

[معلومات العضو العماني]

بيض الله وجهك اخوي آل جعيد على قصايد الشاعر مشير بن سيف الخييلي الدوسري

وفي انتظار المزيد من مواضيعك المميزه

تقبل تحياتي،،

 

 

 

 

[معلومات العضو ابن وتيد السباعي]

سـلامٍ احلـى مـن كـلام الحبيبـه=اللي تودك وانـت بالحيـل شفقـان

وانا اقول سلامي عليك يالجعيدي وعلى مواضيعك المميزه الجديده والمهمه في نفس الوقت


صح لسان الشاعر الكبير/مشير بن سيف الخييلي الدوسري


على هذه القصائد الفريده من نوعها التي تنفرد بالجزاله المطلقه والمفردات القويه والمعبره


لاهنت يالقرم وانت والله مكسب لمنتدانا عساك على القوه


لك خالص الود وفائق الاحترام

اخوك/ابن وتيد

 

 

 

 

[معلومات العضو صالح الجعيدي]

أخواني : هايف العماني و ابن وتيد : أفتخر فيكم و بمروكم العطر ،، وتقبلوا تحياتي.