محمد عريب الجد

[معلومات العضو ابراهيم محمد الشمسان]

بسم الله الرحمن الرحيم

انه لمن دواعي سروري ان اشارك ابناء عمومتي (الدواسر)في هذا المنتدى الطيب

حيث اود المشاركه بهذه القصيدة وهي عباره عن نصيحه موجهة لابني على وجه

الخصوص والى جميع ابناء قبيلتي الذين هم في مقتبل العمر على وجه العموم

آمل ان تحوز على رضاكم ولكم تحياتي...... اخوكم ابن عبدون

(محمد عريب الجد)

يالله يا المعـبــود منشي سحـابه ............ يــا واحداً ما يختفــي عنه ما قيــل

مــاقــدر الـوالـي كــلاً رضـا بــه ............ أمـراً كتــب للعبــد ما عنه تحــويل

أهــلاًهـلا بــالـي لفــا ياهــلا بــه ............ عضــيد نــوره بالليــال المقــابيــل

سـميتــه مـحـمـد ولابـه غـرابـه ............ سمــي جــده من رجــال حلاحيــل

محمد عريــب الجـد ما ينغـدا بـه ............ بدران بن دوســر قـروم الرجاجيـل

دواسـر تجسـر سـوات الذيـابــه ........... منهــو يخاويهـم فلا يزمـل الشيــل

سلوم المراجل والوصل للقرابه ........... متوارثيــن الطيــب جيـل بعـد جيـل

للضيف كيف ورحب يامرحبابه ........... والخصـم نسقيه الشـري بالفناجيــل

الــدار للجيــران ماصــك بــابــه ............ الـدار دار اهــل الفعـــول المجاميــل

واليـوم انا يا بـوك منـي اجـابـه ............ دامـك علـى الدنيا جـديــد المنـازيــل

دامك صغـيرٍ ماتجيـد الخـطابـه ............ خل السمع يغلب على الحكي بالحيل

وذا عرفـت العلـم بين صـوابـه ............ فكـر وتـلقـا مـن كـلامـي محـاصيــل

درب المـعـزة مايجي بـالنـهابـه ............ والـعلـم طـلابـه تـرى تسـهـر الليــل

رافق صحيبــاً بالدجـا ينسرابـه ............. مثل القمر يابوي يضوي سنـا الليـل

يسعـدك من فكره بزين اللبـابـه ............. ويعـطــيك رايــاً ما يجــي فيه تبديــل

واحذر من اللي للسخا صك بابه .............. ولـد الـردي ما تنتخـي بـه على الشـيل

ان جيت له محتاج بان الردى به .............. كريــم حكــي وبـالفعـل طبعـه ابـخـيل

خلك على اهلك يافتى الجودغابه ............. بـالشمــس ظـل وبالماجـيــب حلـحيـل

واحفظ شرف بيتك لاينـحـكا بــه ............. تـرى الشـرف غالـي علـى كـل ماقيـل

راع الكرم والجــود طبعـه رحابــه ............. لاجـــو لـه الخـطـار فــي تالـي اللـيـــل

قولت هــلا للضيـف يامرحبــا بــه ............. ترفع مقامــك عنــد الاجــواد بـالحـيــل

وان جالك المحتاج والوقت جابــه ............. لاترجعــه خالــي وســاعــده بــالشيــل

ترى الزمــن غــدار محـداً درابــه ............ الـله يـجيــرك مــن كثيـر الـبــهــاذيــل

اوصيك انا يابوك بوصـل القـرابــه ............ كـلاً عطــه حقـه من الوصـل لاتمـيـل

وقدر كبيـر السـن واكـرم جنابــه ............ وبالـك تجالس صاحـب القـال والقــيـل

ترى جليـس السـوء يعـدم شبابـه ............ ويعـدم جليســه وان بـدا لـه محـاصـيـل

وترى عديم الــراي مـالـه مهابــه ............ عنـد الرجــال ولـو غـدا عـمـره طويــل

وترى فهـيم النـاس يسمـع جوابه ............ وان قــال كـلمــة حـق مـا فــيـه تبــديــل

وذا نويــت العـرس ولبسـة ثيابــه ............ فاخـتـر ثيـاب العـز واتـرك هـل المـيـل

لاتاخذ الا بنـت نســل الصحـابـــة ............ ترعــا حقـوق الـزوج مـا تزمـل الشيـل

بنت الردي يـابــوي بيـن صـوابــه ............ لاصار ابوهـا مــن هـل الـقـال والقـيــل

يوذي بناته بـالـحكـي والـطـلابــه ............ ومـنـهـو يبــي بنـتـه يــذوق الـبـهـاذيـــل

يـابــوي هذا أللـي بقـلبـي لجابه ............ وبيـنــت لك خافـي دروب الـرجـاجـيــل

وصـيـتــاً مـا هـديتــهــا للـقـرابــه ............. لاشـك انـا يابــوك مغـلـيــك بـالـحـيـــل

وان مـت انـا يابـوك مابـه غـرابــه .............. المـوت مـاخــلا قـروم الـرجـاجـيـــــــل

الموت ما خلا النبـي والـصـحابــه .............. المــوت حـق مـا يجـي فيـه تضـلـيـــــل

وصلواعلى المختارمَرعد سحـابه .............. اعـداد رمــلٍ جـارفـه كـايـد السـيـــــل

وعدة حجيج البيت ومنهو لجابــه .............. علــى نـبـيـــاً بيـــن الـعــدل والـمـيـــــل




مع تحيات اخوكم/ الشاعر ابن عبدون

 

 

 

 

[معلومات العضو العماني]

الشاعر ابن عبدون

في البداية انتهز هذه الفرصة لأرحب بك في محلك وبين لابتك وبني عمك في موقع الدواسر الرسمي ، وسعيدين بانضمامك لأسرة المنتدى فحللت اهلا ووطئت سهلا .

وصح الله لسانك مدد مهوب عدد على القصيدة الطيبه والذي تضمنت نصايح ثمينه تستحق ان تكتب بماء الذهب ، والتي تدل انها ظهرت من رجل صاحب تجربة عاش الحياه وعرفها جيدا ً ، فصح الله لسانك مره اخرى ، ونحن في شوق للمزيد من ابداعاتك الشعرية.

تقبل تحياتي،،

 

 

 

 

[معلومات العضو سلطان بن جزاء]

الاخ/ ابـــن عبـــدون صـــح لســـانك علــى هــذه القـصيـــدة ونحــن فــي إنتظـــار الجـــديد مــن قصــائــدك اخوكـ/سلطان بن جزاء

 

 

 

 

[معلومات العضو سالم بن صمهود]

ابن عبدون صح الله لسانك وبلغك الله في ابنك وكماقال ابومبارك مرحبابك في منتداك وبين ربعك

 

 

 

 

[معلومات العضو ابراهيم محمد الشمسان]

الأخوة الأعزاء(( هايف العماني ر ئيس مجلس الادارة ,والأخ سلطان بن جزاء,
والاخ المشرف سالم بن صمهود ))لكم مني خالص الشكر والتقدير على ردودكم
وهذا بحد ذاته وساماً اعتز به .

أخوكم:ابن عبدون

 

 

 

 

[معلومات العضو محمد الولامين]

الشاعر / ابن عبدون

حياك الله في محلك وبين ربعك

وصح لسانك مليون عساك ماتهون

وسلمت يمناك على ماقدمت من ابداع

في انتظار جديدك

 

 

 

 

[معلومات العضو ابراهيم محمد الشمسان]

اخي العزيز محمد الولامين لك مني خالص الشكر و التقدير والى جميع ابناء العمومة في دولة الكويت وابشر بالخير اخوك/ابن عبدون

 

 

 

 

[معلومات العضو ابن شمسان البدراني]

صح لساااانك يابو محمد ونوّر منتدى الدواسر بوجودك .. ولا هنت على المشاركة اللي ننتظرها من زمان .. ويا ليت تتحفنا بباقي قصيدك فأنت عنوان للجزالة الله يطول عمرك ..


ولك مني أرق التحايا ،،،

 

 

 

 

[معلومات العضو معكوس]

نصيحه طيبه وقصيده جزله صح السانك ولاهنت