قصيدتين قلتها تشجيع لأخوي الصغير

[معلومات العضو فارس الدبالين]

بسم الله الرحمن الرحيم
السلام عليكم ورحمة الله وبركاته

هذي قصيدتين قلتها لخوي الصغير وارجوا انها تعجبكم.

الاوله قلتها له وهو كان في الاختبارات النهائيه للمرحله الثانويه.

ياخوك انا بوصيك مني وصيّه=وصيتن وأبغيك تمشي بها دوم
ترا الرجل لازم عزومه قويّه=وإليا بغى العليا يعزّم لها عزوم
والرجل لازم له علومن شليّه=يفخر بها لاجا مجالن لها علوم
وصاحب صحيبن له صفاتن وفيّه=وارفع مقامك عن سلاتيح ورخوم
وخلك كريمن عادتك حاتميّه=وحافظ على فعلن لها نهج وسلوم
وخلك شجيعن مايهمه سريّه=تراك من رجلن انماري به القوم
واحفظ صلاتك قبل قرب المنيّه=واخفض جناحك لامك ولو محروم
هذي وصيّة طيب لزمن عليّه=وانا اشهد اني في وصاياك ملزوم

والثانيه قلتها تشجيع له يوم دخل المعهد الصحي عسى الله يوفقه واياكم وجميع المسلمين

امسك عنان المهرة اللي هدالك=ربٍ كريمٍ طول عمرك يمدك
عليك حسن اعسافها واتكالك=على إله الكون يمه مردك
انحر بها صكات بقعا لحالك=تنسى الشقا وتلقا الهنا كان ودك
واحذر من الكبوات وان سج بالك=اصدوف عمرك توصلك لين حدك
اسرج بها ياجعل عمرك وفالك=توفيق ياطيرن على اول مهدك
أمعربن من ساس عمك وخالك=واشبهت في فعل الوفا صلب جدك
على المراجل قوم طوح اعقالك=وشد العزوم وتارد الورد عدك
ترك صبيآ فالمواجيب هالك=لافاعلن طيبآ ولاهو يمدك
اكسب غنايم ماصفالك وجالك=تفرح ربوعك والغبن عض ندك
وافهم جواب الذيب يومه عوالك=يرجيك يوم ان العشى صار عندك

 

 

 

 

[معلومات العضو محمد بن سالم الخضراني]

فارس صح لسانك

والله يعين اخوك ويوفقه

تقديري وااحتراامي

 

 

 

 

[معلومات العضو الزين]

لاهنت وصح لسانك

 

 

 

 

[معلومات العضو فيصل الشكري]

صح لسانك أخي الشاعر /فارس الدبالين على القصيديتن المعبرتين


وبارك الله فيك



تقبل تحياتي,,

 

 

 

 

[معلومات العضو فارس الدبالين]

اخوي محمد بن سالم الخضران صح ابدنك ولاهنت والله يسمع منك يالقرم

اخوي فيصل الشكري صح ابدنك ولاهنت على مرورك الكريم ياذيبان

اختي الزين لاهنتي يالاجوديه على مرورك العطر

 

 

 

 

[معلومات العضو دغش بن حمد بن منصور]

هلا يابو سالم

صح الله السانك ياجزل

ويستاهل اخوك ماقلت فيه والله يوفقه في حياته ويوفق الجميع

لاهنت

 

 

 

 

[معلومات العضو نايف الخييلي]

فارس الدبالين

صح لسانك واعتلى شأنك على القصيدتين الجزلتين

وبارك الله فيك على تشجيعك لأخوك وجعله عونً لك بالدنيا والاخره

 

 

 

 

[معلومات العضو شيهانه بكف صقار]

لله درك

صح الله لسانك يا اخوي من اروى ماقريت في الوصيا
مااشاء الله زاد الله من فضله

وعان اخاك على مسيرته القادمه

كل الشكر

 

 

 

 

[معلومات العضو فارس الدبالين]

هلابك اخوي دغش الصخابره وصح ابدنك ولاهنت ياذيبان على مرورك الكريم

والله يسمع منك ياطويل العمر تحياتي ...

 

 

 

 

[معلومات العضو فارس الدبالين]

اخوي نايف الخييلي صح ابدنك ياذيبان ولاهنت على الكلام الطيّب
والله يسمع منك ياطويل العمر وعسى التوفيق لجميع المسلمين
ومرور الطيبين مثلك وشرواك هو التشجيع يالقرم
تحياتي ...

 

 

 

 

[معلومات العضو فارس الدبالين]

شيهانه

صح ابدنك يابنت الاجاويد ولاهنتي على المرور والكلام الطيّب

والله يسمع منك ويوفقك لما فيه الخير

تحياتي ...