طير الكنار والتغريد

[معلومات العضو حسن بن بطحيه]

المشاركة الأصلية كتبت بواسطة ابو ثمام الدوسري

السلام عليكم وأرجو أن تتقبّلوها كما جاءت

على غصن البشام اتشيل صوتك بالغنا ياطير=بعد عينّت لقمه من جراده غيرك آكلها
تغرد من صباح الله وفالك في صباحك خير=تميل ابك الغصون اليانعه وانته تمايلها
مع الفجر الندي تسرح وتضوي يالكنارعصير=ترفرف في جناحين السعد والنود شايلها
ولا تنقل من هموم الزمن همٍ ولو هو صغير=عدا لقمة نهارك والله الرزاق كافلها
غبطتك في حياتك لا تقول ان البنادم غير=صحيح انــّا بشر وانت البشر ياطير تجهلها
مصورنا المصور جل شانه بـ .. أحسن التصوير=ولكنّ النقايض فالطبايع ما تخيلها
حسد مع حب مع غل وسخا مع كره مع تقتير=مع الحقد .. وتطول القايمه لا جيت أكملها
مزايانا عيوب وكل ذنبٍ يسبقه تبرير=رغم تحميلنا للصايبه في غير محملها
طبايعنا كذا , والطبع يستعصي على التغيير=وحسن اشكالنا لو جملّتنا ما نجمّلها
نعيش بزيف وحنا للاسف نفهم وش ألي يصير=وننسى الآخره في لجِّة الدنيا ومشاغلها
سعادتنا - اذا تبغى الحقيقه - كلها تزوير=عن الواقع نغيب وندّعي وارواحنا ولها
ولو قلت انتم الي عمّروا بالفانيه تعمير=ترانا ألي هدمنا باقيتنا في معاولها
مع انك طير لو تقرا وتمعّن سورة التكوير=حرام ان تلعن الدنيا من آخرها ليا أولها
وحنا قلوبنا غلف وضحك فينا لعين الصير=نهيم بحبها ونزيد شوقٍ مع تململها
نسوق ركابنا في دربها كلٍ يحث السير=نبي نخطب رضاها طامعينٍ في مقابلها
مهرها من ذنوب يخونني في وصفه التعبير=لكنّ كل كلمة ياطير تطري بالردا قلها
هذي هي البشر وان طعتني مد الجناح وطِير=وغرد واحترس من غدرها واحذر حبايلها

الله يابو ثمام معاد عقب هذي حكي ما اقول غيريسلم فكر صاغ هالنوع من الشعر الساحر. باصفق حتى الصبح لك....

 

 

 

 

[معلومات العضو ابو ثمام الدوسري]

المشاركة الأصلية كتبت بواسطة حسن بن بطحيّه الودعاني

الله يابو ثمام معاد عقب هذي حكي ما اقول غيريسلم فكر صاغ هالنوع من الشعر الساحر. باصفق حتى الصبح لك....

صح بدنك ياحسن وتصفيقك يبي يغريني أستمر بالنشر هنا

كون أعجابك بما أكتبه يتمناه الكثير من التلامذه مثلي