شلعان

[معلومات العضو شافي القويسي المخاريم]

يـقـول مـــن هـاجــوس قـلـبـه يـدلــه

يقول من هاجوس قلبه يدله=وعيني تخايل عاليات الشناخيف
وادور على الطيب ووهت محله=واحافظ على رفقة بعيد المشاريف
رجل الرجال اللي يظلل بظله=مثل الجبل ما زعزعته العواصيف
عزيز نفس ما مشا بالمذله=رايات عزه يلعبن الغطاريف
لاطالت أيام الدهر ما تمله=تلقى النشامى له ومثله مواليف
جالس عزيز ولايجي فيك خله=وترى الجليس يمثلك بالتواصيف
ترى الرجال رجال وبهم مفله=أشكال تعرف أعزوم وتصاريف
وكلٍ يسير وسيرته شاهد له=وتبين من نيات قلبه طواريف
يرسم على نفسه صحايف مجلة=لو كان يخفي سيرته من العرب شيف
ومن لا فعل ماب الشرف حاصلٍ له=وقولٍ بلا فعلٍ حكايا ملاقيف
والطيب يبغي واحدٍ عاشقٍ له=يرفع خطاه العاليات المشاريف
على العسر واللين متحملٍ له=ومعسفٍ نفسه على العز تعسيف
قلبه على كسب المراجل يتله=تلة حبال مكسرات العصاريف
ثلاث ترفع مستوى الرجل كله=واليا حصل ثنتين جاله مواقيف
ألوله يكسى بها طايع الله=والله كريم وشرف الدين تشريف
والثاني اللي تنعرف عزوةٍ له=اليا قيل وين اللي يورد شبا السيف
والثالث اللي ضيف داره يدله=كريم سبلى يكرم الجار والضيف
واللي جمعها كلها سجلت له=عزٍ تقصر من فضاه المحاذيف
تاج الفخر ماكل رجلٍ يشله=الا الذي رجله تدك الشواطيف
نوبٍ تجي ضده ونوبٍ أرضله=ونوبٍ تحذف به على البر والسيف
ونوبٍ عراقيب الليالي تمله=ويصبح يصارع لفحة البرد والصيف
وجهه على كسب العلا جابرٍ له=لوكان ماها مايبل المغاريف
راع الصخا رب البرى عاينٍ له=ضيقات وقته من خرجها مناكيف