.:•:*¨`*:•.)☼( ... مديرة على راسي ولكن منهو زوجك ؟‏...)☼(.•:*¨`*:•:.

[معلومات العضو نجــــــــــديه]

طبعا هالقصه جتني عالايميل وحبيت انقلها للقسم لما تحتويه من ذكاء بعض النساء وحنكتهن وفيها ايضا من الطرافه بالموضوع,,,,,,,,, تدور القصة حول مديرة مدرسة عزباء غابت عن المدرسة يومين ولما عادت لمدرستها قابلنها المدرسات سلامات وينك يامديرة ؟ قالت لهن باركولي تزوجت. قالن مبروك يامديرة ولكن منهو زوجك ؟. قالت لهن بصراحة زوجي هو زوج إحداكن. المدرسات تكفين علميننا أي وحدة منا ؟ قالت المديرة والله ما أعلمكن . المهم لزمن عليها فقالت لهن أنا منيب متكلمة اللي تبي تعرف هل هو زوجها وإلا لا تجيب بكرا معها خمسمية ريال وإذا جت توقع تحط الخمسمية على الطاوله واللي آخذ خمسميتها فهي مهو زوجها واللي أخلي خمسميتها على الطاولة ولا آخذها فهو زوجها عيب علي اتزوج زوجها وآخذ بعد منها خمسمية ريال . وافقن المدرسات على الطريقة. ويوم جاء بكرا وكل وحدة مزهبه معها الدراهم. جت الأوله والثانية والثالثة والرابعة حتى العاشرة والمديرة تاخذ الدراهم . يوم جت المدرسة ال 11 وبدت المديره تأفف المهم حطت الدراهم على الطاولة وقالت لها تكفين خذيها يالمديرة قالت المديرة اعذريني قالت المدرسة كانها قليلة حطيت ألف بدال الخمسمية قالت المديرة أووووووووووووه معليش أثرك أنتي جواهر والله اني آسفه غلطت يوم تنفست المدرسة وقالت الحمد لله يعني بتاخذين الفلوس المهم اخذتها المديرة . ودخلن بقية المدرسات حتى ال 23 والمديرة تلعب باعصاب كل وحده وفي النهاية تاخذ الخمسمية . المهم بقي مدرسة وحدة فقط ماجت يوم اتصلن عليها المدرسات هاه وينك يا استاذه قالت والله اني تعبانه وماني جايه . قالت المدرسة الغايبة : هاه من صار زوجها اللي متزوج المديرة ؟ قالن لين الحين مابين شي والمديرة عيت تاخذ الفلوس لين نحضر كل المدرسات ( يلعبن عليها بس يبونها تجي عشان يتطمنون إنها هي لأنه مابقى إلا هي ) وقالن المدرسات لازم تجين تكفين . المهم جت تسحب رجليها بالقوة ويوم جت تدخل المدرسات كل وحده مبسوطة انها مهي هي وبدن يسمن على المدرسة ال 24 عشان ماتنصدم . دخلت المدرسة الأخيرة غرفة المديرة وحطن باقي المدرسات ايديهن على قلوبهن وحطت المدرسة الخمسمية على الطاولة وضفتها المديرة . يوم طلعت لقنها عايدية وماصار شي وفلوسها أخذتها المديرة . قالن يابنات فيه وحده منكن ماخذت المديرة دراهمها ؟ قالن لا والله كلنا اخذت دراهمنا . ودخلن المدرسات على المديرة وقالن اخذتي الفلوس من كل المدرسات تلعبين علينا منهو زوجك ؟ قالت المديرة المهم الدراهم ( 12000 ريال ) ماراح ترجع وأنا والله لا تزوجت ولا شي لين الحين عزوبية ووالله كنت مريضة هاليومين . ولكني اطلبككن قبل شهر تدفعن على مية ريال نصلح المصلى ولا وحدة منكن دفعت قلت والله لأدفعكن 500 ريال نصلح المصلى ونشتري مصاحف وقف للمسجد . قالن المدرسات بردها الله بالعافيه فداك الدراهم ولو تبين زود عطيناك هو صدق بس رجالنا ماتزوجوا علينا. وش رايكم بالسالفه .........

 

 

 

 

[معلومات العضو فالح بن فهاد]

هههههههههههه جعلها الزته ذا المديره اشهد انها ملكعه لاهنتي يانجـــــــــديه على القصه الزيــــــــنه

 

 

 

 

[معلومات العضو الشقرديه]

هههههههههههه لعبت عليهم والله انها ذكيه مسكتهم من يدهم الي تعورهم الف عافيه نجديه على القصه الطريفه الشقرديه

 

 

 

 

[معلومات العضو محمد ال مطيلق]

هههههههههههههه

مديره ذكيه لعبت عليهم بكل سهوله

تسلمين على القصه الطريفه

 

 

 

 

[معلومات العضو فيصل بن جزاء]

نجديه ماشاء الله عليك قصه طريفه وذكاء مديرة المدرسه

عرفت اطلع منهم قيمة المصلى والمصاحف

والله لوخذت من كل وحده عشره الااف يدفعونها ولايتزوج عليها زوجها

الله يعطيك العافيه

تقديري واحترامي

 

 

 

 

[معلومات العضو ريتآل]

ههههههههههههههههه والله المديره الصاحيه قدرت تلعب عليهن

نجديـــــــــــه لاهنتي يالغلا على هالقصه الطريفه والحلووه

تقبلي مروري

 

 

 

 

[معلومات العضو نجــــــــــديه]

سررت بتواجدكـــــم واشكركم عالتعليق والمرور على متصفحــــيـ لاعدمنا تواصلكــــــــم طاب يومكـــــم