نبذة عن احد ابطال حرب الوديعة

[معلومات العضو عبدالله الدوسريي]

الشيخ شليويح بن محمد بن منصور بن بنيان
" رحمه الله "
في حرب اليمن الجنوبي قام الجيش السعودي و ارسل برقية الى الأمير خالد السديري امير نجران و كانت اقلمة الوديعة منقطعة من الديزل فارسلو برقية للأمير خالد السديري يطلبون من يفزع لهم ووصلته البرقية و كان مجلسه مليان فصوت لـ ناصر بن عبدالله آل ضويان الوداعين و قال يا ناصر دور لنا من اهل السيارات من يحمل البراميل و ينقذ الجيش بالديزل و عطه من الإيجار اللي هو يبي فقام ناصر بن عبدالله آل ضويان و استفزع بـ احد رجالات الوداعين من الدواسر قال ياشليويح
اقلمة الوديعة منقطعة من الديزل و انا مكلف من السديري ادور من هل السيارات من يحمل البراميل فتمزهل لها شليويح و توجه لأقلمة الوديعة منقذ الجيش يوم رجع ناصر بن عبدالله آل ضويان للسديري قال بشّر يا ناصر قال ناصر ان شاء الله يا طويل العمر مهوب مصبح الصبح الا جايتك البرقية جاء خالد السديري ينشد ناصر بن عبدالله من عينت لها قال شليويح بن بنيان تنومس بها السديري وقال بشره وظفره #الوداعين هم اللي يردونها وانا بن زايد ويوم صلى الفجر يلين البرقية وصلته و شليويح قد تم الأمر وصل لأقلمة الوديعة و انقذ الجيش بالديزل فعلمه ان الأمير خالد السديري يبيه حضر شليويح عند امير نجران
وقال اطلب مابغيت رد عليه شليويح و قال مانيب اطلب عليها إجار هذي فزعة من الرحمن الا ان بعدها بفترة ارسل الأمير خالد السديري ( انذاك ) أمير نجران. لبلجيك هديّة له لشجاعته واقدامه في سبيل الوطن و ارسلها عليه وهي الان لا تزال عند الشيخ عبدالله بن منصور بن بنيان شيخ قبيلة آل سويلم

فكل مجد في الدولة محفور فيه فعل الدواسر رحمهم الله جميع .

__

نفدى اللي اعتق الجيش و الفزعة ولام
ما ضرى يا كود بالفعل ما عوّد خلف

عند شليويح ابن بنيان .. .. ينزاح المهام
تفتخر فيه الدواسر من عصور السلف
____

تشهد حدود الجزيرة على مر السنين
جيش شروره منهو الليّ لبّى مزهمه

أنقذه شيخ مردد ،، على فعله يقين
جعل جنات الوسيلة ملاذه و اقدمه

فيصل بن سالم الودعاني
___



يا عسى 1-ابو ناصر جنات عدن له نصوب *** خلف رجال لهم في العرب وجه وجاه

مفوه وامير لابة ومقدر ومحسوب *** مزبن اللي ضامه الوقت يوم الله حداه

راعي الجنيفا جزيل المعاني له جذوب *** الله اللي ميّز الطيّب ولااحد يخفاه

امدحه وانا على مدحة الطيب جذوب *** للقبيلة ذخر. والى حضر سمعو الوصاه

فيها من خيل الاصايل تلافح بالكعوب *** بندق ماهيب تخطي حناجر العداه

فزعته اسبق من الصويتيه في الحروب *** فزعةٍ تغني السديري وتغني ومن وراه

تشهد اقلمة الوديعة بوقع له سبوب *** انقذ الجيش السعودي وشاهدها الرواه

لا غدا للماو الأحمر مواقيد وشبوب *** يقلط بها صامل اهتوى الموت وطراه

جاه شيخ ينقل الحمل ويسوق و الدروب *** لاغرابة والاسد ارث اسود وراه

تفتخر به الدواسر ... شمال الى جنوب *** وسم بن بنيان للعز محفوظ نباه

من مقادم ربعه لامن عوى ذيب قنوب *** عزوته من 2-لاد سالم صناديد الدهاه

و الحمايا عندهم ما تجي نوب و نوب *** الحمايا للوداعين على طول الحياة

عبدالله آل سويلم


1- ابو ناصر/ شليويح بن بنيان
2- لاد سالم / قبيلة آل سويلم من الوداعين
الدواسر

 

 

 

 

[معلومات العضو عبدالله الدوسريي]

اضافة بسيطة لـ قصيدته الوطنية لـ البطل
الشيخ شليويح بن بن بنيان رحمه الله

سومي على روحي لحماية الدار
دون الوطن و الجيش و امر القيادة

ناطى على روس الافاعي والاخطار
و خصيمنا ناطاه و نكسب عتاده