هذي قصة واحد فرقت بينه وبين أبوه - عمته زوجة أبوه - واستمرت القطيعة لمدة تجاوزت العشرين عام، وبعد اللقاء المنتظر بينه وبين أبيه وإخوانه قال هذه القصيدة يصف فيها حاله ..
الله ومر بالوصل من بين الاقراب=وحنّا بوقتٍ زايدٍ بالقطيعه
وانا من اللي شفت بالحيل منصاب=وضاقت عليّ الارض لو هي وسيعه
يابوي أنا من صدتك عارضي شاب=وحطيت في كبدي جروح شنيعه
ماغير أهوجس مثل منهار الاعصاب=أنا اشهد إن صدتك عني وجيعه
ولا لقيت إلها تفاسير واسباب=ومعاتبتك محرمه في الشريعه
شفت المهونه من شباب وشيّاب=وانا عن الحقران نفسي رفيعه
لا نيب سربوت ولا نيب كذاب=ولا لي مع الانذال شريه وبيعه
يابوي أفك الباب وتسكر الباب=وخصيتني يابوي في ذا الطبيعه
حتى اصغر الاخوان كشر لي الناب=ما كني إلا بايقٍ لي وديعه
ولحدٍ خذالي شور في كل الانساب=يالله دخيلك من حياة الهزيعه
ويوم النزايل ياهلي صرتوا أحزاب=أحدٍ نصا الهيضل وأحدٍ في البديعه
ترا المعونه جت من رب الارباب=لحدٍ يحسب إني برجوا صنيعه
لكن نبي جمع القرايب والاحباب=قدام كلٍ يغلق الموت ريعه
صاروا اخواني عند ورعاني أغراب=شي يولع في ضميري وليعه
ليا اسألوني يغرق الدمع الاهداب=يالله عسى من لامني للفجيعه
يونس على كبده مثل عضة الداب=وارحم عياله لاومر ما يطيعه
يابوي طيرك له جناحٍ ومخلاب=يحط في ردن الحباري فنيعه
ماهوب حق إنك تحطه بسرداب=وتحمله من فوق ما يستطيعه
حطه على يمناك وتشوف الاعجاب=وافخر بطلعاته مع أهل الطليعه