وصلتني هذه القصيده وحبيت اني اهديها لمنتدى الدواسر
وقائلها الاستاذ/ عبدالرحمن العريفي مشكور ابو راكان
جهازي بدا يتلـف حديـده وفيـه اصـوات = جميـع المشاكـل فيـه وازريـت احددهـا
يقوم ويطيـح ولـو مشـى يكثـر الوقفـات= كما الفاطر اللي تشكي الضلـع مـن يدهـا
حداهـا الكبـر والضلـع ماتقـدر الشـدات = ونظرها ضعيف وجايـر الحمـل يجهدهـا
اذا جيت باخذ مع هـل المنتـدى لحظـات= (يهنـق) ولحـظـات السـعـادة ينكـدهـا
وانا لو انا مـن عالـم يدخلـون( الشـات) = لاقول ان به عللـه مـن( الشـات) صايـده
يقولون لاعاند معـك سـو لـه( فرمـات)= وانا كيـف( افرمـت) والتعاريـف فاقدهـا
شريتـه قبـل عاميـن بالنقـد والطلـبـات = ثلاثـة الـوف قـبـل اشيـلـه مسـددهـا
وبعد ماشريتـه قـال خالـد زد (الرامـات) = تراهـا قليلـة كـان تبغـى الظفـر زدهـا
ويقولـون دور لـك جهـاز مـن الزينـات = وترى قيمته كـان انـت طفـران قصدهـا
وخـل القديـم اللـي مبهذلـك عـده مـات= بعـه للهنـود ببخـس الاثمـان وازهدهـا
وانا كيف اعاقب صاحبي راعي الحسنـات= واواديــه هـنـدي كـروتـه يـبـددهـا
وانا للخوي لو بار ما ارضى لـه الضـدات = الاوي علـى رفقـه رفيـقـي واجـودهـا
واودر له الاعذار واغضـي عـن الـزلات = ولا اواخـذه فـي زلتـه لــو تعمـدهـا
واجامل مـع تقديـر معروفـه اللـي فـات= والا ما اكثر افضالـه علـي لـو اعددهـا
معه صرت اعرف النت وادخل على الساحات= واكاتب فحـول الشعـر واقـرا قصايدهـا
واتابع علوم الكـون واقـرا مـن النشـرات = تجـي طازجـة قبـل الـروادي تـرددهـا
بدينا مع الاقـلاع ننشـر علـى الشاشـات = وفضايـل هـل الاقـلاع مانيـب جاحدهـا
وقطعنـا مسافـة بالـنـداوي وشعبـيـات= صـروح الرجـال اللـي بنتهـا سواعدهـا
خذينـا بهـا مـرواس بالنظـم والقلطـات = نصـدر جـديـدات العـلـوم ونـوردهـا
نراسل نشامـا هرجهـم يفـرج الضيقـات= رجـال قبـل تنشـر مواضـيـع تنقـدهـا
ولا ياجهازي معك باصبـر علـى الشـدات= واكافـح معـك ظيـم الليالـي واجاهدهـا