بسم الله الرحمن الرحيم
* من يفعل الخير لا يعدم جوازيه ، لا يذهب العرف بين الله والناس
قصيدة مدح وثناء ... للأخوة الأفاضل / ناصر بن نايف آل غصين ، ومتعب بن محماس الهواشلة ، ودهيم بن محماس الهواشلة
صغت القوافي والمعاني بترتيب = من فكري اللي بالمعاني لبيبي
حياكم الله يا رجال المواجيب = ياللي لكم عز ، وجاه ، وطيبي
وأخص بالترحيب من يفعل الطيب = والا الردي ماله بقولي نصيبي
يا ناصر بن غصين يا منقع الطيب = طيب على طيب ومن ساس طيبي
ناصر بن نايف عقاب المراقيب = على مطاليع المراجل رقيبي
أبو فهد سيف عطيب المظاريب = يبين في يوم الزحام الرهيبي
يفداه من يسعى بفرقا الأصاحيب = أهل النمايم مبعدين الصحيبي
ومتعب بن محماس وافي بلا ريب = ما فيه لا شك ولا فيه ريبي
ولقامت الهيجا يسد المطاليب = له حكمة و رأي ، وراس صليبي
وأليا عوى فالوقت ذيب على ذيب = دهيم ابن محماس سقم الحريبي
شكراً جزيلا ومرحبا وألف ترحيب = باللي يحلون النزاع الصعيبي
اللي سعوا بالخير لهم الله يجيب = يا جعل تبطي شمسهم ما تغيبي
اللي سعوا في صلح .. حل الأصاعيب = يثنا عيهم من بعيد وقريبي
نظم الشاعر / محمد بن فهد ابن ثنوا الخييلي