[معلومات العضو ذيب الفرجان]

يقولون ما للعبد بد عن المقسوم * وانا اقول صح ويقنع العبد مقسومه

عسى الله يعين الي توافد عليه هموم * هموم تخلي طبلة الراس منجومه

ترا والله انه مايكدر عليك النوم *سوا كلمتن من بعض الاصحاب مسمومه

لا جت من الغالين ولا الرخوم رخوم * ولا امحق من الغالي ليا شانت علومه

وضعف الروابع تبتلش والقروم قروم * ولا هيب لا شامت من الشين مليومه

ولا ازين من القاع الخلا والوجيه سلوم * ولا رفقتن مع طول الايام ملغومه

ولا ألذ من عشرة شريف من اقصى القوم * يبادلك فعل االطيب معناه وسلومه

ولا شفت في جو الصداقه غبش وغيوم * عطيت الدروب الي مع الارض مرسومه

ولا مثل عز النفس لو ما معك مطعوم * وعن اهل الشماته خل الاسرار مكتومه

معي لو سمحت شوي عقبن عداك اللوم * ابعطيك عن بعض الرياجيل معلومه

ترا اللاش لو وقف معك في حياته يوم * تشوف الردا متبين فيه من يومه

وانا اقول لو ان في وجيه الرخوم رسوم * عرفا نميز قيمة النذل برسومه

على شان نجلس مع رجال الوفا ونقوم * ونبعد من الي عند الاجواد مذمومه

وانا اسمع مع اهل التجربه فالحياه علوم * بعضها صحيح وبعض الاقوال موهومه

يقولون وكر الحر ما يعتليه البوم * وانا شوف عيني وكر حر تحت بومه


للشيخ / راجح العجمي