[معلومات العضو راكـ ال بريك ــان]

ليل الفراق اللي بعيد عن البال=في هدو هز الطاولات وقلبها
ياراس مال اللي فقير عن المال=غلاك فالدنيا يعادل ذهبها
وكم ذقتلي فنجال في صف فنجال=والا تعوض عنك ياوردة ابها
يقطعك دنيا كل يوم على حال=تصيب مثل اللي سريع ندبها
الهاجس اللي داخل القلب يجتال=غنى على كل اللحون ولعبها
غنى لها موال في ساق موال=من روح ياللي نارها من حطبها
ما للسعاده عقبها باب مدخال=والياس في روح الحياه اغتصبها
لا نسنس الغربي وغصن الهوا مال=قامت غصون ابها توطي سلبها
غنى حمام الورق يامال يامال=ماعاد تعرف حزنها من طربها
خد القمر لو فوقه هلال وهلال=قلت استعار الصوره اللي نهبها
احبها حبٍ من الجال للجال=اللي وهبني حبها ما وهبها
وردة ربيع العمر حل(ن)وترحال=غذيت عمري من دلعها وادبها
آخر لقا خمسه وعشرين شوال=خسرتها واللي كسبها كسبها
من دونها يقدح سراب اشهب اللال=في دربها الضمر تثنا ركبها

حمود عبيد ال بريك