السلام عليكم ورحمة الله وبركاته
اسعد الله اوقاتكم بالخير والمسرات
هذي قصيدة للشاعر الكبير فيحان بن راشد بن محيس العصيمي (100سنة) قالها في خواله الدواسر بعد ماهبّت الجنوبية فتذكر خواله في وادي الدواسر وهو بعيد عنهم وتهيّض وقال:-
ياللي على ديرة خوالـي تمريـن = هاتي خبرهم يا هبـوب الجنوبـي
يالـي لخـلاق الاوادم تطيعـيـن =معفيتس ربي من جميع الذنوبـي
لا جاني الطرقي ولا شفت بالعين =واحبهـم لا جيتهـم رحبـوبـي
دواسـرٍ مـاهـم والله غبيـيـن = عن جارهم ما بيتهـم بمحجوبـي
كسابة الناموس في العسر والليـن = ولا يذبحون الا امهات العصوبـي
يوم القدايـم بالفعـول مخبوريـن =اما طلوع الشمس والا الغروبـي
كم ذود مصـلاحٍ عليهـا مقفيـن =عدوا عليهـا والطريـق مهيوبـي
تكفون ياللي طلعت الشمس ماشيين =ياللي تعرفون السنـع والدروبـي
معكم سلامي للخـوال العزيزيـن =كبيرهم واللـي صغيـرٍ يحوبـي
نصّوه لآل قويد ربعـن حشيميـن =اهل العلـوم الطيبـه والعجوبـي
اهل صخاف الشول عنها معديـن =من دونها عاقوا حصان الهذوبـي
بشلفٍ تروح ثومة القلب قسميـن =خلى الذياب الجايعه لـه تنوبـي
ياليتهم عن ضيقة الصدر داريـن=يوم اتنهت ضاق ابي جيب ثوبـي
من لامني عسـاه لفقـر والديـن=في حبهـم يـا ميتيـن القلوبـي
جعله يعـم المملكـه بالطمانيـن =نوٍ مـن القبلـه خيالـه جذوبـي
عساه غب السيل يسقـى وداديـن =جعله جنوب وعيفـره للهضوبـي
يركد على نجد المسمى اسبوعيـن=وشمال لعرعر وهـاك الشعوبـي
وشرقٍ إليا الدمام ويسار ويميـن =يسقى الوعر منها ويسق الخبوبي
وجعله يعز إلنا هل العدل والديـن =آل السعود مطوعيـن الصعوبـي
وصلاة ربي عد فرض المصليـن =على رسولٍ بالطريـق محبوبـي