بسم الله الرحمن الرحيم
قصيدة معاناه موجهه لسمو سيدي أمير منطقه الرياض سلمان بن عبدالعزيز حفظه الله ..
ياسيدي جانا من القاضي الحيف = قاضي ردى ماهو بقاضي شريعه
أحمد ولد صالح وله الاسم تعريف = قاضي عنيزه والردى له طبيعه
ياسيدي سلمان يامكرم الضيف= سلمان تسعام أهل النفوس اللكيعه
مقابله سلمان عزً وتشريف = ومن غيبته ضاقت علي الوسيعه
أبوك حكم بالسيف من السِيف للسِيف = من اقصى تبوك ألى حدود الوديعه
يمشي وراه الجيش وجمعً مراديف = ومع جرته تشبع سباعً مجيعه
خلاّ جميع الناس ربع ومواليف = لولا معزي كان راحو نزيعه
ماجاه حكمه بانتخاب ومضاريف = ألا بحد المرهفات الشنيعه
سلمان ينصف من شكا الضيم وضعيف = وانتو سندنا والحصون المنيعه
أراجع من العام تعبان ومعيف = لاجيت يوم السبت قالو تبيعه
ياسيدي قلّت علي المصاريف = والراتب وقف ماستفدنا بريعه
موقفه من حرف الوضع تحريف = يمكن يحطه في حسابه وديعه
خمسه وخمسين ألف ينهب على الكيف = وهاذا تصرف من ضميره يبيعه
فهد يعرف اللي يخفّا بالارشيف = خلّه يقول اللي يعرف ويذيعه
وسعود يعرف صرفها والتكاليف = يمكن يحط أرقام عنده فضيعه
متغطرسن بالكبر كبرً بتسويف = يضلم ويبغانا بضلمه نطيعه
يفكر أنه ينهي الوضع ويخيف = نموت ولانرضا بضلم وهزيعه
ياسيدي سلمان يامكرم الضيف = سلمان تسعام أهل النفوس اللكيعه
..
اخوكم
سعد بن سالم بن سويحل الخضران الدوسري