[معلومات العضو عبدالله الدوسري]

ان ضاق فيك الكون عرضه و طوله=اعرف ترى اللي يسّعه خالق الكون
اللي على عرشه و لا احدٍ يطوله=محدٍ سمع غيره و جاوب لذا النون
آمنت بكتابه و بعثة رسوله=و ان كل شيٍّ قدّره بأمره يكون
يالله يا مِمّن عبادٍ شكوا له=عطاه لا منّه عطا غير ممنون
اغفر ذنوبي دقّها و الجلوله=يا عالمٍ ما كان ف الصّدر مكنون
خذيت في بحر التّفاكير جوله=و من لا يراجع واقع الفكر مجنون
نيل المطالب ما يجي بالسّهوله=و من لا حسب مخرجْه بيبات مغبون
و المجد ما توصله نفسٍ ملوله=و العزّ ما يبنى بلا ساس و ركون
و الدّين ما تكمل بلاه الرّجوله=و دنياك ما يمكن تجي لك على لون
و رجلٍ بلا ربعٍ تزايد حموله=و الرّزق من رب المخاليق مضمون
و العبد ما قدّم يجيه محَصوله=الخير منه الخير و الشرّ موزون
غلطان من يتبع رحايل ميوله=يرهن حياته بين معفى و مديون
و ياللي تحسّب المرجله بالسّيوله=غيرك شقَح للطّيب من دون مليون