[معلومات العضو عبدالله الحافر الغييثي]

من قسا وقتي ومن كثرة احراجه =جرح قلبي ما تداويه المراهم
حظي اللي ضاع صيده في عجاجه =عذبه ترهيم دنياً ما تراهم
ما يحوس الرجل ويخرّب مزاجه =لا صفا جوّه مثل قلّ الدراهم
لا تلفّت ما لقى فالجيب حاجه =والعرب يصعب عليه اللي وراهم
والحظيظ اللي يواجه ما يواجه =ما نشد عن فقرهم والا ثراهم
في غناة الله وعز النفس تاجه =ما تلا المقفين يمشي في ثراهم
كل شده تاليتها الإنفراجه =ومن رجا العربان يبطي في حراهم
العرب خلان من كثرت نعاجه =لو ضعيف الشبر منها ما قراهم
تمدحه لو كان ما يسوى دجاجه =وصار من روس القبايل وأومراهم
قام يعطي مع فجوجٍ غير فاجه =ما يفرّق في رضاهم من زراهم
وإن لهدهم وان عمدهم بالعواجه =سمّحوا عوجاه واكموا في ذراهم
بالسوالف في المجالس والغواجه =باع خطلان الأيادي واشتراهم
في عيونه ما يشوف الناس حاجه =والعرب تراه مثل اللي يراهم

الشاعر/محمد بن عبّاد السلولي