ياللي زعلت إزعل ولاني مراضيـك =أشرب كدر ماي البحر كانه أرضاك
لا تحسب أني عقب صدك بداريـك = بأعز نفسي عنـك مـدراك مـدراك
أربع سنيـن وأنـا متحمـل تغليـك = راضي بتعذيبك لأجل قلـبٍ أغـلاك
وخليتنـي والـيـوم والله لأخلـيـك = وأدوس قلبـي لينـه يقـول خـلاك
قبـل تورينـي الحسايـر بأوريـك = ليمن يقـال فـلان هانـك و ورآك
كانك تحدانـي فأنـا أقبـل تحديـك =وأنسى الغرام اللي مضى وأتحـداك
ماني بقايل لـك عسـى الله يهنيـك =الله يحرمك كـل مـا كـان هنّـاك
عسى العمى ياخيـن العهـد يعميـك =فوق الغرور اللي عن الماضي أعماك
وعساك ما تسمـع قريـب يناديـك = حيثك تجاهل صوت محروم نـاداك
وعسى الشلل يعوق رجـلٍ تمشيـك =لينك تنـدم ليـه غيـرت ممشـاك
وعسى حياتك بس فرحـة لشانيـك = يلقى بها الفرصة عـدوك ويشنـاك
وعسى الليالي اللي تجيني بطاريـك =يصبح عليها الصبح ويموت طرياك
وعسى المنام وكل راحـة تجافيـك = آميـن حتـى اللـي تمنـاه يجفـاك
وعساك ما تفـرح وتكثـر بلاويـك =وأمك تشق الجيب من عظم بلـواك
وإلى مت جعلك في جهنم تصاليـك = نار الجحيم ونـار دنيـاك تصـلاك
الله يكـره فيـك حتـى دوانـيـك = غشاش خاين من من النـاس دانـاك
هـذه النهايـة روح والله يجازيـك = أمسك ويومك عنهـم الغـد يجـزاك