[معلومات العضو نااااصر]

القصيده للشاعر محسن الدوسري وأتمنى من كل قلبي أن تنال على رضاكم وإستحسانكم .

مايداوي هموم القلب طب استشاري = لو شهد له عميد الجامعه بالجريده
ياهنـي واحـد راسـه من العقل عاري = سالـي جتلـه الدنيـا على مايريـده
جاهل عن ظروف الناس ماهوب داري = مـادرى بالليالـي والسنين العنيـده
يـانـديـم الـحـذاري يانـديـم الـحـذاري = من عميل الرخا لاجاك يرقص وريده
فات عصر الصبا والشيب جاله مواري = والكرى للوراء عاد العصور البعيده
يوم عصر الرحيل ودور سفن الصحاري = في حياة السعد قبل الحياة الزهيده
نسكن الريف والواحه وجرد البراري = بين وديان نجد وبين راس الفريده
مدهل الريم والحر الوحش والحباري = حي ذاك الزمان اللي عسى الله يعيده
مل قلب براه من الهواجيس باري = اتصبر وصبر الدوسري مايفيده
كل ماجات راحة خاطري جاه طاري = وأزعجته الهواجس والهموم العديده
كن بين الغوالي سوق بايع وشاري =بين عقلي وقلبي قبل بدع القصيده
من زمان تشوف العين منه العزاري = كل ماراح عله عاد عله جديده
كن عندي لـ بنك الهم سجل تجاري = راكد راس ماله مايوقف رصيده
لـ أقبل الليل جاني شارد الفكر ساري =وأبعد النوم لين الصبح يبدي عميده
ذكرتني رياح سهيل حل الصفاري = عقب مقطان ورد العد قرب شديده
والمطر لج رعاده وملا الخباري = كل ماخف سيله جاه سيل يزيده
شدو البدو عجل ظعانهم مايداري = بعدهم له دمار وقربهم يوم عيده
عدهم عقبهم ياخذ زمانين صاري = لايع الورق تلعي فوق جاله وحيده

تقبلوا خالص تحياتي أخوكم / نااااصر