قلتي فمان الله وانا ماتوقعت=من شدة الصدمة حروفي عقيمه
من حكمك القاسي على ماتنبهت=ومن بعدك الجافي عظامي هشيمه
خذيت عشقك داخلي ماتندمت=اسباب حبك عندي كانت عظيمه
كنتي في عيني جنتي لاتحلمت=واصحى ومرسالك حروفه كريمه
وكنتي في عقلي جالسه لاتكلمت=واول حكي من داخلي لك حشيمه
وكنتي الفرح في بسمتي لاتضاحكت=ومن مبسمك زف البحر لي نسيمه
وكنتي الحزن في دمعتي لاتزاعلت=واذرف دموع الكون لجلك غنيمه
وانتي العلاج بداخلي لاحضر طبت=واصعب جروحي بعد صوتك سليمه
ومن روحك العذبه في صدري تنفست=كن النفس واحد وعندي مقيمه
يامركب الطاغي في عيني تولعت=مهما غدا عشقك في قلبي جريمه
لو للهوى درس(ن) في قلبي تعلمت=منهو تولع عشقه جاته الهزيمه
اعلنت حكمك بس انا ماتنازلت=صعبه تهون بقلبي عشره قديمه
ودعتك الله و ياعساني تحملت=فراق من صوبك جروحه يتيمه
وسلامتكم
اخوكم
محمد بن حسين الحضيري