ما عندي علم من الكتاب ولا انا عفريـت جـن
ما غير شاعر يعشقك ومسلمك عـرش الخفـوق
موافقتني او عسى مـا كـان كنّـه لـم يكـن
ما املك الا حس مرهف وين مـا يمـم يتـوق
بالله لو جيتك وصـل لا تاخذينـه سـوء ظـن
نبض انتفض من هيبتك هي كلها وقت ويـروق
غيري يحبـك بالخفـى وانـا احبـك بالعلـن
يعني ولا فيها حيا حبك سـرى بيـن العـروق
يا ملهمتني كيف احب وكيف اغار وكيف احـن
اطلب من المولى يقذف في خاطرك معنـاة شـوق
ودي تكنين المشاعر مثـل مـا روحـي تكـن
احساس واخلاص ووفى وتقدير فـي رقتـه ذوق
مافيه واحد من زمـن ادم تـرى مثلـي افتتـن
مفتونك لاخر مدى وماني مـن الحـب معتـوق
ظميانك اسقيني فرح مليت من شـرب الحـزن
كم ليل عاند لا يجي من عقـب اهاتـه شـروق
وكم هاجس فبالي يمر ويعتـزي ضيـق ويشـن
اشرس معارك من الم وجيوش حسراتـه يسـوق
ارجوك حبيني ترى سلطان حبـك لـي حصـن
مشتاق اغرف من الهوى واحلم من احساسه اذوق
يا جعلني فدوة هلك يـا ايـة وسـت الحسـن
تدرين ما غيري احد في حبـك الطاهـر يلـوق
وان كان به واحد يبي اعجاب خله ياكل تبن
من دون قلبلك زلزلة قيفان وابيـات وطـروق
وان قال علم من الكتاب وقال انا عفريت جـن
هزيت من جذع السور ايات تلقف كل سـروق
ما قلت انا اني اتيـت بعـرش بلقيـس اليمـن
لكني جيت بعرش يخفق فـي معاليقـي خفـوق
وما جاه من سبأ بنبأ هدهـد ولا ارتـد الجفـن
ما غير قلب ونظرته للعشـق والعشـاق فـوق