[معلومات العضو راشد المسعري]

السلام عليكم ورحمة الله وبركاته:
طبعاً العنوان يكفي عن أي مقدمه وجوابه نترككم مع الشاعر عضو المنتدى الحاضر الغائب عبدالله بن راجس " تأبط خيراً " :-

قالوا( هوى ) قلت: الهوى وش هو؟؟ وابي علمٍ ثبات=قالـوا( محبة)قلتنـا: والحـبّ مرسـاه القـلـوب؟!
قالوا : نعم حب النّقـا يبقـى ولـو راعيـه مـات=صمّ الصّفا وهـو الصّفـا لـو ذاق لذّاتـه يـذوب
عنتـر وهـو عنتـر تعّلـق بالبنـيّ المتـرفـات=من شانهنْ لبْس الدّروع وخـاض غبّـات الحـروب
ليلى وقيس بـن الملـوّح فـي عصـورٍ ماضيـات=قيس انهبل فـي حبّهـا يومنّهـا بنـت(ن) لعـوب
بالله مـا تقـرا دواويـن الغـزل فـي المكتـبـات=مثلك يبو راجس مثقّف وانـت شاعـر وامحسـوب
قلت المحبة الاوّلـه ولّـت وعصـر الحـبّ فـات=حبّ النّقا ولّى ولـم يبقـى سـوى الحـبّ الكـذوب
أيّـة محبّـه يابطاقـات ( السّـوا ) ؟؟ والترّهـات=حـبٍّ بهيمـيّ المقاصـد لا محـبّ ولا امحبـوب
حبٍّ بداياته ( مسينجـر) او تولّـد عبـر ( شـات)=حتما(ن) بداياته نهاية واسألوا راعـي ( القـروب )
بالله قلّ لـي لـو سألتـك وش يشـدّك فـي الفتـاة=لا صرت ساعي في زواج وقيل خاطب وامخطوب؟؟
شفّك طويـلات الغِطـا واهـل العبايـا الضّافيـات=شفّك قصيرات الخِطـا والسّالمـات مـن العيـوب
جواهرٍ في بيوتهـنْ مـا دوّجـنْ فـي النّاطحـات=ما عرّضنْ بالبنطلـون وخالفـنْ صلْـف الهبـوب
مـا كحّلـنّ عيونهـنْ لاهـل العيـون الجايعـات=ولا حزّمنّ خصورهنْ والكفّ بالنّقـش امخضـوب
الحبّ تالي الوقت مـا ظنّـي علـى ذكـره طـراة=شمسٍ بدت فـي الاوّليـن وهايفـت يـمّ الغـروب
ثوبٍ لبسه اهل الـرّدى واهـل النّفـوس الخامـلات=احسن لنا نغسـل يدينـا مـن تعاطيـه ونتـوب !!