حبيب العازمي
سلام الله عليكم يا هل العوجاء هل التوحيد = سلاطين الرجال اللي تشرفها مواقفها
ابن ريفه فرد سجادته يبا يصلي العيد=وقبل ان الامام يكمل الخطبه تلحفها
فلاح القرقاح
هل العوجاء ولاهم معتقد ومشاهدتهم فيد= هلا يا مرحبا ترحيبة ما احد يوصفها
تبا تعرف هدف صاحبك ابن قرقاح بالتحديد= رضا ال سعود ولا شوفة الشعار عايفها
حبيب العازمي
ترا ماكل قناص قنص يقدر يصيد الصيد= ياراعي الصيده اللي روحت وانته تلاقفها
يارجال اذكر الله ثم هات العلم بالتاكيد= وروحك بعد هاذي بالمشاكل لاتكلفها
فلاح القرقاح
بعير عن لزومه مايجوده الرسن والقيد = وبعير لو يورا ديرته ماهوب شايفها
مادام انك معافى لاتصك الحيد فوق الحيد = تقويها نقويها تضعفها نضعفها
حبيب العازمي
لو ان الامر مثل اللي تقوله ماتصير وحيد = ولكن المجنن ماتريح لو تكتفها
ولا يازيد علم عمر ولاياعمر علم زيد =مطاوعت الزمن هذا خطرها في مصاحفها
فلاح القرقاح
انا قربت عند الوجه الابيض وانت رحت بعيد = ياليتك جيت في تاج الجنوب احلا مصايفها
تبا تقرا كتاب الله لازم تدرس التجويد =ولا تنقد يكون اهل التطرف في تطرفها
حبيب العازمي
انا لو جتني الدعوى وصلته لو في مدريد =لكن انته يابن ريفه على الريحه تخطفها
بغيت تشدد العتبان والمطران بالتهديد = واثرها كلمتن دايم على لسانك مطرفها
فلاح القرقاح
تقوله والعرب يدرون وش ملهيك ويش تريد = ثلاث شهور واللي يلحق الخلفه يعطفها
انا احارب على وضح النقا ماني بعرف الكيد = ولي عزوه مواقفها الشريفه ما تسلفها
حبيب العازمي
تحسب المشترا بالكاش مثل البيع بالتقصيد = ولو عندك طماعه لو بالغصب انتناصفها
صحيح العمر يفنى يالعبيدي والثياب تبيد = ورجلن مايجينا بالحقيقه لايولفها
فلاح القرقاح
طماعتنا رضى اللي يكسبون المجد والتمجيد = لك الله ماتصرف ياحبيب لو تصرفها
عسى ربي يعز اللي على زود الظروف يزيد =للاه اهل المواهب ماتحصل من يوضفها
حبيب العازمي
على الله يا نصيبن تجمع الفاسق مع العربيد = مايبقى الا الرموش اللي على عيوني تنتفها
ياكثر الخير مير النفس ماتقنع بشي زهيد =وهذا من شقاها لاتحسب انه يسعفها
فلاح القرقاح
ياكبر الكلمه اللي حرها يلحق رضيع الديد=امين المكتبه لو شاب راسه مايصنفها
ترا اللي ميده فعله ماهو محتاج للتاييد =وعند الله كل الخلق منشوره صحايفها