بسم الله الرحمن الرحيم
هذا طوّل الله عماركم الشاعر تميم بن عبيد ابن حويل الخييلي يقول مادحاً العمور وهم اهلً للمدح من قديم الوقت الى اليوم ومناسبتها عند ماسيّر عليهم فالخرج , ومن باب رد الوفا وذكرهم وماقدموه من ترحيب وكرم لايُستغرب من اهله فهم ربعً عاداتهم الطيب وعاداتهم الفعل اللى يطلق وجه اهله قال هذي القصيده يُثني عليهم وعلى من التقى بهم ويقول ابو عبيد :
يابو سعود امسً مشينا مسايير= لمحافظة الخرج ربعً لهم شان
خطلان الايدي بالليالي المعاسير = اليا قصر من المرجله ولد كوبان
لاد العميري مكرمين الخطاطير = اللى لهم في عالي المجد عنوان
شبال الاسود اللى تهز الطوابير =لمن التحم بالجو عجً ودخان
وصارت بدايتنا على سالم الزير = اول بدايتنا على بيت شبنان
كريم سبلا اللى يعش الخطاطير = هداج تيما مشبعً كل جيعان
وثوينيً جانا حدته السعاطير =مستارثً المرجله من كحيلان
واميرهم شلهوب يستاهل امير= حرً نداويً على راس مابان
نسل الفهود اللى تفك المعاشير =لا اكلحن الانياب وزاغن الاذهان
وعيال هادي من رجالً مشاهير =تذكر فعايلهم على مر الازمان
وسعودسعده باديً كنه النير= حاز المراجل كلها ولد خرصان
وغالب غلاب بحور الزواخير = بالمرجله غالب وبالطيب بستان
وختامها العشاي ياخاتمه خير=فرخ النداوي حازها سر واعلان
ومن لاذكرت اسمه فلا جاب تقصير = وارجو السموحه كان بالقول نقصان
انتم بني عمي على الشر والخير =وان احمد الله بني عم واخوان
وتمت وصلوا عد ماغرد الطير = على النبي الهاشمي نسل عدنان
القصيده صوتياً
وسلامتكم ولكم خالص التقدير
اخوكم \ نايف الخييلي