السلام عليكم ورحمة الله وبركاته هذه القصيده للشاعر طلال الرشيد أهديها لكم وكلي أمل بأن ترقى لأذواقكم العاليه
يا صغيّر ما يكبِّرني لقب =و ما يصغِّرني إذا انكرني صغير
ما خذينا الصيت من جمع الذهب=و لا نسابة شيخ أو قربة وزير
كاسبينه من هل السَّيف الحَدَب=الجنايز كان ما جاك النذير
صيتهم نجمٍ على راسه ذهب=سمعوا الصقهان به و أجهر ضرير
بالوفا تاريخٍ أبيض ينتصب=لا حكوا بالحق حيين الضمير
ضيغميٍّ للسناعيس أنتسب=لابةٍ طلنا بها عرشٍ كبير
عند حدّك يا كثير الهرج تب=لا تمر النار و ثيابك حرير
كان لك عزٍّ بذلّي فتعقب=و الله الا تبطي و حبلك قصير
أحسب أنك من صناديد العرب=و أثر ساترتك عباتك يا غرير
ما حسب للسوس زراع القصب=و القرادة ما درى عنها البعير
و لو حسبنا للحسايف و التعب=ما بذرنا يالعصافير الشعير
عن هلك أبرا إلى الله و أحتسب=الرجال اللي مجاراهم عسير
من قريش المصطفى و أبو لهب=و الدغالب ما غشت عذب الغدير
للرجال من الرجاجيل العتب=و الزكاة تحل في حال الفقير
لعن ابو وقتٍ غدينا به حطب=تحرقه نارٍ يثوِّرها أجير
ما ألومك ذا الزمن سوّى العجب=هو بقى غير الكرامة بالجفير ؟
ما أذل و راسي يشم المهب=لو بقى من شمّرٍ طفلٍ غرير
و ما أهاب و لا يزلزلني غضب=الشجاعة ورث و العاقل غزير
يا صغيّر ما يكبَّر باللقب=غير من كان من دونه صغير
ولكم مني أطيب وأجمل التحايا
محبكم دغش البطي