[معلومات العضو المنصا]

بدون مقدمات

جاني ولد اخوي فازع ومتهول يقول يا يبه هنا موقع محسوب على الدواسر وكله سب وفتن ويعلمني في الامور والقصص فاول الامر ما اهتميت قلت يمكن يبالغ وتركته قلت مهوب ذلحين وقته وانا ابوك الين بعد وقت قال يا يبه والله ان العلم كذا وكذا ويقولون كذا
وشفتنا بعيني الا هنا امورن تطير العقل واتاكد ان المنتدى يحمل اسم الدواسر الا هو يحمل اسم الدواسر

الا والله ان كان ذي امورهم اسمه الصحيح فتنة الدواسر وشي ما يعقل ولا يصح وحتا ان صح مهوب كل شي ينقال عاد كيف اذا خالطه التزييف والتحريف .

مهوب مجد ذا المجد :

ان كان يحسبونه مجد فوالله انه منقصه ولا هوب زود ومن يزاود على بني عمه نقص
وان كانك بتمجد عمرك على ربعك يعني ترديهم ولا رديتهم فالردا يلحقك لكن من عز ربعه معهم ينعز .

ان كان تبغون المجد اخذوه :

ان كان تبغون المجد لكم لحالكم لا شريك لكم فخذوه ! لكن تعزل عمرك عن من ! وتمجد عمرك على حساب من ! وتنقص في من ! ومن يبقالك ؟
وانا كلامي هنا ليس على حساب احد كلامي على اللي يسبب الفتن ويسعالها

لا تحسبونه مجد :

ان كان المجد على فعل في بني عمكم فتراه مهوب مجد وهنا سالفه اذكرها وهي في جداني مع بعض بني عمنا صار اللي صار وانا اعرف السالفه كامله مع قصيدها ويسالوني عنها عيال الجماعه وانا اقول مدري عن ذا السالفه طيب ليه ما علمتهم لان الفتن ما تجيب الا فتن وحتا لو السالفه صحيحه ويثبت قصيدها مهوب كل شي ينقال
وهم دايم يطلبوني القصيده وانا اردهم اللي اندفن لا تحرثونه .


اي تاريخ اعلم ولدي


وش التاريخ اللي راح اعلمه ولدي اللي انا عمه الفتن هذي ! ولا اقوله الدواسر يتطاحنون بينهم بين بعض ولا شفناه واقع شفته في النت وفي موقع فتنة الدواسر
ولا اعلمه تاريخ الدواسر اللي يشرف ويعرفونه القبايل حتا والله بعض الربع من باقي القبايل والله انهم يسالوني عن بعض قصص الدواسر هم يعرفونها وبعضها والله ما اعرفه
لكن يشوش راسي لانه للدواسر وانا دوسري ماهمني من هم منه المهم انها طولتهم تطولني


مجد الدواسر الصحيح

الدواسر عند القبايل تحسب لها الف حساب وتقدرها وعمرهم ما فرقو ولا تعرضو احد من رموز الدواسر
ويعرفون لقب الدواسر ومعروف عند كل القبايل مزبنة المجرم ووسامة العصا واهل الكرم
ما شفنا احد منهم تعرض للدواسر بشي ولا احد درا اني دوسري والله مايفرقون من وين
لانهم يعرفون المجد الصحيح للدواسر هذا المجد ان كان تبغون المجد شف كيف نظرة القبايل لنا ولكن للاسف شوفو انتو نظرتكم لربعكم .



لا يكون هذا عذركم :

لا يطلع احد ويقول فلان قال فينا و فلان قال ان حنا تاريخهم هو المجد اللي ماحولنا احد فيه ولا انتقص في احد تراه ناقص ومن يقلده ويسوي سواته مثله ناقص ونترفع منه ومن اشكاله ولا يمثلنا
حنا ما نرضا من يقول ذا الكلام كان من كان والله لا يحييه ولا نعترف بكلامه ولا يمثلنا .


الجميع تعالوا الى كلمة ٍ سواء :

بني عمي وعزوتي وكل من يحمل اسم دوسري والله مالي اي مصلوح ولا اي فايده يوم اخترت منتدى الدواسر الرسمي لكن ولد اخوي يقول رد عليهم عندهم ( يقصد منتدى فتنه الدواسر ) ورفضتنا وقالي مالك الا منتدى الدواسر الرسمي هو اللي ترد عليهم فيه لانه مافيه تحيز ولا عنصريه حتا ولد اخوي عرف يفرق بين المنتدى اللي يجمع واللي يفرق ووافقتنا وزبده الموضوع ترا تجمعنا كلمة الدوسري وان رفعتوها ارتفعتو معها ولا احد يقدر ينزل اسم القبيله لانه هو اللي ينزل
والدواسر عزوه للجميع اما المسفه ما يمثلون حتا عمارهم لانهم مسفه ومرفوع عنهم القلم وان كان ورد خطا منا ولا منا بدون قصد فجل سبحانه اللي ما يخطي اما اللي شغلته بس في الفتن ويحرف ويزيف على هواه ما يلزمنا
والدوسري مهيب لحد دون احد ومجدها مهوب في جذم على جذم كلها مجتمعه ومن ينقاله دوسري فهو بني عم
والدواسر مجتمعين على اسم واحد الدوسري ما سمعنا من قبل من فرق لكن شفنا من فرق وسوا فتن في موقع فتنة الدواسر .اصحاب الموقع الفتنه والله شككت انكم لا تنتمون للدواسر لان مواضيعكم وقسم كامل مافيه الا فتن وتحقير وعنصريه تولد الحساسيات وتنقيص في بني عمكم ان كنتم دواسر صحيح الغو القسم اللي شتت واصبح ساحات حرب وطعن في بعض وقصص مامنها الا التباغض على عيال عمكم ارفعو عماركم منذا السوالف عسا الله يرفع قدركم وكونو على قد اسم القبيله اللي يحمله موقعكم .
ونزلو القصص اللي ترفع من قدر القبيله وتفاخر لنا جميع واللي منه مصلوح فعساكم على القوه واللي شفتوه ضيق خطر بني عمكم ترا مالكم الا بني عمكم واتركو اللي يكدر على ربعكم وكلنا نجي على كلمة سواء تلم القبيله لا تحيز ولا عنصريه والطايله والمجد واحد وامنعو عماركم من الردا .




مهم :

الاخوان الاعزاء ارجو عدم الرد على مواضيعهم اللي تسبب فتنه لانها تجريهم وتقويهم لكن لو تركتوها اقل شي مالها صدى وتندفن محلها ولا تلقى من يهتم في مواضيعهم .

ادري انه راح يجيني شتم ومن الكلام اللي هو لكن ما يهم دام قبلي اللي احسن مني وجدانا واللي بنو مجد للقبيله ما اسلمو من التنقيص والتحقير انا وش اطلع .

لكن ان كان شتمي وسبي بيوقف الفتن اقول الله يبيحكم واشتمو على كيفكم ومبيوحين .


امنيه :

((( اتمنا انهم يردون علي حتا بردهم يعترفون للجميع انهم منتدى الفتنه . )))



في الختام

بسم الله الرحمن الرحيم

ان اريد الا الاصلاح ما استطعت وما توفيقي الا بالله