[معلومات العضو شافي القويسي المخاريم]

يا شيخة الزينات

لايابعد كل القرايب والأصحاب=غيرك فلا له وسط قلبي مكاني
لاتنخدع في هرج حاسد وكذاب=ناس تشب النار سرّ وعلاني
تسعى بتفريق الولايف بالأسباب=من حقدها تمشي بهدم المباني
يفداك طيّبهم رغم كل ماطاب=ويفدونك الغالين قاصي وداني
ويفداك قلبً بأصدق الحب لك ذاب=يذوب في سحر الغلا والحناني
عقبك جميع الناس بعيوني أغراب=في غيبتك ربي عليهم حداني
في غيبتك طيفك معي حيّ ماغاب=ماغاب عن ناظر عيوني ثواني
ماقبل حبك ياحبيبي لي أحباب=ولا عقب حبك حبً أول وثاني
كل مامضى قصة مراهق ومرتاب=يكتب على الجدران بعض الأغاني
يرسم قلوب مع تواقيع وألقاب=تلفت نظر بعض البنات الحساني
بس يدّعي قدام ربعه والأقراب=ويقول عند البيض عنتر زماني
من جيت بطّل من تخاريفه وتاب=قام يتغنى في جمالك لساني
ياشيخة الزينات وش جابك وجاب=والله مامثلك تكوّن وكاني
لاوالذي نزل تبارك والأحزاب=ماغير حبك خمني وأبتلاني
منزلك في عيني تغطيك الأهداب=وحبك تمركز بين حدب المحاني
في بحر عينك لي مقر وترحاب=القى بها المرفأ وعذب الأماني
نجل العيون اللي بها الموت ينساب=لاطالعتني جات عشري ثماني
ترفع لها القاب وتخضع لها رقاب=ويطيعها قلب تبعك وعصاني
سلطانة بالحسن والحسن جذاب=سلطان حسنك في محيطه خذاني
صحيح لاقيل الهوى حيل غلاب=يغلب على الرجال لو هو حصاني