[معلومات العضو شافي القويسي المخاريم]

ديمقراطيه الحوار

يالايمي في صدتي يوم صديت=الصد في بعض المواقيف حكمه
كان بنظرك الصد يعني أستقريت=فيما نسبته لي من كل تهمه
فهذا نظرك اللي عليه أستدليت=وكلٍ يحدد نظرته حسب فهمه
رايك تقوله ياقبيلي بماريت=ورايي أقوله قدر عقلي وعلمه
ماهوب شرطٍ أوافقك كل مامليت=وعمر اختلاف الراي ماكان خصمه
وحقك علي اسمعك في كل مابديت=لكن علي ماهوب ملزوم لزمه
وانا أستمعت لكل ماقلت وأوحيت=بس انت سمعك عن كلامي تصمه
واضح ماعندك للتفاهم مواقيت=ودك من الحبه لك تحط قمه
وشفتك بحالٍ ينرثي له وقفيت=ماريد أزود صدمتي فيك صدمه
لوصدتي ماهي أعتراف أني أخطيت=لاشك أفكر في أمور مهمه
ماأحب أردد قولة أخطيت وقديت=ونطّح الهايش هواشٍ يخمه
واللي حصل قد فات واصبح كمالميت=ولاعاد يرده عذل مخطي وذمه
وانا إلى من بعض الأحيان زليت=به أعترف ما أنكر وكابر وطمه
وستغفر الله كل ما أذن وصليت=وستسمح لطلاب حقه وأعزمه
وهذا الذي به بابن الأجواد وصيت=وعلمتنا ان الحلم والعفو نعمه
واليوم وشبك من الوصايا تخليت=ياعل كبر السن ماجاك همه
لاياوسيع المعرفه ليه سجيت=وضيعت يالأستاذ ظربٍ وقسمه
أسمع وانا التلميذ لوبي أستخفيت=وتلميذك أمس كبر وزنه وحجمه
أنا الذي بالحلم فعلاً تحليت=وقتً حليم الراي به طار حلمه
طبعي وسيع أبطان ياكم عديت=من عاقل ومسفوه من كل أٌمه
وإن جاء الخطأ من بعض الأدنين عفيت=ولا أيقنت بمبرر خطاه أستهمه
وأصفح وأسامح لومابان لي صيت=ولا أطلب من المخطي سوى طلبت امّه
لوكان غيري خاطره من دناميت=ولا أخطا عليه رفيقه ثار لغمه
لو جاه في مجلسه ماقال حييت=ولاعاد يرضى عنه لو حب خشمه
وهذا هو الشيطان وإن كان سميت=وسمّه يابن الاجواد ماشئت سمه
والتاليه لوكان عددت ما أحصيت=ما أحد من الزلات معصوم عصمه
والخاتمه يامخضرم القول هليت=خواطر من ضامري مستتمه
ياذا الحكيم إليا تكلم له أصغيت=وقوله كما حلوٍ بعيد مجمه
شربت من صافيه حتى ترويت=وصدرت مع دربٍ محدده رسمه
ويالله عسى في خاتمة قولي أوفيت=الهرج والمقصود بالقاف ختمه