[معلومات العضو راشد المسعري]

أعزائي و احبتي اعضاء منتدانا الغالي ، اضع بين أيديكم هذا الصوت والصدى لشاعرين كبيرين الأول هو الشاعر/ فرج بن سويدان السباعي المسعري والثاني عبدالله بن عوض الرشيدي ، وكان البادىء هو الشاعر المسعري مسندها على الشاعر الرشيدي:

بديت بإسم اللي عليه اتوكل = رب كريم باظلم الليل ندعيه
غافر ذنوب العبد لامنت تمشكل = لامن دعاه وتاب لله ينجيه
علاّم مايخفاه دق ولا جل = وهو الحكيم الحاكم الحكم بيديه
منشي مخاييله على القاع الأمحل= عقب المحل من زين الأعشاب يكسيه
من بعد ذكره يانديبي تجمل = ود الكتاب لمن تنومس مماشيــه
صوب الرشيدي كاسب المدح وصل = عيد الركاب إن جات من البعد تبغيه
عبدالله المعروف للطيب يفعل = أبو عوض يشكر ليا حل طاريـه
يضحك حجاجه للمسيّر ليا أقبل =وما جاه من ضيفٍ بصوته يحييه
بيته مقر للنشاما ومدهل = بيتٍ غشاه العز من طيب راعيه
وعلم الثنا يثنى على كل مشكل= اللي مع أهل الطيب تعرف مساعيه
فيابوعوض من ضيقة البال نزعل= والبال سبة ضيقته من لياليه
ليا فاتني حلٍ مضى وابتدى حل = قلبي هواجيسه تلوفه وتكويــه
وقتٍٍ أموره يالرشيدي تنازل = فيه الدليل يضيّع الفكر ويتيه
والذيب شفته من المراقيب حوّل = وأبا الحصيني غامصه في تحديه
أشوف وقت يالرشيدي تبّدل = فيه الردي اليوم يلحق تمانيه
والخاتمة يابو عوض شفلي الحل= راع المعرفة نستفيد بمعانيه

[size=5]وكان رد الشاعر عبدالله بن عوض الرشيدي :

حي الجواب اللي على العز مرسل = من شاعرٍ ذكره ينومس بني خيه
قرمٍ وله في قمة العــز منـــزل = ورجم الوفاء ماكل رجلٍ يعديــــه
فرج بحبل الشعر ينقض ويفتل = وفكـره ليا ضاع الدليلة يقديــه
من لابــةٍ في الحرب ماتعرف الذل = وعدوهم ما تقبل النوم عينيـــه
دواســرٍ لا قالت القـــول تفعــــل = كـلن يبيع الروح من دون عانيه
أهل الكــرم والجود حماية البل = وزبن الدخيل اللي غريمـه مجليـه
ويابو سويدان أنت تنزل وترحل = وتشــكي زمانٍ حاضــره عكس ماضيه
وقتٍ به الرديان تقفي وتقبل = وكلن يقول الحق عندي وابعطيـــــه
تفعل فعــل عنتر وفعل المهلهل = في ظـل سيفٍ يعطي الحق راعيـــه
والفرق واضح بين الأعمي والأحول= فرقٍ رجال العرف ما تشتبه فيه
اللي يشوف الشمس ماسار بالظل = لو كان ظله كل يومٍ يباريـــــــه
اصبر على جور الزمــان وتحمــل = وربك كريم ولا يخيب الرجا فيه
أما يطيح الحظ ولا يتعــدّل = ولاّ ينـــــام وفزعـــة الله تصحيــه
هــذي سواة الناس تنجح وتفشل = وهذا الدهــر كلٍ شكى من بلاويه
وليا عصاك السوق طع له وجامل = حتى تبيع وتشتري من مقاضيـــه
واللي زعل من عملةٍ ما تجمل = قلـّــه يطب السوق والسوق يرضيه
وما يكتب الباري على العبد يحصل = واحدن يبيح السر واحدن يخفيـــّـــه
لو كان له في وسط بيتٍ مقــفــل = اللي كتب له في جبينـه يلاقيــــــه
وصلاة ربي عد نوّن تهلهــــل = على رسولٍ كلنــا نشتفع فيــــــــه