تحية طيبة لكل أعضاء وزوار ومرتادي هذا المنتدى الجميل: وبعد
يسرني أن أضع بين أيديكم قصيدتين عبارة عن (صوت) و (صدى) جرت قبل أعوام بين كل من الشاعر (سعد بن جدلان الأكلبي) وأحد شعراء هذا المنتدى (نايف بن مسرع) وكان البادي هو الشاعر سعد بن جدلان واصفاً حالة الشعر وما يمر به في الوقت الحاضر من تشبث أناس به وهم لايفهمون أبجدياته ، وقد نُشرت القصيدتان في بعض الصحف المحلية ومنها على وجه الخصوص صفحة ( خزامى الصحاري ) بجريدة الرياض ، فإليكم الصوت والصدى ، راجياً أن تنال رضاكم:
ياهل القصيد مراسلين الجرايد=تكفون صونوا كلمة الشعر تكفون
خلوه يلقى من وراها فوايد=فيدوا وخلوا غيركم يستفيدون
لاتعرضون انفوسكم للنقايد=الرابح اللي من غثا الناس مصيون
إليا بغيتوا نادرات القصايد=أصغوا لشعار الادب وش يقولون
أهل الادب والتجربة والركايد=أمثال مرشد والعطاوي وابن عون
أفكارهم ما تنتج إلا فرايد=تقول بصدور الاوادم يويقون
قلته وانا عنهم بعيد ونايد=ولاني بقايلها علشان يوحون
ولاني براجي من وراها فوايد=لكن رجل يخفي النور ملعون
وينك من أول يا صدوق الوعايد=يا شاعر(ن) ترسم على الطرس بفنون
أشعلت في داخل فوادي وقايد=على الوتر تضرب وانا ارد بلحون
قريت لك وسط (الخزامى) فرايد=فيها جرس وانذار للي يحسون
ترى الشعر في نقص ماهوب زايد=مادام به ناس(ن) بساسه يحفرون
ناس(ن) تباها به بوسط الجرايد=وكلٍ على ليلاه يشكي ومفتون
الشعر ديوان الفعول الحمايد=ويذكر به اللي بالشجاعة يطرون
ويشفق على ذكره رجال العوايد=قروم(ن) على جزال المعاني يغارون
ويازين من بين النشامى شرايد=فيها عشاشيق الجوازي يغنون
وهذي نصيحة ياهواة القصايد=لازم على بيوت السديري تمرون
قلته وانا ياهل (الخزامى) محايد=وفي واجبي شاركت وانتوا تحكمون